മോങ്ക്ടൺ : ന്യൂ ബ്രൺസ്വിക് പ്രവിശ്യയിലെ 424 സ്പെഷ്യൽ കെയർ ഹോമുകളിലും എക്സ്ട്രാമ്യൂറൽ നഴ്സിംഗ് സേവനം ലഭ്യമാക്കുമെന്ന് പ്രീമിയർ സൂസൻ ഹോൾട്ട് അറിയിച്ചു. അഞ്ച് വർഷം മുമ്പ് പൈലറ്റ് പ്രോജക്റ്റായി ആരംഭിച്ച ഈ പദ്ധതിയുടെ സേവനം ഇതോടെ പ്രവിശ്യയിലെ മുഴുവൻ സ്പെഷ്യൽ കെയർ ഹോമുകളിലേക്കും വ്യാപിപ്പിച്ചു. സാലിസ്ബറിയിലെ സ്പെഷ്യൽ കെയർ ഹോമിൽ നടന്ന വാർത്താ സമ്മേളനത്തിലാണ് സർക്കാർ ഈ പ്രഖ്യാപനം നടത്തിയത്. പദ്ധതിയുടെ പൂർണ്ണമായ വ്യാപനത്തിലൂടെ ഏകദേശം 7,000 മുതിർന്ന പൗരന്മാർക്കും ഭിന്നശേഷിക്കാർക്കും ഇതിന്റെ പ്രയോജനം ലഭിക്കുമെന്ന് പ്രീമിയർ വ്യക്തമാക്കി.
പദ്ധതിക്കായി 3.8 മില്യൺ ഡോളർ അനുവദിച്ചതായി സോഷ്യൽ ഡെവലപ്മെന്റ് ഡിപ്പാർട്ട്മെന്റ് വക്താവ് അറിയിച്ചു. ഇത് ആരോഗ്യ വകുപ്പിന് കീഴിലുള്ള മൊത്തം എക്സ്ട്രാമ്യൂറൽ ബജറ്റിൽ ഉൾപ്പെടും. മുൻപ് റഫറൽ അടിസ്ഥാനത്തിൽ മാത്രം നൽകിയിരുന്ന സേവനങ്ങളാണ് ഇപ്പോൾ പ്രവിശ്യയിലുടനീളം ലഭ്യമാക്കുന്നത്. ഈ നഴ്സിംഗ് സേവനം വ്യാപിപ്പിക്കുന്നതിലൂടെ ആശുപത്രികളിലെയും ആംബുലൻസ് സർവീസുകളിലെയും തിരക്ക് കുറയ്ക്കാൻ സാധിക്കുമെന്ന് സൂസൻ ഹോൾട്ട് പറഞ്ഞു. പദ്ധതിയുടെ വിപുലീകരണം മറ്റ് ആരോഗ്യ മേഖലകളിലെ ജീവനക്കാരുടെ ലഭ്യതയെ ബാധിക്കില്ലെന്ന് ആരോഗ്യ മന്ത്രി ജോൺ ഡോർനൻ വ്യക്തമാക്കി.
ക്ലിനിക്കൽ മേൽനോട്ടം, മരുന്നുകളുടെ വിതരണം, വിട്ടുമാറാത്ത രോഗങ്ങളുടെ പരിപാലനം, മുറിവ് ഉണക്കുന്നതിനുള്ള ചികിത്സ (wound care) എന്നിവ എക്സ്ട്രാമ്യൂറൽ പദ്ധതിയിലൂടെ ലഭ്യമാകും. രജിസ്റ്റേർഡ് നഴ്സുമാർക്കും ലൈസൻസുള്ള പ്രാക്ടിക്കൽ നഴ്സുമാർക്കും 300 രോഗികളെ വരെ പരിചരിക്കാൻ സാധിക്കുമെന്ന് അധികൃതർ അറിയിച്ചു. രോഗികൾക്ക് കൃത്യമായ ഇടവേളകളിൽ വിദഗ്ധ പരിശോധന ഉറപ്പാക്കുന്നതിലൂടെ അടിയന്തര സാഹചര്യങ്ങളിൽ ആശുപത്രികളിൽ പോകുന്നത് ഒഴിവാക്കാൻ സാധിക്കുമെന്ന് ന്യൂ ബ്രൺസ്വിക്ക് സ്പെഷ്യൽ കെയർ ഹോം അസോസിയേഷൻ സിഇഒ ജാൻ സീലി അഭിപ്രായപ്പെട്ടു.
Treatment facilities in special care homes expanded; 7,000 people will benefit, says Premier
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
