സാസ്കാറ്റൂൺ: സാമ്പത്തിക പ്രതിസന്ധി രൂക്ഷമായതിനെത്തുടർന്ന് കാനഡയിലെ പ്രമുഖ സന്നദ്ധ സംഘടനയായ പ്രേരി ഹാം റിഡക്ഷൻ (PHR) എല്ലാ പ്രവർത്തനങ്ങളും അവസാനിപ്പിച്ചു. സംഘടനയുടെ കീഴിലുള്ള സൂപ്പർവൈസ്ഡ് കൺസംപ്ഷൻ സൈറ്റ്, ഡ്രോപ്പ്-ഇൻ സെന്ററുകൾ, രണ്ട് യൂത്ത് ഹോമുകൾ എന്നിവയുൾപ്പെടെയുള്ള സേവനങ്ങൾ വൈകുന്നേരം 5 മണിയോടെ പൂർണ്ണമായും നിർത്തലാക്കിയതായി ഭരണസമിതി അറിയിച്ചു.
കഴിഞ്ഞ മാസം കണ്ടെത്തിയ സാമ്പത്തിക ക്രമക്കേടുകളെത്തുടർന്ന് എക്സിക്യൂട്ടീവ് ഡയറക്ടർ കെയ്ല ഡിമോംഗിനെ സ്ഥാനത്തുനിന്ന് നീക്കിയിരുന്നു. എന്നാൽ, പ്രതീക്ഷിച്ചതിലും വലിയ സാമ്പത്തിക ബാധ്യതയാണ് സംഘടന നേരിടുന്നതെന്ന് തുടർന്നുണ്ടായ പരിശോധനയിൽ വ്യക്തമായി.
കൃത്യമായ തുക ഭരണസമിതി വെളിപ്പെടുത്തിയിട്ടില്ലെങ്കിലും ലക്ഷക്കണക്കിന് ഡോളറിന്റെ കമ്മി ഉണ്ടെന്നാണ് സൂചന. സാമ്പത്തിക ഓഡിറ്റ് നടത്താൻ പോലും നിലവിൽ സംഘടനയുടെ പക്കൽ ഫണ്ടില്ലാത്ത അവസ്ഥയാണെന്ന് ഔദ്യോഗിക പ്രസ്താവനയിൽ പറയുന്നു. ഏകദേശം 70 ഓളം ജീവനക്കാരാണ് പ്രേരി ഹാം റിഡക്ഷനിൽ ജോലി ചെയ്തിരുന്നത്. ലഹരി ഉപയോഗിക്കുന്നവർക്ക് സുരക്ഷിതമായ വൈദ്യസഹായം നൽകുന്നതിനൊപ്പം, ഭവനരഹിതർക്കുള്ള പിന്തുണയും യുവാക്കൾക്കായുള്ള പുനരധിവാസ പ്രവർത്തനങ്ങളും സംഘടന നടത്തിവന്നിരുന്നു.
സാസ്കാറ്റൂണിൽ ഭവനരഹിതരുടെ എണ്ണം വർധിച്ചുവരുന്ന സാഹചര്യത്തിൽ സംഘടനയുടെ അടച്ചുപൂട്ടൽ വലിയ പ്രതിസന്ധിക്ക് കാരണമാകും. നിലവിൽ വിവിധ സേവനങ്ങൾക്കായി സംഘടനയെ ആശ്രയിച്ചിരുന്നവരോട് ഭരണസമിതി ക്ഷമാപണം നടത്തി. അതേസമയം, സംഘടനയുടെ കീഴിലുള്ള യൂത്ത് ഹോമുകളിലെ കുട്ടികളുടെ സുരക്ഷ ഉറപ്പാക്കുമെന്ന് മിനിസ്ട്രി ഓഫ് സോഷ്യൽ സർവീസസ് അറിയിച്ചു.
ഇവരെ മറ്റ് കെയർ ഹോമുകളിലേക്ക് മാറ്റാനുള്ള നടപടികൾ ആരംഭിച്ചു. മയക്കുമരുന്ന് മരണങ്ങളും ഭവനരഹിതരുടെ പ്രശ്നങ്ങളും രൂക്ഷമായിരിക്കുന്ന സാഹചര്യത്തിൽ ഇത്തരം സേവനങ്ങൾ നിർത്തലാക്കുന്നത് പ്രവിശ്യയെ ദോഷകരമായി ബാധിക്കുമെന്ന് പ്രതിപക്ഷം ആരോപിച്ചു. ലഹരി വിമുക്ത പ്രവർത്തനങ്ങൾക്കായി സർക്കാർ ബദൽ സംവിധാനങ്ങൾ ഒരുക്കണമെന്ന ആവശ്യവും ശക്തമാണ്.
Economic crisis: Prairie Ham Reduction closes operations; hundreds of people in crisis
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
