മിറാമിച്ചി: മിറാമിച്ചിയിലെ പ്രധാന യാത്രാമാർഗ്ഗമായ സെന്റനിയൽ പാലം വൻതോതിലുള്ള നവീകരണ പ്രവർത്തനങ്ങൾക്കായി അടച്ചു. തിങ്കളാഴ്ച(ഏപ്രിൽ 06) മുതൽ ആരംഭിച്ച ഈ നിയന്ത്രണം ഡിസംബർ ഒന്നു വരെ തുടരുമെന്ന് അധികൃതർ അറിയിച്ചു. പാലത്തിന്റെ പുനരുദ്ധാരണ പദ്ധതിയുടെ എട്ടാം ഘട്ട പ്രവർത്തനങ്ങളാണ് ഇപ്പോൾ നടക്കുന്നത്. റൂട്ട് 8, റൂട്ട് 11 പാതകളെ മിറാമിച്ചി നദിക്ക് കുറുകെ ബന്ധിപ്പിക്കുന്ന ഈ പാലം പ്രദേശത്തെ ഗതാഗത സംവിധാനത്തിൽ നിർണ്ണായക പങ്കാണ് വഹിക്കുന്നത്.
1967-ൽ പ്രവർത്തനമാരംഭിച്ച ഈ പാലത്തിലൂടെ പ്രതിദിനം ശരാശരി 13,700 വാഹനങ്ങളാണ് കടന്നുപോകുന്നത്. പാലത്തിന്റെ വടക്ക്, തെക്ക് ഭാഗങ്ങളിലെ ഡെക്കുകൾ (Bridge deck) പൂർണ്ണമായും നവീകരിക്കുന്നതിനാണ് നിലവിലെ ഘട്ടത്തിൽ മുൻഗണന നൽകുന്നത്. പാലത്തിന്റെ സുരക്ഷയും ദീർഘകാലാടിസ്ഥാനത്തിലുള്ള പ്രവർത്തനക്ഷമതയും ഉറപ്പാക്കുന്നതിനായുള്ള വിപുലമായ നിർമ്മാണ പ്രവർത്തനങ്ങളാണ് ഇപ്പോൾ നടന്നുവരുന്നത്.
ഈ വർഷം ഡിസംബറിൽ പാലം വീണ്ടും തുറക്കുമെങ്കിലും വരും വർഷങ്ങളിലും ദീർഘകാല നിയന്ത്രണങ്ങൾ ഉണ്ടാകുമെന്ന് അധികൃതർ മുന്നറിയിപ്പ് നൽകുന്നുണ്ട്. അടുത്ത ഘട്ടത്തിലെ അറ്റകുറ്റപ്പണികൾക്കായി 2027 ഏപ്രിൽ ഒന്നു മുതൽ ഡിസംബർ ഒന്നു വരെ പാലം വീണ്ടും അടച്ചിടേണ്ടി വരും. പദ്ധതിയുടെ അവസാന ഘട്ടത്തിൽ പാലത്തിന്റെ മധ്യഭാഗത്തെ സ്പാനുകളും ഡെക്കും പൂർണ്ണമായും മാറ്റിസ്ഥാപിക്കുന്ന പ്രവർത്തനങ്ങൾ കൂടി പൂർത്തിയാക്കാനുണ്ട്.
ഏകദേശം 245 മില്യൺ ഡോളർ ചിലവഴിച്ചാണ് ഈ ബൃഹത്തായ പുനരുദ്ധാരണ പദ്ധതി നടപ്പിലാക്കുന്നത്. 2009-ൽ നടത്തിയ പഠന റിപ്പോർട്ടിന്റെ അടിസ്ഥാനത്തിൽ 2012 മുതലാണ് പാലത്തിന്റെ നവീകരണ പ്രവർത്തനങ്ങൾ ആരംഭിച്ചത്. 2029-ഓടെ മുഴുവൻ പണികളും പൂർത്തിയാക്കാൻ ലക്ഷ്യമിടുന്ന ഈ പദ്ധതിയിലൂടെ പാലത്തിന്റെ ആയുസ്സ് 50 മുതൽ 60 വർഷം വരെ വർദ്ധിപ്പിക്കാൻ സാധിക്കുമെന്നാണ് വിലയിരുത്തപ്പെടുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Centennial Bridge in Miramichi closed; repairs will last until December
