ഒട്ടാവ: അമേരിക്കയുമായുള്ള വ്യാപാര ചർച്ചകളിൽ രാജ്യം ശക്തമായ നിലപാട് സ്വീകരിക്കണമെന്ന ആവശ്യവുമായി കാനഡയിലെ ഭൂരിഭാഗം ജനങ്ങളും രംഗത്ത്. അമേരിക്കൻ ഉൽപ്പന്നങ്ങൾ ബഹിഷ്കരിക്കുന്നതും യുഎസ് യാത്രകൾ ഒഴിവാക്കുന്നതും കാനഡയുടെ വിലപേശൽ ശേഷി വർദ്ധിപ്പിക്കുമെന്ന് പത്തിൽ എട്ടുപേരും വിശ്വസിക്കുന്നതായി പുതിയ സർവേ വ്യക്തമാക്കുന്നു. സിടിവി ന്യൂസിനായി നാനോസ് റിസർച്ച് നടത്തിയ സർവേയിലാണ് കാനഡക്കാരുടെ ഈ ഉറച്ച നിലപാട് വ്യക്തമായത്. അമേരിക്കയുമായുള്ള വ്യാപാര ചർച്ചകളിൽ കാര്യമായ പുരോഗതി ഇല്ലാത്ത സാഹചര്യത്തിലാണ് ജനങ്ങൾ ബഹിഷ്കരണവുമായി മുന്നോട്ട് പോകുന്നത്.
സർവേയിൽ പങ്കെടുത്തവരിൽ 53 ശതമാനം പേരും ബഹിഷ്കരണം ചർച്ചകളിൽ ഗുണകരമാകുമെന്ന് അഭിപ്രായപ്പെട്ടു. 29 ശതമാനം പേർ ഇതിനോട് ഭാഗികമായി യോജിക്കുന്നു. ആറുമാസം മുമ്പ് നടന്ന സർവേയിലെ ഫലങ്ങളിൽ നിന്ന് വലിയ മാറ്റമില്ലാത്തത് ജനങ്ങൾ ഈ തീരുമാനത്തിൽ എത്രമാത്രം ഉറച്ചുനിൽക്കുന്നു എന്നതിന്റെ തെളിവാണ്. കേവലം 10.5 ശതമാനം ആളുകൾ മാത്രമാണ് ബഹിഷ്കരണം ഫലപ്രദമല്ല എന്ന നിലപാടെടുത്തത്. മുതിർന്ന പൗരന്മാർക്കിടയിലാണ് ബഹിഷ്കരണത്തിന് ഏറ്റവും കൂടുതൽ പിന്തുണയുള്ളത്.
കാനഡയിലെ വിവിധ പ്രവിശ്യകൾ അമേരിക്കൻ മദ്യങ്ങൾ വാങ്ങുന്നത് നിർത്തിവെച്ചത് യുഎസ് മദ്യ വ്യവസായത്തെ പ്രതിസന്ധിയിലാക്കിയിട്ടുണ്ട്. 2025-ൽ കാനഡയിലേക്കുള്ള മദ്യ കയറ്റുമതിയിൽ 63 ശതമാനത്തിന്റെ കുറവുണ്ടായതായി അമേരിക്കൻ ഡിസ്റ്റിൽഡ് സ്പിരിറ്റ്സ് കൗൺസിൽ അറിയിച്ചു. ആയിരത്തോളം പേർക്ക് തൊഴിൽ നഷ്ടപ്പെട്ടതായും പല ചെറുകിട സ്ഥാപനങ്ങളും അടച്ചുപൂട്ടലിന്റെ വക്കിലാണെന്നും അവർ യുഎസ് ട്രേഡ് കമ്മിറ്റിക്ക് നൽകിയ റിപ്പോർട്ടിൽ പറയുന്നു.
തങ്ങളുടെ വ്യവസായം വ്യാപാര യുദ്ധത്തിലെ ഇരകളായി മാറുകയാണെന്നാണ് അമേരിക്കൻ കമ്പനികളുടെ പരാതി. എന്നാൽ വ്യാപാര പ്രശ്നങ്ങൾ പരിഹരിക്കപ്പെടുന്നത് വരെ അമേരിക്കൻ ഉൽപ്പന്നങ്ങൾ ഒഴിവാക്കുമെന്നും യാത്രകൾ നടത്തില്ലെന്നും കാനഡയിലെ സാധാരണക്കാർ പ്രതികരിച്ചു. മെയ് 3 മുതൽ 6 വരെ ആയിരത്തിലധികം ആളുകളിൽ നിന്നാണ് ഈ സർവേ വിവരങ്ങൾ ശേഖരിച്ചത്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Canada says 'no' to America; People are uncompromising in trade war; US market in crisis
