ഒട്ടാവ: കാനഡയുടെ ഭാവി കുടിയേറ്റ നയങ്ങൾ രൂപീകരിക്കുന്നതിൽ നേരിട്ട് പങ്കാളികളാകാൻ പൊതുജനങ്ങൾക്കും ഇമിഗ്രേഷൻ വകുപ്പ് അവസരമൊരുക്കുന്നു. 2027 മുതൽ 2029 വരെയുള്ള വർഷങ്ങളിലെ ഇമിഗ്രേഷൻ ലെവൽ പ്ലാൻ തയ്യാറാക്കുന്നതിന്റെ ഭാഗമായി ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് കാനഡ (IRCC) പൊതുജനാഭിപ്രായം തേടിക്കൊണ്ട് ഓൺലൈൻ സർവേ ആരംഭിച്ചു. മേയ് 12-ന് തുടങ്ങിയ ഈ സർവേ ജൂൺ 14 വരെയാണ് ലഭ്യമാകുക.
അടുത്ത മൂന്ന് വർഷത്തിനുള്ളിൽ കാനഡ എത്ര പുതിയ സ്ഥിരതാമസക്കാരെ സ്വീകരിക്കണം, താൽക്കാലിക താമസക്കാരുടെ എണ്ണത്തിൽ എന്ത് നിയന്ത്രണം വേണം തുടങ്ങിയ കാര്യങ്ങളിലാണ് സർക്കാർ പ്രധാനമായും നിർദ്ദേശങ്ങൾ തേടുന്നത്. നിലവിൽ കാനഡയിലെത്തുന്ന വിദേശികളുടെ എണ്ണം കുറയ്ക്കാനും അത് രാജ്യത്തെ അടിസ്ഥാന സൗകര്യങ്ങൾക്കും തൊഴിൽ വിപണിക്കും അനുസൃതമായി ക്രമീകരിക്കാനുമാണ് ഭരണകൂടം ശ്രമിക്കുന്നത്. ആരോഗ്യമേഖലയിലെയും നിർമ്മാണ മേഖലയിലെയും തൊഴിലാളി ക്ഷാമം പരിഹരിക്കുക, ഫ്രഞ്ച് ഭാഷാ കുടിയേറ്റം പ്രോത്സാഹിപ്പിക്കുക എന്നിവയും ഈ ചർച്ചകളുടെ ഭാഗമാണ്.
കാനഡയിലുള്ള ഇന്ത്യൻ വിദ്യാർത്ഥികൾക്കും താൽക്കാലിക തൊഴിലാളികൾക്കും മലയാളികൾ ഉൾപ്പെടെയുള്ള പ്രവാസി സമൂഹത്തിനും ഈ സർവേയിൽ പങ്കെടുക്കാം. നിങ്ങളുടെ അഭിപ്രായങ്ങൾ വരാനിരിക്കുന്ന വിസ നിയമങ്ങളെയും പി.ആർ (PR) സാധ്യതകളെയും സ്വാധീനിച്ചേക്കാം. ജൂൺ 14-നകം സമർപ്പിക്കുന്ന ഈ നിർദ്ദേശങ്ങൾ കൂടി പരിഗണിച്ച ശേഷമാകും 2026 നവംബറിൽ സർക്കാർ പുതിയ ഇമിഗ്രേഷൻ പ്ലാൻ പാർലമെന്റിൽ അവതരിപ്പിക്കുന്നത്. കാനഡയിലേക്കുള്ള കുടിയേറ്റം കൂടുതൽ ചിട്ടപ്പെടുത്തുന്ന ഈ ഘട്ടത്തിൽ നിങ്ങളുടെ ആവശ്യങ്ങൾ അറിയിക്കാനുള്ള സുപ്രധാന അവസരമാണിത്.
New Canada Immigration Levels 2027-2029 Consultations Open Now
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
