ഒട്ടാവ: കാനഡയിൽ നടന്ന നിർണ്ണായകമായ മൂന്ന് ഫെഡറൽ ഉപതിരഞ്ഞെടുപ്പുകളിലും വിജയിച്ച് പ്രധാനമന്ത്രി മാർക്ക് കാർണിയുടെ നേതൃത്വത്തിലുള്ള ലിബറൽ പാർട്ടി കേവല ഭൂരിപക്ഷം ഉറപ്പാക്കി. ടൊറന്റോയിലെ യൂണിവേഴ്സിറ്റി-റോസ്ഡെയ്ൽ (University-Rosedale) മണ്ഡലത്തിൽ ഡാനിയൽ മാർട്ടിൻ വിജയിച്ചതോടെയാണ് ഹൗസ് ഓഫ് കോമൺസിൽ ഭൂരിപക്ഷത്തിന് ആവശ്യമായ 172 സീറ്റുകൾ എന്ന ലക്ഷ്യം ഭരണകക്ഷി കൈവരിച്ചത്. കഴിഞ്ഞ ഏപ്രിലിലെ പൊതുതിരഞ്ഞെടുപ്പിൽ 169 സീറ്റുകൾ നേടി ന്യൂനപക്ഷ സർക്കാരായി അധികാരമേറ്റ ലിബറലുകൾ, അഞ്ച് പ്രതിപക്ഷ എംപിമാരുടെ കൂറുമാറ്റത്തിന് പിന്നാലെ ഈ തിരഞ്ഞെടുപ്പ് വിജയത്തോടെ അധികാരം കൂടുതൽ സുരക്ഷിതമാക്കി.
യൂണിവേഴ്സിറ്റി-റോസ്ഡെയ്ലിന് പിന്നാലെ സ്കാർബറോ സൗത്ത് വെസ്റ്റ് (Scarborough Southwest), ടെറെബോൺ (Terrebonne) മണ്ഡലങ്ങളിലും ലിബറൽ സ്ഥാനാർത്ഥികൾ വിജയിച്ചു. സ്കാർബറോ സൗത്ത് വെസ്റ്റിൽ ഒന്റാറിയോ എൻഡിപി മുൻ ഡെപ്യൂട്ടി ലീഡർ ഡോളി ബീഗവും ക്യുബെക്കിലെ ടെറെബോണിൽ തത്യാന അഗസ്റ്റും വിജയിച്ചതോടെ ലിബറൽ പാർട്ടിയുടെ ആകെ സീറ്റുകളുടെ എണ്ണം 174 ആയി ഉയർന്നു. ടെറെബോണിൽ 48.4 ശതമാനം വോട്ടുകൾ നേടിയ തത്യാന അഗസ്റ്റ്, ബ്ലോക്ക് ക്യുബെക്കോയിസ് സ്ഥാനാർത്ഥി നതാലി സിൻക്ലെയറിനെയാണ് (46.8%) പരാജയപ്പെടുത്തിയത്. ഇവിടെ കൺസർവേറ്റീവ് സ്ഥാനാർത്ഥി അഡ്രിയാൻ ചാർളിന് 3.3 ശതമാനം വോട്ടുകൾ മാത്രമാണ് ലഭിച്ചത്.
ഭൂരിപക്ഷം ലഭിച്ചെങ്കിലും ആഘോഷങ്ങൾക്കായി സമയം മാറ്റിവെക്കാതെ ഭരണപരമായ കാര്യങ്ങളിലേക്ക് മടങ്ങാനാണ് പ്രധാനമന്ത്രിയുടെ തീരുമാനമെന്ന് അദ്ദേഹത്തിന്റെ ഓഫീസ് വ്യക്തമാക്കി. ജീവിതച്ചെലവ് കുറയ്ക്കുന്നതിനുള്ള പുതിയ നടപടികൾ ചൊവ്വാഴ്ച പ്രഖ്യാപിക്കുമെന്ന് അധികൃതർ അറിയിച്ചു. ഫിന്നിഷ് പ്രസിഡന്റ് അലക്സാണ്ടർ സ്റ്റബ്ബിന്റെ സന്ദർശനവുമായി ബന്ധപ്പെട്ട ഔദ്യോഗിക ചടങ്ങുകളിലും പ്രധാനമന്ത്രി പങ്കെടുക്കും. ജസ്റ്റിൻ ട്രൂഡോയുടെ നേതൃത്വത്തിൽ 2015-ൽ ഭൂരിപക്ഷം നേടിയ ശേഷം ഇതാദ്യമായാണ് ലിബറൽ പാർട്ടി ഹൗസ് ഓഫ് കോമൺസിൽ ഈ നില കൈവരിക്കുന്നത്.
അതേസമയം, ലിബറൽ പാർട്ടിയുടെ ഭൂരിപക്ഷത്തെ വിമർശിച്ച് കൺസർവേറ്റീവ് നേതാവ് പിയറി പൊയിലീവർ രംഗത്തെത്തി. ജനവിധിയെ മാനിക്കാതെ രാഷ്ട്രീയ കച്ചവടങ്ങളിലൂടെയും കൂറുമാറ്റങ്ങളിലൂടെയുമാണ് മാർക്ക് കാർണി ഭൂരിപക്ഷം നിർമ്മിച്ചതെന്ന് അദ്ദേഹം കുറ്റപ്പെടുത്തി. വോട്ടർമാരെ വഞ്ചിച്ച രാഷ്ട്രീയക്കാരുമായി ചേർന്ന് അണിയറയിൽ നടത്തിയ നീക്കങ്ങളുടെ ഫലമാണിതെന്നും അദ്ദേഹം പ്രസ്താവനയിൽ ആരോപിച്ചു. ഭരണകക്ഷിയായ ലിബറലുകൾക്ക് നിലവിൽ 174 സീറ്റുകളുള്ളപ്പോൾ കൺസർവേറ്റീവുകൾക്ക് 140 സീറ്റുകളും ബ്ലോക്ക് ക്യുബെക്കോയിസിന് 22 സീറ്റുകളുമാണുള്ളത്.
കൂറുമാറിയ അഞ്ച് എംപിമാരുടെ പിന്തുണയോടെ നേരത്തെ തന്നെ ഭൂരിപക്ഷത്തിന് അടുത്തെത്തിയ ലിബറലുകൾക്ക് ഈ ഉപതിരഞ്ഞെടുപ്പ് ഫലങ്ങൾ കൂടുതൽ കരുത്തുനൽകി. സ്പീക്കർ ഫ്രാൻസിസ് സ്കാർപലേജിയ ലിബറൽ നിരയിലാണെങ്കിലും വോട്ടെടുപ്പിൽ തുല്യത വരുന്ന സാഹചര്യത്തിൽ മാത്രമേ വോട്ട് രേഖപ്പെടുത്താറുള്ളൂ. ഈ സാഹചര്യത്തിൽ സഭയിൽ സുഗമമായ ഭരണത്തിന് കൂടുതൽ സീറ്റുകൾ ആവശ്യമായിരുന്നു. പ്രതിപക്ഷ നിരയിൽ നിന്ന് കൂടുതൽ എംപിമാർ ഭരണകക്ഷിയുമായി സഹകരിക്കാൻ സാധ്യതയുണ്ടെന്ന റിപ്പോർട്ടുകൾക്കിടയിലാണ് പുതിയ രാഷ്ട്രീയ നീക്കങ്ങൾ നടക്കുന്നത്.
Liberal wave in Canada: ‘Clean sweep’ in by-elections; Carney government secures power with absolute majority
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
