ഒട്ടാവ : കാനഡയിൽ നിന്നുള്ള അമേരിക്കൻ സന്ദർശകരുടെ എണ്ണത്തിൽ കഴിഞ്ഞ ഒരു
വർഷത്തിനിടെ 42 ശതമാനം കുറവുണ്ടായതായി യൂണിവേഴ്സിറ്റി ഓഫ് ടൊറന്റോയിലെ സ്കൂൾ ഓഫ് സിറ്റീസ് നടത്തിയ പഠനത്തിൽ വ്യക്തമാക്കുന്നു. മൊബൈൽ ഫോൺ വിവരങ്ങൾ അടിസ്ഥാനമാക്കി നടത്തിയ പഠനത്തിലാണ് ഈ കണ്ടെത്തൽ. ട്രംപ് ഭരണകൂടം ഏർപ്പെടുത്തിയ ആഗോള താരിഫുകളോടുള്ള പ്രതിഷേധവും രാഷ്ട്രീയ സാഹചര്യങ്ങളുമാണ് കനേഡിയൻ പൗരന്മാരെ അമേരിക്കൻ യാത്രകളിൽ നിന്ന് പിന്തിരിപ്പിക്കുന്നത്. ഔദ്യോഗിക കണക്കുകൾ പ്രകാരം 25 ശതമാനം ഇടിവാണ് രേഖപ്പെടുത്തിയിരുന്നതെങ്കിലും യഥാർത്ഥ സാഹചര്യം അതിലും ഗുരുതരമാണെന്ന് ഗവേഷകർ അറിയിച്ചു.
അമേരിക്കയിലെ പ്രധാന വിനോദസഞ്ചാര കേന്ദ്രങ്ങളായ ഫ്ലോറിഡ, സൗത്ത് കരോലിന എന്നിവിടങ്ങളിലാണ് സന്ദർശകരുടെ എണ്ണത്തിൽ വലിയ കുറവുണ്ടായത്. മർട്ടിൽ ബീച്ചിൽ കനേഡിയൻ സഞ്ചാരികളുടെ എണ്ണത്തിൽ 65 ശതമാനം ഇടിവ് രേഖപ്പെടുത്തി. മിയാമി, ഒർലാൻഡോ തുടങ്ങിയ നഗരങ്ങളിൽ സന്ദർശകരുടെ എണ്ണത്തിൽ പകുതിയിലധികം കുറവുണ്ടായി. വിനോദസഞ്ചാരത്തെ മാത്രമല്ല, അമേരിക്കയിലെ വാണിജ്യ-ധനകാര്യ കേന്ദ്രങ്ങളിലേക്കുള്ള യാത്രകളെയും ഈ ബഹിഷ്കരണം ബാധിച്ചതായി ഗവേഷണത്തിന് നേതൃത്വം നൽകിയ കാരെൻ ചാപ്പിൾ വ്യക്തമാക്കി. സന്ദർശകർ കുറഞ്ഞതോടെ അമേരിക്കൻ സമ്പദ്വ്യവസ്ഥയ്ക്ക് ഏകദേശം 8.4 ബില്യൺ യുഎസ് ഡോളറിന്റെ നഷ്ടം സംഭവിച്ചതായാണ് കണക്കാക്കുന്നത്.
അമേരിക്കൻ വിപണിയിലെ പ്രതികൂല സാഹചര്യം കാരണം കനേഡിയൻ ബിസിനസ് ഗ്രൂപ്പുകൾ ചൈന, നെതർലാൻഡ്സ് തുടങ്ങിയ രാജ്യങ്ങളുമായി വ്യാപാര ബന്ധം വർദ്ധിപ്പിക്കുകയാണെന്നും റിപ്പോർട്ട് വ്യക്തമാക്കുന്നു. കാനഡയുടെ ഈ നിലപാടിനെ പ്രധാനമന്ത്രി മാർക്ക് കാർണി സ്വാഗതം ചെയ്തു. സ്വന്തം രാജ്യത്തെ ഉൽപ്പന്നങ്ങൾ വാങ്ങാനും ആഭ്യന്തര വിനോദസഞ്ചാരത്തിന് മുൻഗണന നൽകാനുമുള്ള കനേഡിയൻ പൗരന്മാരുടെ തീരുമാനം പ്രശംസനീയമാണെന്ന് അദ്ദേഹം പറഞ്ഞു. സന്ദർശകരുടെ കുറവ് അതിർത്തിയിലെ ഡ്യൂട്ടി ഫ്രീ ഷോപ്പുകളെയും ഗുരുതരമായി ബാധിച്ചിട്ടുണ്ട്. പല കടകളും അടച്ചുപൂട്ടലിന്റെ വക്കിലാണെന്ന് ഫ്രോണ്ടിയർ ഡ്യൂട്ടി ഫ്രീ അസോസിയേഷൻ അറിയിച്ചു.
കനേഡിയൻ സഞ്ചാരികളുടെ പ്രിയപ്പെട്ട കേന്ദ്രമായ ലാസ് വെഗാസിലും സന്ദർശകരുടെ എണ്ണത്തിൽ 17 ശതമാനം ഇടിവുണ്ടായി. എയർ കാനഡ, വെസ്റ്റ് ജെറ്റ് തുടങ്ങിയ വിമാനക്കമ്പനികൾ സർവീസുകൾ വെട്ടിക്കുറയ്ക്കുന്ന സാഹചര്യമാണ് നിലവിലുള്ളത്. ചില കാസിനോകൾ കനേഡിയൻ ഡോളറിന് തുല്യമായ വിനിമയ നിരക്ക് വാഗ്ദാനം ചെയ്തിട്ടും സഞ്ചാരികൾ തിരിച്ചെത്തുന്നില്ലെന്ന് കണക്കുകൾ സൂചിപ്പിക്കുന്നു. കനേഡിയൻ സഞ്ചാരികളെ മിസ്സ് ചെയ്യുന്നുണ്ടെന്നും ദയവായി തിരിച്ചുവരണമെന്നും ലാസ് വെഗാസ് മേയർ ഷെല്ലി ബെർക്ക്ലി അഭ്യർത്ഥിച്ചു. ഒരു വർഷത്തിലേറെയായി തുടരുന്ന ഈ യാത്രാ ബഹിഷ്കരണം ഇരുരാജ്യങ്ങളും തമ്മിലുള്ള സാമ്പത്തിക ബന്ധങ്ങളിൽ വലിയ മാറ്റങ്ങൾക്ക് കാരണമായതായി വിദഗ്ധർ വിലയിരുത്തുന്നു.
Canadians avoid US trips; 42% drop in visitor numbers, report says
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
