റെജീന: പ്രവിശ്യയിലെ കുടുംബങ്ങളുടെ സാമ്പത്തിക ഭദ്രത ഉറപ്പുവരുത്തുന്നതിനായി പുതിയ വരുമാന നികുതി ഇളവുകൾ പ്രഖ്യാപിച്ച് സസ്കച്ചെവാൻ സർക്കാർ. 2026-27 പ്രവിശ്യാ ബജറ്റിന്റെ ഭാഗമായി അവതരിപ്പിച്ച ‘സസ്കച്ചെവാൻ അഫോർഡബിലിറ്റി ആക്ട്’ (Saskatchewan Affordability Act) പ്രകാരമാണ് നികുതി ഘടനയിൽ നിർണായക മാറ്റങ്ങൾ വരുത്തിയിരിക്കുന്നത്. ജീവിതച്ചെലവ് വർധിക്കുന്ന സാഹചര്യത്തിൽ സാധാരണക്കാരായ നിവാസികൾക്ക് നേരിട്ട് സാമ്പത്തിക നേട്ടം ഉറപ്പാക്കുകയാണ് ഈ പദ്ധതിയുടെ ലക്ഷ്യം.
പുതിയ നിയമപ്രകാരം വ്യക്തികൾക്കും കുടുംബങ്ങൾക്കും നൽകുന്ന നികുതി ഇളവുകളിൽ 500 ഡോളറിന്റെ വർധനവ് വരുത്തിയിട്ടുണ്ട്. ഇതോടെ 65,000 ഡോളർ വരെ വരുമാനമുള്ളവർ പ്രവിശ്യാ നികുതി അടയ്ക്കേണ്ടതില്ല എന്നത് വലിയ ആശ്വാസമാകും. ഒരു ലക്ഷം ഡോളർ വരുമാനമുള്ളവർക്ക് ഏകദേശം 4,500 ഡോളർ വരെ നികുതി ലാഭിക്കാൻ സാധിക്കും. കൂടാതെ, കുറഞ്ഞ വരുമാനമുള്ള മൂന്ന് ലക്ഷത്തോളം കുടുംബങ്ങൾക്ക് ഓരോ മൂന്ന് മാസം കൂടുമ്പോഴും പ്രത്യേക സാമ്പത്തിക സഹായം നേരിട്ട് ലഭിക്കുമെന്നും സർക്കാർ അറിയിച്ചു.
സന്നദ്ധ സേവന മേഖലയിലുള്ളവർക്കും ബജറ്റിൽ പ്രത്യേക പരിഗണന നൽകിയിട്ടുണ്ട്. വോളണ്ടിയർ ഫസ്റ്റ് റെസ്പോണ്ടേഴ്സിനുള്ള ടാക്സ് ക്രെഡിറ്റ് 3,000 ഡോളറിൽ നിന്നും 6,000 ഡോളറായി ഉയർത്തി. അഗ്നിശമന സേനാംഗങ്ങൾ, അടിയന്തര രക്ഷാപ്രവർത്തകർ എന്നിവരടങ്ങുന്ന സന്നദ്ധ പ്രവർത്തകർക്ക് ഇത് വലിയ സഹായമാകും. വിലക്കയറ്റത്തിന്റെ ആഘാതം കുറയ്ക്കുന്നതിനായുള്ള വാർഷിക ഇൻഡക്സേഷൻ ക്രമീകരണങ്ങൾ കൂടി ചേരുന്നതോടെ, ഈ വർഷം മാത്രം പ്രവിശ്യയിലെ ജനങ്ങൾക്ക് ഏകദേശം 200 മില്യൺ ഡോളറിന്റെ നികുതി ലാഭമുണ്ടാകുമെന്നാണ് വിലയിരുത്തപ്പെടുന്നത്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Affordability Act 2026: Saskatchewan government to reform tax structure
