ഒട്ടാവ: ആഗോളതലത്തിൽ ഇന്ധനവില വർധിക്കുന്നതും സാമ്പത്തിക അനിശ്ചിതത്വങ്ങളും നിലനിൽക്കുന്നുണ്ടെങ്കിലും കാനഡക്കാരുടെ യാത്രാ പദ്ധതികൾക്ക് വലിയ മാറ്റമില്ലെന്ന് ബിസിനസ് ഡെവലപ്മെന്റ് ബാങ്ക് ഓഫ് കാനഡ (BDC) പുറത്തുവിട്ട വാർഷിക ടൂറിസം റിപ്പോർട്ട്. 2026-ൽ പത്തിൽ ഒൻപത് കാനഡക്കാരും കുറഞ്ഞത് ഒരു യാത്രയെങ്കിലും നടത്താൻ പദ്ധതിയിടുന്നുണ്ട്. ഉയർന്ന ചെലവ് മറികടക്കാൻ ഭൂരിഭാഗം പേരും വിദേശ രാജ്യങ്ങൾക്ക് പകരം കാനഡയ്ക്കുള്ളിലെ വിനോദസഞ്ചാര കേന്ദ്രങ്ങളാണ് തിരഞ്ഞെടുക്കുന്നത്. അമേരിക്കൻ യാത്രകൾ ഒഴിവാക്കി സ്വന്തം രാജ്യത്തെ ടൂറിസം മേഖലയെ പിന്തുണയ്ക്കുന്ന പ്രവണത വർധിക്കുന്നത് കാനഡയുടെ ജിഡിപിയിൽ ഏകദേശം 4.6 ബില്യൺ ഡോളറിന്റെ അധിക വരുമാനം ഉണ്ടാക്കുമെന്നാണ് കണക്കാക്കപ്പെടുന്നത്.
യാത്ര പ്ലാൻ ചെയ്യുന്നവരിൽ 92 ശതമാനം പേരും രാജ്യത്തിനകത്ത് യാത്ര ചെയ്യാൻ താല്പര്യപ്പെടുമ്പോൾ, അന്താരാഷ്ട്ര യാത്രകൾ ആലോചിക്കുന്നവർ 70 ശതമാനമാണ്. എന്നാൽ മുൻവർഷങ്ങളെ അപേക്ഷിച്ച് അമേരിക്കയിലേക്കുള്ള യാത്രകളിൽ ഗണ്യമായ കുറവുണ്ടായിട്ടുണ്ട്. ഒരു ശരാശരി കുടുംബം ഈ വർഷം യാത്രകൾക്കായി ഏകദേശം 7,000 ഡോളർ ചെലവഴിക്കാൻ സാധ്യതയുണ്ടെന്ന് സർവേയിൽ പങ്കെടുത്തവർ പറഞ്ഞു. ഇതിൽ വലിയൊരു ഭാഗം ആഭ്യന്തര വിപണിയിൽ തന്നെ വിനിയോഗിക്കപ്പെടുന്നത് പ്രാദേശിക ടൂറിസം വ്യവസായത്തിനും തൊഴിലവസരങ്ങൾക്കും ഗുണകരമാകുമെന്ന് BDC ചീഫ് ഇക്കണോമിസ്റ്റ് പിയർ ക്ലെറൂ നിരീക്ഷിച്ചു.
ഇന്ധനവില ഉയർന്നത് യാത്രാ ബജറ്റിനെ ബാധിക്കുമെങ്കിലും, അത് പദ്ധതികളെ പൂർണ്ണമായി തടസ്സപ്പെടുത്തില്ലെന്ന് റിപ്പോർട്ട് ചൂണ്ടിക്കാട്ടുന്നു. താമസസൗകര്യങ്ങളിൽ വിട്ടുവീഴ്ച ചെയ്തും തിരക്ക് കുറഞ്ഞ ദിവസങ്ങൾ യാത്രയ്ക്കായി തിരഞ്ഞെടുത്തും ചെലവ് ചുരുക്കാനാണ് സഞ്ചാരികൾ ശ്രമിക്കുന്നത്. കഴിഞ്ഞ വർഷത്തെ അപേക്ഷിച്ച് ആഭ്യന്തര യാത്രകളിൽ താമസത്തിനായി ഓരോ രാത്രിക്കും ശരാശരി 43 ഡോളർ വരെ ലാഭിക്കാൻ കാനഡക്കാർക്ക് സാധിക്കുന്നുണ്ട്. കനേഡിയൻ ഡോളറിന്റെ മൂല്യത്തിലുള്ള മാറ്റങ്ങളും ആഭ്യന്തര ടൂറിസം മേഖലയുടെ റെക്കോർഡ് വളർച്ചയ്ക്ക് കാരണമാകുന്നതായി റിപ്പോർട്ടിൽ പറയുന്നു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Canada is not deterred by fuel price hike; Domestic tourism is gaining popularity; Survey shows no change in travel plans
