ഒട്ടാവ: 2026-ലെ സെൻസസ് വിവരങ്ങൾ രേഖപ്പെടുത്താനുള്ള ഫോമുകൾ ഇതുവരെ ലഭിക്കാത്ത കനേഡിയൻ നിവാസികൾ പരിഭ്രാന്തരാകേണ്ടതില്ലെന്ന് സ്റ്റാറ്റിസ്റ്റിക്സ് കാനഡ അറിയിച്ചു. സെൻസസ് ഫോമുകൾ പൂരിപ്പിക്കാൻ നിശ്ചിത സമയം കഴിഞ്ഞാലും ജൂലൈ വരെ വിവരങ്ങൾ സമർപ്പിക്കാൻ അവസരമുണ്ടെന്ന് അസിസ്റ്റന്റ് ചീഫ് സ്റ്റാറ്റിസ്റ്റീഷ്യൻ ജെഫ് ബോൾബി വ്യക്തമാക്കി.
മെയ് 4-ഓടെ എല്ലാ വീടുകളിലും സെൻസസ് വിവരങ്ങളും ആക്സസ് കോഡും അടങ്ങിയ ഫോമുകൾ എത്തേണ്ടതായിരുന്നു. മെയ് 12-നകം ഫോമുകൾ പൂരിപ്പിക്കണമെന്നായിരുന്നു പ്രാഥമിക നിർദ്ദേശമെങ്കിലും, പലർക്കും ഫോമുകൾ വൈകി ലഭിക്കുന്ന സാഹചര്യത്തിൽ ആശങ്ക വേണ്ടെന്ന് അധികൃതർ അറിയിച്ചു. ജൂലൈക്കുള്ളിൽ വിവരങ്ങൾ സമർപ്പിക്കാത്തവർക്ക് 500 ഡോളർ വരെ പിഴ ഈടാക്കാൻ സാധ്യതയുണ്ട്. അതിനാൽ ഫോം ലഭിക്കാൻ വൈകിയവരോ യാത്ര കഴിഞ്ഞ് തിരിച്ചെത്തിയവരോ എത്രയും വേഗം സെൻസസ് നടപടികൾ പൂർത്തിയാക്കണമെന്ന് സ്റ്റാറ്റ്കാൻ അഭ്യർത്ഥിച്ചു.
സെൻസസ് ഫോമുകൾ ലഭിക്കാത്തവർക്കോ ആക്സസ് കോഡിനായി സഹായം തേടുന്നവർക്കോ 1-833-852-2026 എന്ന ഹെൽപ്പ് ലൈൻ നമ്പറിൽ ബന്ധപ്പെടാവുന്നതാണ്. രാജ്യത്തിന്റെ സാമ്പത്തികവും സാമൂഹികവുമായ വികസന പദ്ധതികൾ ആസൂത്രണം ചെയ്യുന്നതിന് ഓരോ കുടുംബത്തിന്റെയും കൃത്യമായ വിവരങ്ങൾ അത്യാവശ്യമാണെന്ന് അധികൃതർ ഓർമ്മിപ്പിച്ചു.
What to do if you still haven’t received your census mail
