വാക്‌സിൻ എടുക്കാത്തതിന് ശമ്പളം നിഷേധിച്ചു; എയർ കാനഡയ്ക്ക് തിരിച്ചടി, പൈലറ്റുമാർക്ക് അനുകൂല വിധി

ഒട്ടാവ: കോവിഡ് കാലത്തെ വാക്‌സിൻ നയവുമായി ബന്ധപ്പെട്ട് പൈലറ്റുമാർക്കെതിരെ സ്വീകരിച്ച നടപടിയിൽ എയർ കാനഡയ്ക്ക് തിരിച്ചടി. മതപരമായ കാരണങ്ങളാൽ വാക്‌സിൻ എടുക്കാൻ വിസമ്മതിച്ച ഏഴ് പൈലറ്റുമാർക്ക് കുടിശ്ശികയുള്ള ശമ്പളം നൽകാൻ ആർബിട്രേറ്റർ ഉത്തരവിട്ടു. കമ്പനിയുടെ നിർബന്ധിത വാക്‌സിനേഷൻ പോളിസിയിൽ ഇളവ് തേടിയ പൈലറ്റുമാരുടെ അപേക്ഷ തള്ളുകയും അവരെ ശമ്പളമില്ലാത്ത അവധിയിൽ പ്രവേശിക്കാൻ നിർബന്ധിക്കുകയും ചെയ്ത നടപടി നിയമവിരുദ്ധമാണെന്ന് കണ്ടെത്തിയതിനെത്തുടർന്നാണ് വിധി.

കോവിഡ് വ്യാപനം രൂക്ഷമായ കാലഘട്ടത്തിൽ വിമാനക്കമ്പനികൾ കർശനമായ ആരോഗ്യ പ്രോട്ടോക്കോളുകൾ നടപ്പിലാക്കിയിരുന്നു. ഇതിന്റെ ഭാഗമായി ജീവനക്കാർ വാക്‌സിൻ എടുക്കണമെന്ന് എയർ കാനഡ നിർദ്ദേശിച്ചു. എന്നാൽ ക്രിസ്ത്യൻ വിശ്വാസികളായ ഏഴ് പൈലറ്റുമാർ തങ്ങളുടെ മതപരമായ വിശ്വാസങ്ങൾ ചൂണ്ടിക്കാട്ടി ഇതിൽ നിന്ന് ഇളവ് തേടുകയായിരുന്നു. ഇവർ സമർപ്പിച്ച അപേക്ഷകൾ “ആത്മാർത്ഥമായ മതവിശ്വാസത്തിന്റെ” പരിധിയിൽ വരുന്നതല്ലെന്ന് വിലയിരുത്തി എയർ കാനഡ നിഷേധിച്ചു. ഇതേത്തുടർന്ന് മാസങ്ങളോളം ഇവർക്ക് ജോലിയിൽ നിന്നും ശമ്പളത്തിൽ നിന്നും വിട്ടുനിൽക്കേണ്ടി വന്നു.

വാക്‌സിൻ വിമുഖതയ്ക്ക് മതപരമായ കാരണങ്ങൾ വ്യക്തമാക്കുന്നതിന് മതപുരോഹിതന്റെ കത്ത് വേണമെന്നായിരുന്നു എയർ കാനഡയുടെ കർശന നിലപാട്. എന്നാൽ ഇത്തരം രേഖകൾ സമർപ്പിക്കാത്തതിന്റെ പേരിൽ ഇളവ് നിഷേധിക്കാനാവില്ലെന്ന് ആർബിട്രേറ്റർ ജെയിംസ് ഹെയ്‌സ് നിരീക്ഷിച്ചു. അതോറിറ്റികളിൽ നിന്നുള്ള കത്തുകളേക്കാൾ വ്യക്തികളുടെ ആത്മാർത്ഥമായ മതബോധത്തിനാണ് മുൻഗണന നൽകേണ്ടതെന്നും, പൈലറ്റുമാരുടെ മൗലികാവകാശങ്ങൾ ലംഘിക്കപ്പെട്ടുവെന്നും ഉത്തരവിൽ പറയുന്നു. കനേഡിയൻ ഹ്യൂമൻ റൈറ്റ്‌സ് ആക്ടിന്റെ ലംഘനമാണ് വിമാനക്കമ്പനിയുടെ ഭാഗത്തുനിന്ന് ഉണ്ടായതെന്നും അദ്ദേഹം വ്യക്തമാക്കി.

2021 ഒക്ടോബർ അവസാനം മുതൽ 2022 മെയ് ആദ്യം വരെയുള്ള കാലയളവിലെ ശമ്പളമാണ് പൈലറ്റുമാർക്ക് നൽകേണ്ടത്. ഇളവ് ലഭിച്ച മറ്റ് പൈലറ്റുമാർക്ക് ആറുമാസത്തോളം ശമ്പളത്തോടെയുള്ള അവധി അനുവദിച്ചപ്പോൾ, ഈ ഏഴ് പൈലറ്റുമാർക്ക് അത് നിഷേധിച്ചത് വിവേചനമാണെന്നും കോടതി വിലയിരുത്തി. യാത്രാവിലക്കുകളും കർശന നിയന്ത്രണങ്ങളും മൂലം വ്യോമയാന മേഖല പ്രതിസന്ധിയിലായിരുന്ന സമയത്ത് നടന്ന ഈ നിയമപോരാട്ടം വലിയ പ്രാധാന്യത്തോടെയാണ് കാനഡയിലെ തൊഴിൽ മേഖല നോക്കിക്കാണുന്നത്. സമാനമായ രീതിയിൽ ഇളവ് തേടിയ മറ്റ് ജീവനക്കാർക്കും ഈ ഉത്തരവ് വരുംദിവസങ്ങളിൽ ആശ്വാസമായേക്കും.

Air Canada suffers setback after pilots denied pay for not getting vaccinated

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt