മോങ്ക്ടൺ : അറ്റ്ലാന്റിക് കാനഡയിലെ ഏക ആണവനിലയമായ പോയിന്റ് ലെപ്രു ജനറേറ്റിംഗ് സ്റ്റേഷനിൽ മുൻകൂട്ടി നിശ്ചയിച്ച അറ്റകുറ്റപ്പണികൾക്കായി പ്രവർത്തനം നിർത്തിവെച്ചു. ഏപ്രിൽ 10-ന് ആരംഭിച്ച ഈ പ്രക്രിയ ഓഗസ്റ്റ് വരെ നീണ്ടുനിൽക്കുമെന്നും ഏകദേശം 119 ദിവസങ്ങൾ വേണ്ടി വരുമെന്നും എൻബി പവർ പ്രസ്താവനയിലൂടെ അറിയിച്ചു. നിലയം പ്രവർത്തനസജ്ജമായിരിക്കുമ്പോൾ പരിശോധിക്കാൻ സാധിക്കാത്ത ഉപകരണങ്ങളുടെ അറ്റകുറ്റപ്പണികൾക്കും സുരക്ഷാ മാനദണ്ഡങ്ങൾ ഉറപ്പാക്കുന്നതിനും ഇത്തരം താൽക്കാലിക സ്റ്റോപ്പേജുകൾ അത്യാവശ്യമാണെന്ന് അധികൃതർ വ്യക്തമാക്കി.
പരിശോധനകൾ, പമ്പ്-മോട്ടോർ അറ്റകുറ്റപ്പണികൾ, ഇലക്ട്രിക്കൽ സിസ്റ്റം പരിശോധനകൾ തുടങ്ങി ഇരുപതിനായിരത്തോളം ജോലികളാണ് ഈ കാലയളവിൽ പൂർത്തിയാക്കാൻ ലക്ഷ്യമിടുന്നത്. കൂടാതെ, ഭാവിയിൽ ഐസോടോപ്പ് ഉൽപ്പാദനത്തിനുള്ള സാധ്യതകൾ മുൻനിർത്തിയുള്ള പ്രാരംഭ നടപടികളും ഈ സമയത്ത് നടക്കും. ഒന്റാറിയോയ്ക്ക് പുറത്ത് കാനഡയിൽ ഐസോടോപ്പുകൾ നിർമ്മിക്കാൻ ശേഷിയുള്ള ഏക കേന്ദ്രമാണ് പോയിന്റ് ലെപ്രുവെന്ന് എൻബി പവർ ചൂണ്ടിക്കാട്ടി. അറ്റകുറ്റപ്പണികൾക്കായി നീക്കിവെച്ച തുകയെക്കുറിച്ചുള്ള ചോദ്യത്തിന്, വാർഷിക സാമ്പത്തിക റിപ്പോർട്ടിൽ ഇത് വ്യക്തമാക്കുമെന്നായിരുന്നു അധികൃതരുടെ മറുപടി.
ഒന്റാറിയോ പവർ ജനറേഷന്റെ സബ്സിഡിയറിയായ ലോറന്റിസ് എനർജി പാർട്ണേഴ്സുമായുള്ള മൂന്ന് വർഷത്തെ കരാർ ഏപ്രിൽ ഒന്നിന് നിലവിൽ വന്നിരുന്നു. ഈ കരാർ പ്രകാരം പ്ലാന്റിന്റെ മേൽനോട്ട ചുമതല ലോറന്റിസ് ഉദ്യോഗസ്ഥർക്കായിരിക്കും. 2029-ഓടെ നിലയത്തിന്റെ പ്രവർത്തനശേഷി 90 ശതമാനത്തിലേക്ക് ഉയർത്തുകയാണ് ഈ പങ്കാളിത്തത്തിന്റെ ലക്ഷ്യം. 2024-25 സാമ്പത്തിക വർഷത്തിൽ ഷെഡ്യൂൾ ചെയ്തതും അല്ലാത്തതുമായ തടസ്സങ്ങൾ കാരണം പ്ലാന്റ് 27 ശതമാനം സമയം മാത്രമാണ് പ്രവർത്തിച്ചിരുന്നത്.
Point Leprue nuclear power plant to remain closed until August; NB Power says repairs have begun
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
