വാഷിംഗ്ടൺ: ഇറാനുമായുള്ള സൈനിക നീക്കങ്ങളിൽ സഹകരിക്കാൻ മടി കാണിക്കുന്ന നാറ്റോ സഖ്യകക്ഷികൾക്കെതിരെ യുഎസ് പ്രസിഡന്റ് ഡൊണാൾഡ് ട്രംപ്. നാറ്റോ രാജ്യങ്ങളെ സംരക്ഷിക്കാൻ അമേരിക്ക പ്രതിവർഷം ശതകോടിക്കണക്കിന് ഡോളർ ചെലവഴിക്കുന്നുണ്ടെങ്കിലും തിരിച്ച് പിന്തുണ ലഭിക്കുന്നില്ലെന്ന് അദ്ദേഹം കുറ്റപ്പെടുത്തി. അമേരിക്കയുടെ സൈനിക കരുത്ത് ലോകത്തിന് മുന്നിൽ തെളിയിക്കപ്പെട്ട സാഹചര്യത്തിൽ ഇനി ആരുടെയും സഹായം തനിക്ക് ആവശ്യമില്ലെന്ന് വൈറ്റ് ഹൗസിൽ നടത്തിയ വാർത്താ സമ്മേളനത്തിൽ പ്രസിഡന്റ് വ്യക്തമാക്കി.
ഇറാന്റെ നാവിക-വ്യോമ പ്രതിരോധ സംവിധാനങ്ങളെ തകർത്തതായും അമേരിക്ക ലോകത്തെ ഏറ്റവും ശക്തമായ രാജ്യമാണെന്നും ട്രംപ് അവകാശപ്പെട്ടു. നിലവിലെ യുദ്ധത്തിൽ പങ്കാളികളാകാൻ ഭൂരിഭാഗം നാറ്റോ രാജ്യങ്ങളും താൽപ്പര്യപ്പെടുന്നില്ലെന്ന് വാഷിംഗ്ടണിനെ അറിയിച്ചിട്ടുണ്ട്. ഇതിനെ ‘വൺവേ സ്ട്രീറ്റ്’ എന്നാണ് ട്രംപ് വിശേഷിപ്പിച്ചത്. ജപ്പാൻ, ഓസ്ട്രേലിയ, ദക്ഷിണ കൊറിയ തുടങ്ങിയ രാജ്യങ്ങളുടെ സഹായവും താൻ ആഗ്രഹിക്കുന്നില്ലെന്ന് അദ്ദേഹം കൂട്ടിച്ചേർത്തു. മൂന്നാം വാരത്തിലേക്ക് കടക്കുന്ന യുദ്ധത്തിൽ സഖ്യകക്ഷികൾ മാറിനിൽക്കുന്നത് ഞെട്ടിക്കുന്നതാണെന്നും അദ്ദേഹം പറഞ്ഞു.
അതേസമയം, ഹോർമുസ് കടലിടുക്ക് സംരക്ഷിക്കാനുള്ള അമേരിക്കയുടെ അഭ്യർത്ഥന പ്രമുഖ നാറ്റോ അംഗമായ ഫ്രാൻസ് നിരസിച്ചു. തങ്ങൾ ഈ സംഘർഷത്തിന്റെ ഭാഗമല്ലെന്നും കടലിടുക്ക് തുറക്കാനുള്ള സൈനിക നീക്കങ്ങളിൽ പങ്കെടുക്കില്ലെന്നും ഫ്രഞ്ച് പ്രസിഡന്റ് ഇമ്മാനുവൽ മാക്രോൺ വ്യക്തമാക്കി. നയതന്ത്ര ചർച്ചകളിലൂടെ പ്രശ്നം പരിഹരിക്കണമെന്നാണ് യൂറോപ്യൻ യൂണിയന്റെ നിലപാട്. യുദ്ധം മൂന്നാം ആഴ്ച പിന്നിടുമ്പോൾ എണ്ണവിലയിൽ 45 ശതമാനത്തോളം വർദ്ധനവാണ് രേഖപ്പെടുത്തിയിരിക്കുന്നത്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
'No need for help, America alone is enough': Trump breaks with NATO
