സസ്കാച്ചവാൻ: സസ്കാച്ചവാനിലെ പ്രമുഖ തദ്ദേശീയ സംഘടനയായ ഫെഡറേഷൻ ഓഫ് സോവറിൻ ഇൻഡിജിനസ് നേഷൻസ് (FSIN) 29 മില്യൺ ഡോളർ കേന്ദ്ര സർക്കാരിന് തിരിച്ചടയ്ക്കണമെന്ന് ഉത്തരവ്. കഴിഞ്ഞ വർഷം നടന്ന ഫോറൻസിക് ഓഡിറ്റ് റിപ്പോർട്ട് പുറത്തായതോടെയാണ് വൻ സാമ്പത്തിക ക്രമക്കേടിന്റെ വിവരങ്ങൾ പുറംലോകമറിഞ്ഞത്.
2019 മുതൽ 2024 വരെയുള്ള കാലയളവിൽ വിവിധ പദ്ധതികൾക്കായി അനുവദിച്ച തുകയിൽ 34 മില്യൺ ഡോളറിലധികം കൃത്യമായ രേഖകളില്ലാതെ ചിലവഴിച്ചതായി കെപിഎംജി (KPMG) നടത്തിയ ഓഡിറ്റിൽ കണ്ടെത്തിയിരുന്നു. ഇതിൽ 23 മില്യൺ ഡോളറിലധികം കോവിഡ് പ്രതിരോധ പ്രവർത്തനങ്ങൾക്കായി അനുവദിച്ച തുകയാണ്. ഈ തുക ഉപയോഗിച്ച് ആഡംബര വാഹനങ്ങൾ വാങ്ങിയതായും ഉന്നത ഉദ്യോഗസ്ഥർക്ക് നിയമവിരുദ്ധമായി ശമ്പളം നൽകിയതായും റിപ്പോർട്ടിൽ സൂചിപ്പിക്കുന്നു.
കൂടാതെ, ഭരണനിർവ്വഹണത്തിനായി അനുവദിച്ച തുകയിൽ നിന്ന് 2 മില്യൺ ഡോളർ സംഘടനയുടെ പുതിയ ഓഫീസ് മന്ദിരത്തിന്റെ നിർമ്മാണത്തിനായി വകമാറ്റി ചിലവഴിച്ചതായും ഓഡിറ്റ് റിപ്പോർട്ട് വ്യക്തമാക്കുന്നു. ഫണ്ട് വിതരണ കരാറുകളുടെ ലംഘനമാണിതെന്ന് ഇൻഡിജിനസ് സർവീസസ് കാനഡ (ISC) വ്യക്തമാക്കി. ഏപ്രിൽ 2-നകം ഈ കണ്ടെത്തലുകളിൽ മറുപടി നൽകാനോ അല്ലെങ്കിൽ തുക തിരിച്ചടയ്ക്കാനുള്ള നടപടികൾ സ്വീകരിക്കാനോ സംഘടനയ്ക്ക് സർക്കാർ നിർദ്ദേശം നൽകിയിട്ടുണ്ട്. പൊതുപണം ദുരുപയോഗം ചെയ്യുന്നതിനെതിരെ കർശന നടപടികളുമായി മുന്നോട്ട് പോകാനാണ് ഒട്ടാവയുടെ തീരുമാനം.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Ottawa asks FSIN to repay nearly $29M as forensic audit leaks to public
