ഒട്ടാവ: വരാനിരിക്കുന്ന വേനൽക്കാല അവധിക്കാലത്ത് വിദേശയാത്രകൾ ആസൂത്രണം ചെയ്യുന്നവർക്ക് ജാഗ്രതാ നിർദ്ദേശവുമായി കാനഡ. മിഡിൽ ഈസ്റ്റിൽ തുടരുന്ന യുദ്ധസാഹചര്യം ആഗോളതലത്തിൽ യാത്രാ തടസ്സങ്ങൾക്ക് കാരണമായേക്കാമെന്ന് ഫെഡറൽ ഗവൺമെന്റ് പുറത്തിറക്കിയ പുതിയ നിർദ്ദേശത്തിൽ പറയുന്നു. ‘ഗ്ലോബൽ അഫയേഴ്സ് കാനഡ’ ചൊവ്വാഴ്ചയാണ് ഇതുസംബന്ധിച്ച ഔദ്യോഗിക അറിയിപ്പ് പ്രസിദ്ധീകരിച്ചത്.
മിഡിൽ ഈസ്റ്റിലെ സംഘർഷാവസ്ഥയെത്തുടർന്ന് ലോകമെമ്പാടുമുള്ള യാത്രക്കാർ വലിയ വെല്ലുവിളികളാണ് നേരിടുന്നത്. മേഖലയിലെ ഇന്ധനക്ഷാമം വിമാനങ്ങൾ റദ്ദാക്കുന്നതിലേക്കും വിവിധ രാജ്യങ്ങളിലെ പ്രാദേശിക സേവനങ്ങളെയും അവശ്യസാധനങ്ങളുടെ ലഭ്യതയെയും ബാധിക്കാനും സാധ്യതയുണ്ട്. മിഡിൽ ഈസ്റ്റിലേക്ക് യാത്ര ചെയ്യുന്നവർ മാത്രമല്ല, ഈ മേഖലയിലൂടെ മറ്റു രാജ്യങ്ങളിലേക്ക് പോകുന്ന കണക്റ്റിംഗ് ഫ്ലൈറ്റുകളെ ആശ്രയിക്കുന്നവരും അവസാന നിമിഷം ഉണ്ടായേക്കാവുന്ന മാറ്റങ്ങൾക്കായി തയ്യാറെടുക്കണമെന്ന് നിർദ്ദേശമുണ്ട്.
മിഡിൽ ഈസ്റ്റിന് പുറത്തുള്ള രാജ്യങ്ങളിലേക്ക് പോകുന്നവർക്കും ഈ സാഹചര്യം പ്രതികൂലമായേക്കാം. ഇന്ധന പ്രതിസന്ധിയും ആഗോള വിതരണ ശൃംഖലയിലുണ്ടായ തടസ്സങ്ങളും വരും മാസങ്ങളിലും തുടരാനാണ് സാധ്യത. അതിനാൽ നിലവിലെ സാഹചര്യങ്ങൾ കൃത്യമായി വിലയിരുത്തിയ ശേഷം മാത്രമേ വിദേശയാത്രകൾ തീരുമാനിക്കാവൂ എന്ന് സർക്കാർ അറിയിച്ചു. യാത്ര പുറപ്പെടുന്നതിന് മുൻപും തിരിച്ചുവരുന്ന സമയത്തും വിമാനക്കമ്പനികളുമായോ ട്രാവൽ ഏജന്റുമായോ ബന്ധപ്പെട്ട് യാത്ര ഉറപ്പാക്കേണ്ടത് അത്യാവശ്യമാണ്.
വിദേശയാത്ര എന്നത് വ്യക്തിപരമായ തീരുമാനമാണെന്നും വിദേശത്ത് കുടുങ്ങിപ്പോകുന്ന സാഹചര്യമുണ്ടായാൽ സർക്കാരിന് നൽകാനാവുന്ന സഹായങ്ങൾക്ക് പരിമിതികളുണ്ടെന്നും മുന്നറിയിപ്പിലുണ്ട്. ഇത്തരമൊരു സാഹചര്യമുണ്ടായാൽ കൂടുതൽ ദിവസം അവിടെ കഴിയുന്നതിനാവശ്യമായ പണവും മരുന്നുകളും കൈവശം കരുതണം. കാനഡ ഗവൺമെന്റ് യാതൊരുവിധ സാമ്പത്തിക സഹായവും ഇതിനായി നൽകില്ല. കൂടാതെ, ട്രാവൽ ഇൻഷുറൻസ് എടുക്കുന്നവർ ഇന്ധനക്ഷാമം, പ്രാദേശിക സംഘർഷങ്ങൾ എന്നിവ പോളിസി പരിധിയിൽ വരുമോ എന്ന് മുൻകൂട്ടി പരിശോധിക്കണമെന്നും ഗ്ലോബൽ അഫയേഴ്സ് കാനഡ നിർദ്ദേശിച്ചു.
Those traveling abroad beware! Flights may be canceled; Canada's new travel advisory released
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
