ഷാർലറ്റ്ടൗൺ: കാനഡയും മെക്സിക്കോയും തമ്മിൽ ഒപ്പുവെച്ച പുതിയ വ്യാപാര കരാറിലൂടെ പ്രിൻസ് എഡ്വേർഡ് ഐലൻഡ് (പി.ഇ.ഐ.) ഉൾപ്പെടെയുള്ള മേഖലകളിലെ ഉരുളക്കിഴങ്ങ് കർഷകർക്ക് വിപുലമായ വിപണി തുറക്കുന്നു. കാനഡയിൽ നിന്നുള്ള പുതിയ ഉരുളക്കിഴങ്ങുകൾ ഭക്ഷണാവശ്യങ്ങൾക്കും സംസ്കരണത്തിനുമായി മെക്സിക്കോയിലേക്ക് കയറ്റുമതി ചെയ്യാൻ അനുമതി നൽകുന്നതാണ് ഈ കരാർ. കനേഡിയൻ ഫുഡ് ഇൻസ്പെക്ഷൻ ഏജൻസിയും മെക്സിക്കൻ ഭക്ഷ്യസുരക്ഷാ അതോറിറ്റിയായ സെനാസിനയും (SENASICA) തമ്മിൽ നടത്തിയ ചർച്ചകൾക്കൊടുവിലാണ് സുപ്രധാനമായ ഈ തീരുമാനമുണ്ടായത്.
നിലവിൽ കാനഡയുടെ ഉരുളക്കിഴങ്ങ് കയറ്റുമതിയുടെ 93 ശതമാനവും അമേരിക്കയിലേക്കാണ് കയറ്റുമതി ചെയ്യുന്നത്. പുതിയ കരാർ നിലവിൽ വരുന്നതോടെ വിപണിയിൽ വൈവിധ്യവൽക്കരണം കൊണ്ടുവരാനും അമേരിക്കൻ വിപണിയിലെ അനിശ്ചിതത്വങ്ങളെ മറികടക്കാനും കർഷകർക്ക് സാധിക്കും. കുറഞ്ഞ കസ്റ്റംസ് തീരുവയിൽ ഉൽപ്പന്നങ്ങൾ മെക്സിക്കോയിൽ എത്തിക്കാൻ കഴിയുന്നത് മറ്റ് രാജ്യങ്ങളുമായുള്ള മത്സരത്തിൽ കാനഡയ്ക്ക് മുൻതൂക്കം നൽകുമെന്ന് പി.ഇ.ഐ. പോട്ടേറ്റോ ബോർഡ് അധികൃതർ വ്യക്തമാക്കി. പ്രധാനമായും ‘റസ്സെറ്റ്’ ഇനത്തിൽപ്പെട്ട ഉരുളക്കിഴങ്ങുകളാകും മെക്സിക്കൻ വിപണി ലക്ഷ്യമിട്ട് കയറ്റി അയക്കുക.
കരാർ യാഥാർത്ഥ്യമായെങ്കിലും ഗതാഗത സൗകര്യങ്ങൾ ഒരുക്കുന്നതും ഓഡിറ്റിംഗ് നടപടികളും ഉൾപ്പെടെയുള്ള പ്രാഥമിക ഘട്ടങ്ങൾ വരും മാസങ്ങളിൽ പൂർത്തിയാക്കും. കടൽമാർഗ്ഗം വഴി മെക്സിക്കോയുടെ തെക്കൻ ഭാഗങ്ങളിലേക്ക് ഉൽപ്പന്നങ്ങൾ എത്തിക്കാനാണ് കർഷക കൂട്ടായ്മകൾ ലക്ഷ്യമിടുന്നത്. 2026-ലെ കൃഷിക്കാലത്ത് മെക്സിക്കൻ ഉദ്യോഗസ്ഥർ കാനഡയിലെ സർട്ടിഫിക്കേഷൻ സംവിധാനങ്ങൾ നേരിട്ട് പരിശോധിക്കും. ഈ വർഷം വിളവെടുക്കുന്ന ഉരുളക്കിഴങ്ങുകൾ തന്നെ ആദ്യഘട്ട കയറ്റുമതിയിൽ ഉൾപ്പെടുത്താൻ കഴിയുമെന്നാണ് കൃഷി വകുപ്പിന്റെയും കർഷകരുടെയും പ്രതീക്ഷ.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Canadian potatoes will now be shipped to Mexico; a new turning point for farmers
