ഒട്ടാവ : കാനഡ ഭാവിയിൽ യൂറോപ്യൻ യൂണിയന്റെ (ഇയു) ഭാഗമാകാൻ സാധ്യതയുണ്ടെന്ന് ഫിൻലൻഡ് പ്രസിഡന്റ് അലക്സാണ്ടർ സ്റ്റബ്ബ് വ്യക്തമാക്കി. കനേഡിയൻ പ്രധാനമന്ത്രി മാർക്ക് കാർണിയുമായി ഒട്ടാവയിൽ നടത്തിയ ഔദ്യോഗിക കൂടിക്കാഴ്ചയ്ക്ക് ശേഷമാണ് അദ്ദേഹം ഇക്കാര്യം അറിയിച്ചത്. കാനഡയുടെ മൂല്യങ്ങളും ഘടനയും യൂറോപ്യൻ യൂണിയനോട് ചേർന്നുനിൽക്കുന്നതാണെന്നും ഇരുപക്ഷവും തമ്മിൽ ശക്തമായ തന്ത്രപരമായ പങ്കാളിത്തം അനിവാര്യമാണെന്നും അദ്ദേഹം കൂട്ടിച്ചേർത്തു.
വ്യാപാരം, ആർട്ടിക് പ്രതിരോധം എന്നീ മേഖലകളിൽ ഉഭയകക്ഷി ബന്ധം മെച്ചപ്പെടുത്തുന്നതിനാണ് ഇരുനേതാക്കളും മുൻഗണന നൽകുന്നത്. രാജ്യാന്തര സുരക്ഷ ഉറപ്പാക്കുന്നതിനും സാമ്പത്തിക അഭിവൃദ്ധിക്കുമായി പങ്കാളിത്തം ആഴത്തിലാക്കാൻ ആഗ്രഹിക്കുന്നതായി പ്രധാനമന്ത്രി മാർക്ക് കാർണി പ്രസ്താവനയിൽ അറിയിച്ചു. അമേരിക്കയുമായുള്ള വ്യാപാര ബന്ധങ്ങളിൽ ട്രംപ് ഭരണകൂടം ഏർപ്പെടുത്തിയ നിയന്ത്രണങ്ങളെത്തുടർന്ന് ഇന്ത്യ, ചൈന, നോർഡിക് രാജ്യങ്ങൾ എന്നിവരുമായി ചേർന്ന് വ്യാപാര മേഖല വൈവിധ്യവൽക്കരിക്കാനുള്ള ശ്രമത്തിലാണ് കാനഡ.
സുരക്ഷാ കാര്യങ്ങളിൽ അമേരിക്കയുമായുള്ള ബന്ധം നിലനിർത്തേണ്ടത് അത്യാവശ്യമാണെന്ന് സ്റ്റബ്ബ് ചൂണ്ടിക്കാട്ടി. ആർട്ടിക് സുരക്ഷ ശക്തമാക്കുന്നതിനായി ഐസ് ബ്രേക്കർ കപ്പലുകൾ നിർമ്മിക്കുന്നതിനായുള്ള കാനഡ, ഫിൻലൻഡ്, യുഎസ് ത്രിരാഷ്ട്ര കരാറിനെക്കുറിച്ചും (ഐസ് ബ്രേക്കർ കൊളാബറേഷൻ എഫർട്ട്) നേതാക്കൾ ചർച്ച ചെയ്തു. കാലാവസ്ഥാ വ്യതിയാനം പോലുള്ള വിഷയങ്ങളിൽ വിയോജിപ്പുകൾ നിലനിൽക്കുമ്പോഴും പ്രതിരോധ മേഖലയിൽ സഹകരണം തുടരുന്നത് പരസ്പര താൽപ്പര്യമാണെന്നും അദ്ദേഹം വിലയിരുത്തി.
ഒട്ടാവയിലെത്തിയ ഫിൻലൻഡ് പ്രസിഡന്റ് പ്രധാനമന്ത്രി കാർണിക്കൊപ്പം ഒട്ടാവ ചാർജ് ടീമിന്റെ ഐസ് ഹോക്കി പരിശീലനത്തിലും പങ്കെടുത്തു. ആഗോള ക്രമം മാറിക്കൊണ്ടിരിക്കുകയാണെന്ന കാര്യത്തിൽ ഇരുനേതാക്കളും യോജിപ്പ് പ്രകടിപ്പിച്ചു. വിവരങ്ങൾ പരസ്പരം കൈമാറുന്നതിനായി താനും മാർക്ക് കാർണിയും നിരന്തരം സന്ദേശങ്ങൾ അയക്കാറുണ്ടെന്നും അടുത്ത വ്യക്തിബന്ധം പുലർത്തുന്നുണ്ടെന്നും സ്റ്റബ്ബ് വെളിപ്പെടുത്തി.
Canada may also get a place in the European Union; Finnish President meets Mark Carney
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
