സെന്റ് ജോൺ ഡാറ്റാ സെന്റർ: നഗരത്തിലെ ജലലഭ്യതയെ ബാധിക്കില്ലെന്ന് കമ്പനികൾ; വായുമലിനീകരണത്തിൽ ആശങ്ക

മോങ്ക്ടൺ : വെസ്റ്റ് സെന്റ് ജോണിൽ നിർമ്മിക്കാൻ ഉദ്ദേശിക്കുന്ന പുതിയ ഡാറ്റാ സെന്റർ നഗരത്തിലെ ജലസ്രോതസ്സുകളെ കാര്യമായി ബാധിക്കില്ലെന്ന് പദ്ധതിയുടെ ഭാഗമായ കമ്പനികൾ വ്യക്തമാക്കി. ആൽബർട്ട ആസ്ഥാനമായുള്ള ബീക്കൺ ന്യൂ ബ്രൺസ്‌വിക്, ടെക്സസ് ആസ്ഥാനമായുള്ള വോൾട്ടാഗ്രിഡ് എന്നിവർ സമർപ്പിച്ച പരിസ്ഥിതി ആഘാത പഠന (EIA) റിപ്പോർട്ടിലാണ് ഇക്കാര്യം വിശദീകരിക്കുന്നത്. ‘ക്ലോസ്ഡ് ലൂപ്പ്’ വാട്ടർ കൂളിംഗ് സംവിധാനം ഉപയോഗിക്കുന്നതിലൂടെ ജല ഉപഭോഗം ഗണ്യമായി കുറയ്ക്കാൻ സാധിക്കുമെന്ന് കമ്പനികൾ അവകാശപ്പെടുന്നു. പദ്ധതിയുടെ തുടക്കത്തിൽ ഏകദേശം 35 ലക്ഷം ലിറ്റർ വെള്ളം മാത്രമാണ് ആവശ്യമായി വരിക. ഇത് സെന്റ് ജോണിലെ മറ്റ് വൻകിട വ്യവസായ സ്ഥാപനങ്ങൾ പ്രതിദിനം ഉപയോഗിക്കുന്ന 11 കോടി ലിറ്ററിലധികം ജലവുമായി താരതമ്യം ചെയ്യുമ്പോൾ വളരെ കുറവാണെന്ന് സിറ്റി വാട്ടർ യൂട്ടിലിറ്റിയുടെ കണക്കുകൾ വ്യക്തമാക്കുന്നു.

ജല ഉപഭോഗം കുറവാണെങ്കിലും ഡാറ്റാ സെന്ററിനായുള്ള ഊർജ്ജ ഉൽപ്പാദനം വലിയ തോതിലുള്ള വായുമലിനീകരണത്തിന് കാരണമാകുമെന്ന് റിപ്പോർട്ടുകൾ സൂചിപ്പിക്കുന്നു. പദ്ധതിക്കാവശ്യമായ 390 മെഗാവാട്ട് വൈദ്യുതിയിൽ ഒരു ഭാഗം ഉൽപ്പാദിപ്പിക്കാനായി നിർമ്മിക്കുന്ന പ്രകൃതിവാതക പ്ലാന്റ് പ്രതിവർഷം 7,55,187 ടൺ ഹരിതഗൃഹ വാതകങ്ങൾ പുറന്തള്ളുമെന്ന് കണക്കാക്കപ്പെടുന്നു.

ഇതോടെ ന്യൂ ബ്രൺസ്‌വിക് പ്രവിശ്യയിലെ ഏറ്റവും വലിയ മൂന്നാമത്തെ വായുമലിനീകരണ സ്രോതസ്സായി ഈ പ്ലാന്റ് മാറും. ഡാറ്റാ സെന്ററുകൾ വലിയ തോതിൽ വൈദ്യുതി ഉപയോഗിക്കുന്നത് നിലവിലുള്ള വിതരണ ശൃംഖലയ്ക്ക് സമ്മർദ്ദമുണ്ടാക്കുമെന്നും പുനരുപയോഗ ഊർജ്ജം ഉപയോഗിച്ചില്ലെങ്കിൽ കാലാവസ്ഥാ ലക്ഷ്യങ്ങൾ കൈവരിക്കാൻ പ്രവിശ്യയ്ക്ക് ബുദ്ധിമുട്ടാകുമെന്നും ഗ്രീൻ പാർട്ടി നേതാവ് ഡേവിഡ് കൂൺ പറഞ്ഞു.

ലോർനെവിൽ ഇൻഡസ്ട്രിയൽ പാർക്കിലെ 120 ഹെക്ടർ ഭൂമിയിലാണ് പദ്ധതി വിഭാവനം ചെയ്തിരിക്കുന്നത്. എന്നാൽ വൻതോതിൽ തണ്ണീർത്തടങ്ങളും വനങ്ങളും നശിപ്പിച്ചു കൊണ്ടുള്ള വികസനത്തിനെതിരെ പ്രദേശവാസികൾ ശക്തമായ പ്രതിഷേധത്തിലാണ്. ജനവാസ കേന്ദ്രങ്ങൾക്കും കിണറുകൾക്കും സമീപം ഇത്തരം കൂറ്റൻ ഡാറ്റാ സെന്ററുകളും ഗ്യാസ് പ്ലാന്റുകളും സ്ഥാപിക്കുന്നത് അനുചിതമാണെന്ന് സേവ് ലോർനെവിൽ ഗ്രൂപ്പ് ചൂണ്ടിക്കാട്ടി.

നഗരത്തിന്റെ വരുമാനം വർദ്ധിപ്പിക്കാൻ പുതിയ ബിസിനസ്സ് സംരംഭങ്ങൾ ആവശ്യമാണെങ്കിലും പരിസ്ഥിതി നാശം അനുവദിക്കില്ലെന്ന് സെന്റ് ജോൺ മേയർ ഡോണ റിയർഡൻ അറിയിച്ചു. പരിസ്ഥിതി ആഘാത പഠനത്തിന്റെ അടിസ്ഥാനത്തിൽ പ്രവിശ്യാ ഗവൺമെന്റ് സ്വീകരിക്കുന്ന തീരുമാനങ്ങൾ നിർണ്ണായകമാകും. അനുമതി ലഭിച്ചാൽ ഈ വർഷം തന്നെ നിർമ്മാണം ആരംഭിച്ച് 2028-ഓടെ പ്രവർത്തനം തുടങ്ങാനാണ് കമ്പനികളുടെ ലക്ഷ്യം.

St. John Data Center: Companies say it won’t affect city’s water supply; Concerns over air pollution

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt