തൃശൂർ : സംസ്ഥാനത്ത് ഏറ്റവും ത്രില്ലടിപ്പിക്കുന്ന തിരഞ്ഞെടുപ്പ് പോരാട്ടത്തിനാണ് തൃശൂർ ജില്ല ഇത്തവണ സാക്ഷ്യം വഹിക്കുന്നത്. വോട്ടെടുപ്പിന് ദിവസങ്ങൾ മാത്രം ബാക്കി നിൽക്കെ, ഇടത്-വലത്-എൻ.ഡി.എ മുന്നണികൾ വോട്ടുറപ്പിക്കാനുള്ള തീവ്രശ്രമത്തിലാണ്. കഴിഞ്ഞ നിയമസഭാ തിരഞ്ഞെടുപ്പിലെ എൽ.ഡി.എഫ് മുന്നേറ്റവും ലോക്സഭയിലെ എൻ.ഡി.എ കുതിപ്പും ഏറ്റവും ഒടുവിൽ നടന്ന തദ്ദേശ തിരഞ്ഞെടുപ്പിലെ യു.ഡി.എഫ് മേൽക്കൈയും ജില്ലയിലെ രാഷ്ട്രീയ ചിത്രം പൂർണ്ണമായും പ്രവചനാതീതമാക്കുന്നു. കാലങ്ങളായി എൽ.ഡി.എഫും യു.ഡി.എഫും മാറിമാറി ജയിച്ച മണ്ഡലങ്ങളിൽ ഇത്തവണ എൻ.ഡി.എയും നിർണ്ണായക ശക്തിയായി മാറിയിരിക്കുകയാണ്.
2021-ലെ നിയമസഭാ തിരഞ്ഞെടുപ്പിൽ ജില്ലയിലെ ഭൂരിഭാഗം മണ്ഡലങ്ങളും പിടിച്ചടക്കി എൽ.ഡി.എഫ് വലിയ ആധിപത്യമാണ് പുലർത്തിയത്. തൃശൂർ മണ്ഡലത്തിൽ വെറും 946 വോട്ടുകൾക്കാണ് എൽ.ഡി.എഫ് അന്ന് ജയിച്ചതെങ്കിൽ, വടക്കാഞ്ചേരി പിടിച്ചെടുക്കാൻ യു.ഡി.എഫിനായി. എന്നാൽ 2024-ലെ ലോക്സഭാ തിരഞ്ഞെടുപ്പിൽ ചിത്രം ആകെ മാറിമറിഞ്ഞു. സുരേഷ് ഗോപിയിലൂടെ ബി.ജെ.പി കേരളത്തിൽ ആദ്യമായി അക്കൗണ്ട് തുറന്നത് തൃശൂരിലായിരുന്നു. ഏഴോളം നിയമസഭാ മണ്ഡലങ്ങളിൽ എൻ.ഡി.എ ലീഡ് നേടിയപ്പോൾ, യു.ഡി.എഫിന് ഗുരുവായൂരിൽ മാത്രമാണ് ലീഡ് നിലനിർത്താനായത്. എൽ.ഡി.എഫിന് ഒരിടത്തും മുന്നിലെത്താൻ കഴിഞ്ഞതുമില്ല.
ലോക്സഭയിലെ തകർച്ചയ്ക്ക് ശേഷം 2025-ൽ നടന്ന തദ്ദേശ തിരഞ്ഞെടുപ്പിൽ യു.ഡി.എഫ് ശക്തമായ തിരിച്ചുവരവ് നടത്തി. 10 വർഷത്തിന് ശേഷം തൃശൂർ കോർപ്പറേഷൻ ഭരണം തിരിച്ചുപിടിച്ച അവർ, 2020-ൽ ജയിച്ച 16 പഞ്ചായത്തുകൾ എന്നത് 34 ആക്കി ഉയർത്തി. ലോക്സഭയിലെ ആവേശം തദ്ദേശത്തിൽ നിലനിർത്താൻ എൻ.ഡി.എയ്ക്ക് കഴിഞ്ഞില്ലെന്നതും ശ്രദ്ധേയമാണ്. അതേസമയം, നഗരസഭകളിലും കോർപ്പറേഷനിലും തിരിച്ചടി നേരിട്ടെങ്കിലും ജില്ലാ പഞ്ചായത്ത് ഭരണം നിലനിർത്താനായത് എൽ.ഡി.എഫിന് വലിയ രാഷ്ട്രീയ ആശ്വാസമായി.
ഇത്തവണത്തെ തിരഞ്ഞെടുപ്പിൽ സ്ഥാനാർത്ഥി നിർണ്ണയത്തിലും വലിയ ട്വിസ്റ്റുകൾ പ്രകടമാണ്. കഴിഞ്ഞ തവണ കോൺഗ്രസിനായി മത്സരിച്ച പത്മജ വേണുഗോപാലും സി.പി.ഐ സ്ഥാനാർത്ഥിയായിരുന്ന സി.സി. മുകുന്ദനും ഇത്തവണ എൻ.ഡി.എ പാളയത്തിലാണ്. തൃശൂരിൽ പത്മജ വേണുഗോപാലിനെ നേരിടാൻ എൽ.ഡി.എഫ് കവി ആലങ്കോട് ലീലാകൃഷ്ണനെയും യു.ഡി.എഫ് രാജൻ ജെ. പല്ലനെയും നിയോഗിച്ചിരിക്കുന്നു. മണലൂരിൽ മുൻ മന്ത്രി സി. രവീന്ദ്രനാഥും ടി.എൻ. പ്രതാപനും തമ്മിലുള്ള പോരാട്ടം ശക്തമാണ്. നാട്ടികയിൽ സിറ്റിങ് എം.എൽ.എ ആയിരുന്ന സി.സി. മുകുന്ദൻ ബി.ജെ.പി സ്ഥാനാർത്ഥിയായെത്തുന്നത് മണ്ഡലത്തിൽ വലിയ ചർച്ചയായിട്ടുണ്ട്.
മന്ത്രിമാരായ കെ. രാജനും ആർ. ബിന്ദുവും തങ്ങളുടെ മണ്ഡലങ്ങൾ നിലനിർത്താൻ പോരാടുമ്പോൾ, ചേലക്കരയിൽ യു.ആർ. പ്രദീപ് എൽ.ഡി.എഫ് കോട്ട കാക്കാനിറങ്ങുന്നു. പ്രധാനമന്ത്രി നരേന്ദ്ര മോദി, രാഹുൽ ഗാന്ധി തുടങ്ങിയ ദേശീയ നേതാക്കളുടെ സാന്നിധ്യം പ്രചാരണത്തിന് വീര്യം കൂട്ടിയിട്ടുണ്ട്. കൂടുമാറ്റങ്ങളും രാഷ്ട്രീയ ആരോപണങ്ങളും കൊണ്ട് ചൂടുപിടിച്ച തൃശൂരിലെ ഈ രാഷ്ട്രീയ ത്രില്ലറിന്റെ ക്ലൈമാക്സിൽ ആര് വിജയിക്കുമെന്ന് അറിയാൻ രാഷ്ട്രീയ കേരളം ഒന്നടങ്കം കാത്തിരിക്കുകയാണ്. ഓരോ വോട്ടും നിർണ്ണായകമായ ഈ പോരാട്ടത്തിൽ ജനവിധി ആർക്കൊപ്പമാകുമെന്ന് ദിവസങ്ങൾക്കുള്ളിൽ വ്യക്തമാകും.
Who will take Thrissur? An unpredictable battle filled with suspense and twists on the land of the powerful
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
