ഒട്ടാവ: പ്രധാനമന്ത്രി മാർക്ക് കാർണിയുടെ ചൈനീസ് സന്ദർശനവുമായി ബന്ധപ്പെട്ട് പാർലമെന്റിൽ സമർപ്പിച്ച ഔദ്യോഗിക രേഖകളിൽ പിഴവ് സംഭവിച്ചതായി പ്രധാനമന്ത്രിയുടെ ഓഫീസ്. ചൈനീസ് പ്രസിഡന്റ് ഷി ജിൻപിങ്ങുമായുള്ള കൂടിക്കാഴ്ചയിൽ മനുഷ്യാവകാശ ലംഘനങ്ങളെക്കുറിച്ചോ വിദേശ ഇടപെടലുകളെക്കുറിച്ചോ പ്രധാനമന്ത്രി സംസാരിച്ചില്ലെന്ന മുൻ പ്രസ്താവനയാണ് സർക്കാർ ഇപ്പോൾ തിരുത്തിയിരിക്കുന്നത്.
കഴിഞ്ഞ ജനുവരിയിൽ ബീജിംഗിൽ നടന്ന കൂടിക്കാഴ്ചയിൽ മനുഷ്യാവകാശ വിഷയങ്ങൾ താൻ നേരിട്ട് ഉന്നയിച്ചിട്ടുണ്ടെന്ന് സന്ദർശനത്തിന് ശേഷം പ്രധാനമന്ത്രി മാധ്യമങ്ങളോട് വ്യക്തമാക്കിയിരുന്നു. എന്നാൽ, മാർച്ച് 13-ന് പാർലമെന്റിൽ സമർപ്പിച്ച രേഖകളിൽ ഇതിന് വിരുദ്ധമായ വിവരങ്ങളാണ് ഉണ്ടായിരുന്നത്. ഉദ്യോഗസ്ഥ തലത്തിൽ സംഭവിച്ച പിഴവാണിതെന്നും തിങ്കളാഴ്ച ഉച്ചയോടെ പുതുക്കിയ വിവരങ്ങൾ പാർലമെന്റിൽ വീണ്ടും സമർപ്പിച്ചതായും പ്രധാനമന്ത്രിയുടെ വക്താവ് ഓഡ്രി ഷാംപൂ അറിയിച്ചു.
മനുഷ്യാവകാശം ഉൾപ്പെടെയുള്ള കാനഡയുടെ ആശങ്കകൾ വിവിധ തലങ്ങളിൽ ചൈനയെ അറിയിച്ചിട്ടുണ്ടെന്നും ഇരുരാജ്യങ്ങളും തമ്മിലുള്ള നയതന്ത്ര ബന്ധം മെച്ചപ്പെടുത്തുന്നതിനുള്ള ചർച്ചകൾ പുരോഗമിക്കുകയാണെന്നും വക്താവ് കൂട്ടിച്ചേർത്തു. കൺസർവേറ്റീവ് എംപി നെഡ് കുറുക്ക് ഉന്നയിച്ച ചോദ്യങ്ങൾക്ക് മറുപടിയായാണ് സർക്കാർ ആദ്യം തെറ്റായ വിവരങ്ങൾ നൽകിയത്. പാർലമെന്റിൽ തെറ്റായ വിവരങ്ങൾ എത്തിയതിനോട് പ്രതിപക്ഷം നിലവിൽ ഔദ്യോഗികമായി പ്രതികരിച്ചിട്ടില്ല.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Human rights issue: Canada corrects misinformation provided in Parliament
