റീജിന: സസ്കാച്ചെവാനിൽ മഞ്ഞുരുകി ജലനിരപ്പ് ഉയരാൻ സാധ്യതയുള്ളതിനാൽ അതീവ ജാഗ്രതാ നിർദ്ദേശം പുറപ്പെടുവിച്ചു. സസ്കാച്ചെവൻ വാട്ടർ സെക്യൂരിറ്റി ഏജൻസി (WSA) വെള്ളിയാഴ്ചയാണ് ഇതുസംബന്ധിച്ച ‘ഹൈ ഫ്ലോ അഡ്വൈസറി’ പ്രഖ്യാപിച്ചത്. വരുംദിവസങ്ങളിൽ അനുഭവപ്പെടുന്ന ചൂട് കൂടിയ കാലാവസ്ഥയിൽ പ്രദേശത്തെ മഞ്ഞ് പാളികൾ അതിവേഗം ഉരുകുന്നത് ജലാശയങ്ങളിലെ ജലനിരപ്പ് അപകടകരമായ രീതിയിൽ ഉയരാൻ കാരണമാകുമെന്നാണ് റിപ്പോർട്ട്.
വടക്കുപടിഞ്ഞാറൻ മേഖലയിലെ ബഫല്ലോ നാരോസ് (Buffalo Narrows) മുതൽ തെക്കുകിഴക്കൻ പ്രദേശമായ യോർക്ക്ടൺ (Yorkton) വരെയുള്ള വലിയൊരു പ്രദേശത്തെ ഈ മുന്നറിയിപ്പ് ബാധിക്കും. ലോയ്ഡ്മിൻസ്റ്റർ, മെഡോ ലേക്ക്, ലാ റോഞ്ച്, പ്രിൻസ് ആൽബർട്ട്, ബാറ്റിൽഫോർഡ്സ്, വാട്രസ്, മെൽഫോർട്ട്, നിപാവിൻ, ടിസ്ഡേൽ, ഹഡ്സൺ ബേ, യോർക്ക്ടൺ എന്നീ കമ്മ്യൂണിറ്റികളിൽ പ്രത്യേക നിരീക്ഷണം ഏർപ്പെടുത്തിയിട്ടുണ്ട്.
പരിസ്ഥിതി കാനഡയുടെ (Environment Canada) കണക്കുകൾ പ്രകാരം, ചൊവ്വാഴ്ചയോടെ യോർക്ക്ടൺ ഉൾപ്പെടെയുള്ള മേഖലകളിൽ പകൽ സമയത്തെ താപനില 17 ഡിഗ്രി സെൽഷ്യസ് വരെ ഉയർന്നേക്കാം. അപ്രതീക്ഷിതമായ ഈ കാലാവസ്ഥാ വ്യതിയാനം മഞ്ഞുരുകലിന്റെ വേഗത വർദ്ധിപ്പിക്കും. മുൻകൂട്ടി നിശ്ചയിച്ചതിലും ഉയർന്ന അളവിൽ പുഴകളിലും തോടുകളിലും വെള്ളം കുതിച്ചെത്താൻ ഇത് കാരണമാകും. ഇതോടെ താഴ്ന്ന പ്രദേശങ്ങളിൽ വെള്ളം കയറാനും (Overland flooding) ജലാശയങ്ങളിൽ ഐസ് കട്ടകൾ അടിഞ്ഞുകൂടി ഒഴുക്ക് തടസ്സപ്പെടാനും (Ice jamming) സാധ്യതയുണ്ട്.
നദികൾക്കും മറ്റ് ജലാശയങ്ങൾക്കും സമീപം താമസിക്കുന്നവർക്കും ഇതുവഴി യാത്ര ചെയ്യുന്നവർക്കും അധികൃതർ കർശന നിർദ്ദേശങ്ങൾ നൽകി. മുന്നറിയിപ്പില്ലാതെ തന്നെ ജലനിരപ്പിൽ പെട്ടെന്ന് മാറ്റമുണ്ടാകാൻ സാധ്യതയുള്ളതിനാൽ ജലാശയങ്ങൾക്കരികിൽ പോകുമ്പോൾ അതീവ ശ്രദ്ധ പുലർത്തണം. നിലവിലെ സാഹചര്യം വാട്ടർ സെക്യൂരിറ്റി ഏജൻസി സൂക്ഷ്മമായി നിരീക്ഷിച്ചു വരികയാണ്. പ്രാദേശിക ഭരണകൂടങ്ങളോടും മുൻകരുതൽ നടപടികൾ സ്വീകരിക്കാൻ നിർദ്ദേശിച്ചിട്ടുണ്ട്.
Flooding risk due to melting snow: High alert issued in Saskatchewan; Rising temperatures pose threat
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
