ഒട്ടാവ : ശീതീകരിച്ചതും ടിന്നിലടച്ചതുമായ പച്ചക്കറികളുടെ ആഗോള ഇറക്കുമതിയെക്കുറിച്ച് കാനഡ ഫെഡറൽ ഗവൺമെന്റ് വ്യാപാര അന്വേഷണം പ്രഖ്യാപിച്ചു. കനേഡിയൻ അസോസിയേഷൻ ഓഫ് വെജിറ്റബിൾ ഗ്രോവേഴ്സ് ആൻഡ് പ്രോസസേഴ്സിന്റെ (Canadian Association of Vegetable Growers and Processors) അപേക്ഷ പരിഗണിച്ചാണ് ധനകാര്യ വകുപ്പിന്റെ ഈ നടപടി. വിപണിയിൽ കുറഞ്ഞ വിലയുള്ള ഇറക്കുമതി ഉൽപ്പന്നങ്ങൾ വർധിക്കുന്നത് ആഭ്യന്തര ഉൽപ്പാദകരെ പ്രതികൂലമായി ബാധിക്കുന്നുവെന്നാണ് പ്രാദേശിക കർഷകരുടെ പരാതി.
ചിക്കൻപീസ് (കടല), വാക്സ് ബീൻസ്, ചോളം, പയർ വർഗ്ഗങ്ങൾ, ഗ്രീൻ ബീൻസ് എന്നിവയുൾപ്പെടെയുള്ള പച്ചക്കറികളുടെ ഇറക്കുമതിയെക്കുറിച്ചാണ് ട്രൈബ്യൂണൽ അന്വേഷിക്കുന്നത്. ഇതുമായി ബന്ധപ്പെട്ട ട്രൈബ്യൂണൽ ഹിയറിംഗ് 2026 ജൂൺ 15-ന് നടക്കുമെന്ന് നിയമസ്ഥാപനമായ Osler, Hoskin & Harcourt LLP വ്യക്തമാക്കി. ഇറക്കുമതിയിലുണ്ടായ വർധനവ് കനേഡിയൻ പച്ചക്കറി കർഷകർക്കും സംസ്കരണ യൂണിറ്റുകൾക്കും ഗുരുതരമായ ആഘാതം സൃഷ്ടിക്കുന്നുണ്ടോ എന്ന് 180 ദിവസത്തിനുള്ളിൽ ട്രൈബ്യൂണൽ വിലയിരുത്തും.
പരിശോധനയ്ക്ക് ശേഷം ട്രൈബ്യൂണൽ ഗവൺമെന്റിന് ആവശ്യമായ ശുപാർശകൾ സമർപ്പിക്കും. പച്ചക്കറി ഇറക്കുമതിയിലെ നിയന്ത്രണങ്ങൾ കനേഡിയൻ കുടുംബങ്ങളുടെ ഭക്ഷണ ലഭ്യതയെയും ഭക്ഷ്യസുരക്ഷയെയും എങ്ങനെ ബാധിക്കുമെന്ന കാര്യവും ട്രൈബ്യൂണൽ പരിഗണിക്കും. ഇറക്കുമതി ഉൽപ്പന്നങ്ങളുടെ ആധിക്യം ആഭ്യന്തര വിപണിയെ തകർക്കുന്നുവെന്ന കർഷക സംഘടനകളുടെ വാദത്തിൽ വിശദമായ പരിശോധനയാണ് അധികൃതർ ലക്ഷ്യമിടുന്നത്.
Canada’s move to restrict imports of frozen vegetables; Tribunal to investigate
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
