മാർക്ക് കാർണിയും കെയർ സ്റ്റാർമറും ലണ്ടനിൽ കൂടിക്കാഴ്ച നടത്തി; ഇറാൻ യുദ്ധവും ആഗോള സുരക്ഷയും ചർച്ചയായി

ഒട്ടാവ : കനേഡിയൻ പ്രധാനമന്ത്രി മാർക്ക് കാർണിയും ബ്രിട്ടീഷ് പ്രധാനമന്ത്രി കെയർ സ്റ്റാർമറും തിങ്കളാഴ്ച ലണ്ടനിൽ കൂടിക്കാഴ്ച നടത്തി. പത്താം നമ്പർ ഡൗണിംഗ് സ്ട്രീറ്റിൽ നടന്ന ചർച്ചയിൽ ഇറാനിലെ യുദ്ധസാഹചര്യം, ആഗോള സുരക്ഷ, സാമ്പത്തിക മാറ്റങ്ങൾ എന്നിവ പ്രധാന വിഷയങ്ങളായതായി യുണൈറ്റഡ് കിംഗ്ഡത്തിലെ കനേഡിയൻ ഹൈക്കമ്മീഷണർ ബിൽ ബ്ലെയർ അറിയിച്ചു. ഒരു വർഷം മുൻപ് നടന്ന ആദ്യ കൂടിക്കാഴ്ചയെ അപേക്ഷിച്ച് ലോകസാഹചര്യങ്ങൾ കൂടുതൽ വെല്ലുവിളി നിറഞ്ഞതാണെന്ന് ഇരു നേതാക്കളും കൂടിക്കാഴ്ചയിൽ അഭിപ്രായപ്പെട്ടു.

റഷ്യ-യുക്രെയ്ൻ യുദ്ധത്തിൽ പരസ്പരം നൽകുന്ന പിന്തുണയെ നേതാക്കൾ അഭിനന്ദിക്കുകയും പങ്കിട്ട മൂല്യങ്ങൾ മറ്റ് ആഗോള പ്രശ്നങ്ങളിൽ പ്രയോഗിക്കേണ്ടതിന്റെ പ്രാധാന്യത്തെക്കുറിച്ച് ചർച്ച ചെയ്യുകയും ചെയ്തു. അന്താരാഷ്ട്ര വിഷയങ്ങളിൽ സഹകരിച്ചു പ്രവർത്തിക്കാനും ഉഭയകക്ഷി ബന്ധം ശക്തമാക്കാനും തീരുമാനിച്ചതായി കാർണി വ്യക്തമാക്കി. വരാനിരിക്കുന്ന വെല്ലുവിളികളെ നയപരമായി നേരിടാൻ ഇരുരാജ്യങ്ങളും ഒന്നിച്ച് നിൽക്കേണ്ടത് അനിവാര്യമാണെന്ന് സ്റ്റാർമറും പറഞ്ഞു. 61-ാം ജന്മദിനം ആഘോഷിക്കുന്ന മാർക്ക് കാർണിക്ക് സ്റ്റാർമർ ആശംസകൾ നേർന്നു.

ഹോർമുസ് കടലിടുക്കിൽ ഇറാൻ കപ്പലുകൾ ആക്രമിക്കുന്നത് തുടരുന്ന സാഹചര്യത്തിൽ, സഖ്യരാജ്യങ്ങൾ യുദ്ധക്കപ്പലുകൾ അയക്കണമെന്ന് യുഎസ് പ്രസിഡന്റ് ഡൊണാൾഡ് ട്രംപ് ആവശ്യപ്പെട്ടതിന് പിന്നാലെയാണ് ഈ സന്ദർശനം. കടലിടുക്ക് വീണ്ടും തുറക്കുന്നതിന്റെ പ്രാധാന്യത്തെക്കുറിച്ച് സ്റ്റാർമറും ട്രംപും ഞായറാഴ്ച സംസാരിച്ചതായി ഡൗണിംഗ് സ്ട്രീറ്റ് പുറത്തിറക്കിയ പ്രസ്താവനയിൽ പറയുന്നു. നോർവേയിലെ നോർഡിക് നേതാക്കളുമായുള്ള കൂടിക്കാഴ്ചയ്ക്ക് ശേഷം ലണ്ടനിലെത്തിയ കാർണി, ചാൾസ് രാജാവുമായും കൂടിക്കാഴ്ച നടത്താൻ നിശ്ചയിച്ചിട്ടുണ്ട്.

ലണ്ടൻ സന്ദർശനത്തിന് ശേഷം ഔദ്യോഗിക അവധിയിൽ പ്രവേശിക്കുമെങ്കിലും മിഡിൽ ഈസ്റ്റിലെ അസ്ഥിരമായ സാഹചര്യം കണക്കിലെടുത്ത് ഉദ്യോഗസ്ഥരുമായി നിരന്തരം സമ്പർക്കം പുലർത്തുമെന്ന് കാർണി അറിയിച്ചു. ഞായറാഴ്ച സ്റ്റാൻസ്റ്റഡ് വിമാനത്താവളത്തിലെത്തിയ കാർണിയെ ഹൈക്കമ്മീഷണർ ബിൽ ബ്ലെയറാണ് സ്വീകരിച്ചത്. ആഗോള വിതരണ ശൃംഖലകളെയും ഷിപ്പിംഗ് റൂട്ടുകളെയും ഇറാൻ യുദ്ധം ബാധിക്കുന്ന പശ്ചാത്തലത്തിൽ കാനഡയും ബ്രിട്ടനും തമ്മിലുള്ള പ്രതിരോധ സഹകരണം ശക്തമാക്കാൻ ഈ സന്ദർശനം വഴിയൊരുക്കുമെന്നാണ് വിലയിരുത്തൽ.

📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla

Mark Carney and Keir Starmer meet in London; Iran war and global security discussed