അവി ലൂയിസുമായി ചർച്ചക്കില്ല; കടുത്ത നിലപാടുമായി സസ്കാച്ചവാൻ എൻ.ഡി.പി നേതാവ് കാർല ബെക്ക്

റെജീന: കാനഡയിലെ പുതിയ ഫെഡറൽ ന്യൂ ഡെമോക്രാറ്റിക് പാർട്ടി (NDP) നേതാവായി തെരഞ്ഞെടുക്കപ്പെട്ട ആവി ലൂയിസുമായി പരസ്യമായ ഏറ്റുമുട്ടലിന് വഴിതുറന്ന് സസ്കാച്ചവാൻ എൻ.ഡി.പി രംഗത്ത്. പ്രകൃതിവിഭവങ്ങളുടെ വിനിയോഗവുമായി ബന്ധപ്പെട്ട തന്റെ കടുത്ത നിലപാടുകളിൽ മാറ്റം വരുത്താൻ ലൂയിസ് തയ്യാറാകാത്തിടത്തോളം അദ്ദേഹവുമായി ഒരു കൂടിക്കാഴ്ചയ്ക്ക് താനില്ലെന്ന് സസ്കാച്ചവാൻ എൻ.ഡി.പി നേതാവ് കാർല ബെക്ക് വ്യക്തമാക്കി. വിന്നിപെഗിൽ നടന്ന പാർട്ടി കൺവെൻഷനിൽ വൻ ഭൂരിപക്ഷത്തോടെയാണ് ആവി ലൂയിസ് ഫെഡറൽ നേതൃത്വത്തിലേക്ക് എത്തിയത്. എന്നാൽ, ലൂയിസിന്റെ പരിസ്ഥിതി നയങ്ങൾ സംസ്ഥാനത്തെ ആയിരക്കണക്കിന് തൊഴിലാളികളെയും സമ്പദ്‌വ്യവസ്ഥയെയും ദോഷകരമായി ബാധിക്കുമെന്നാണ് ബെക്കിന്റെ നിലപാട്.

ഫോസിൽ ഇന്ധനങ്ങളുടെ ഉപയോഗം പൂർണ്ണമായി അവസാനിപ്പിക്കണമെന്ന ഉറച്ച നിലപാടുകാരനാണ് ആവി ലൂയിസ്. കാനഡയുടെ ആഭ്യന്തര ഉൽപ്പാദനത്തിന്റെ (GDP) രണ്ട് ശതമാനം പരിസ്ഥിതി സൗഹൃദ തൊഴിലവസരങ്ങൾ സൃഷ്ടിക്കുന്നതിനായി മാറ്റിവെക്കുക, ഹീറ്റ് പമ്പുകൾ ലഭ്യമാക്കുക, വൈദ്യുതിയിൽ പ്രവർത്തിക്കുന്ന പൊതുഗതാഗത സംവിധാനം വിപുലീകരിക്കുക തുടങ്ങിയ നിർദ്ദേശങ്ങൾ അടങ്ങിയ ‘ഗ്രീൻ ന്യൂ ഡീൽ’ മാതൃകയിലുള്ള പദ്ധതിയാണ് ലൂയിസ് മുന്നോട്ടുവെക്കുന്നത്. പ്രകൃതിവാതകം (LNG) ഉൾപ്പെടെയുള്ള പുതിയ ഫോസിൽ ഇന്ധന പദ്ധതികൾക്കെല്ലാം അദ്ദേഹം എതിരാണ്. എന്നാൽ, പ്രായോഗികമല്ലാത്ത ഇത്തരം കടുത്ത പ്രത്യയശാസ്ത്ര വാശികൾ സംസ്ഥാനത്തെ ജനങ്ങളെ ദുരിതത്തിലാക്കുമെന്ന് കാർല ബെക്ക് കുറ്റപ്പെടുത്തുന്നു.

ഒരു പ്രമുഖ മാധ്യമം പുറത്തുവിട്ട കാർല ബെക്കിന്റെ കത്തിലാണ് പുതിയ ഫെഡറൽ നേതൃത്വത്തോടുള്ള അതൃപ്തി വ്യക്തമാക്കുന്നത്. ലൂയിസിന്റെ നിലപാടുകൾ യാഥാർത്ഥ്യബോധമില്ലാത്തതാണെന്നും സസ്കാച്ചവാനിലെ 40,000-ത്തോളം തൊഴിലാളികളുടെ ജീവിതം ഇത് ഇല്ലാതാക്കുമെന്നും അവർ ചൂണ്ടിക്കാണിക്കുന്നു. പ്രതിവർഷം 13.6 ബില്യൺ ഡോളറിന്റെ സാമ്പത്തിക ചലനമാണ് പ്രകൃതിവിഭവ മേഖലയിലൂടെ സംസ്ഥാനത്ത് ഉണ്ടാകുന്നത്. ഈ മേഖലയെ തകർക്കുന്നത് അധ്വാനിക്കുന്ന ജനവിഭാഗങ്ങൾക്കായി നിലകൊള്ളുന്ന പാർട്ടിയുടെ അടിസ്ഥാന തത്വങ്ങൾക്ക് വിരുദ്ധമാണ്. ജനങ്ങളുടെ ജീവിതച്ചെലവ് കുറയ്ക്കുമെന്ന് പറയുന്ന ലൂയിസിന്റെ നയങ്ങളിൽ അതിനുള്ള യാഥാർത്ഥ്യബോധമില്ലെന്നും ബെക്ക് കത്തിൽ വ്യക്തമാക്കുന്നുണ്ട്.

കാലാവസ്ഥാ വ്യതിയാനത്തിനെതിരെ ലൂയിസ് നേരത്തെ മുന്നോട്ടുവെച്ച ‘ലീപ് മാനിഫെസ്റ്റോ’ മുൻപും പാർട്ടിയിൽ വലിയ ഭിന്നതകൾക്ക് കാരണമായിരുന്നു. സസ്കാച്ചവാൻ എൻ.ഡി.പിയുടെ സ്വന്തം വികസന പദ്ധതിയായ ‘ഗ്രിഡ് ആൻഡ് ഗ്രോത്ത് പ്ലാൻ’ കാർബൺ ഉദ്‌വമനം കുറയ്ക്കുന്നതിനൊപ്പം കുടുംബങ്ങളുടെ സാമ്പത്തിക ബാധ്യത കുറയ്ക്കാനും വ്യവസായങ്ങളെ വൈവിധ്യവൽക്കരിക്കാനും ലക്ഷ്യമിട്ടുള്ളതാണെന്ന് ബെക്ക് ഓർമ്മിപ്പിക്കുന്നു. സ്വന്തം നാടിന്റെ യാഥാർത്ഥ്യങ്ങളെയും തൊഴിലാളികളുടെ കഷ്ടപ്പാടുകളെയും ഉൾക്കൊള്ളാൻ ലൂയിസ് തയ്യാറാകുകയും തന്റെ നിലപാടുകൾ പരസ്യമായി തിരുത്തുകയും ചെയ്താൽ മാത്രമേ ഇനി ഒരു കൂടിക്കാഴ്ച ഉണ്ടാകൂ എന്ന ശക്തമായ മുന്നറിയിപ്പോടെയാണ് കാർല ബെക്ക് കത്ത് അവസാനിപ്പിക്കുന്നത്.

saskatchewan-ndp-distancing-itself-from-new-federal-leadership

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt