ആശങ്കയായി ഇറാൻ സംഘർഷം; കൈവിട്ട് ഇന്ധനവില; ബജറ്റ് തെറ്റി സാധാരണക്കാർ

ഹാലിഫാക്സ്: ഇറാൻ പശ്ചാത്തലമായുള്ള യുദ്ധസാഹചര്യം ആഗോള ഇന്ധന വിപണിയെ കടുത്ത പ്രതിസന്ധിയിലാക്കുന്നു. അന്താരാഷ്ട്ര വിപണിയിൽ അസംസ്‌കൃത എണ്ണവില കുതിച്ചുയരുന്നതോടെ സാധാരണക്കാരുടെ ജീവിതച്ചെലവ് പരിധി വിടുകയാണ്. ഇന്ധനവില വർധനവിനെത്തുടർന്ന് വിദേശരാജ്യങ്ങളിൽ ഉൾപ്പെടെ ജനങ്ങൾ തങ്ങളുടെ യാത്രാ പദ്ധതികൾ വെട്ടിക്കുറയ്ക്കുകയും സ്വകാര്യ വാഹനങ്ങൾ ഒഴിവാക്കി സൈക്കിളിനെയും പൊതുഗതാഗതത്തെയും ആശ്രയിക്കുകയും ചെയ്യുന്ന അവസ്ഥയിലേക്ക് കാര്യങ്ങൾ നീങ്ങുന്നു.

അവശ്യസാധനങ്ങളുടെ വിലക്കയറ്റത്തിനൊപ്പം ഇന്ധനവില കൂടി വർധിച്ചത് സാധാരണക്കാരുടെ ബജറ്റ് താളംതെറ്റിച്ചു. “സ്‌കൂളിൽ പോകാൻ ഇപ്പോൾ പരമാവധി സൈക്കിളാണ് ഉപയോഗിക്കുന്നത്. വീട്ടുവാടകയും പലചരക്ക് സാധനങ്ങളുടെ വിലയും വർധിച്ച സാഹചര്യത്തിൽ വിനോദയാത്രകളെക്കുറിച്ച് ചിന്തിക്കാൻ പോലും കഴിയുന്നില്ല,” നോവ സ്കോഷ്യയിൽ നിന്നുള്ള അലക്സാണ്ടർ കിങ്സ്ബറി പറയുന്നു. ഇന്ധനവില വർധനവ് കാരണം കുടുംബത്തോടൊപ്പമുള്ള റോഡ് ട്രിപ്പുകൾ ഉപേക്ഷിക്കേണ്ടി വന്നതായി ട്രൂറോ സ്വദേശിനി ജനല്ലെ ക്ലാര്ക്കും സാക്ഷ്യപ്പെടുത്തുന്നു.

ഫെബ്രുവരി അവസാന വാരം മുതൽ ഇന്ധനവിലയിൽ വൻ വർധനവാണ് രേഖപ്പെടുത്തുന്നത്. പ്രമുഖ ഗ്യാസ് അനലിസ്റ്റ് ഡാൻ മക്ടീഗിന്റെ കണക്കുകൾ പ്രകാരം, ഡീസൽ ലിറ്ററിന് 52 സെന്റും പെട്രോളിന് 25 സെന്റും ആഗോളതലത്തിൽ വർധിച്ചു കഴിഞ്ഞു. നോവ സ്കോഷ്യയിൽ ഫെബ്രുവരി 27-ന് ലിറ്ററിന് 1.38 ഡോളറായിരുന്ന വില നിലവിൽ 1.62 ഡോളറിലെത്തി നിൽക്കുകയാണ്. ഇറാനിലെ സംഘർഷം നീണ്ടുനിൽക്കുകയാണെങ്കിൽ ഇന്ധനവില എവിടെപ്പോയി നിൽക്കുമെന്ന് പ്രവചിക്കാനാവില്ലെന്നും ആഗോള എണ്ണശേഖരം കുറയുന്നത് വരും ദിവസങ്ങളിൽ സ്ഥിതി കൂടുതൽ വഷളാക്കുമെന്നും അദ്ദേഹം മുന്നറിയിപ്പ് നൽകുന്നു.

ഇന്ധനവില ഉയരുന്നത് ആഭ്യന്തര വിനോദസഞ്ചാര മേഖലയെ നേരിട്ട് ബാധിക്കുമെന്ന് ടൂറിസം ഓപ്പറേറ്റർ ഡെന്നിസ് കാംബെൽ ചൂണ്ടിക്കാട്ടുന്നു. മുൻപ് ഗൾഫ് യുദ്ധകാലത്തുണ്ടായതിന് സമാനമായ പ്രതിസന്ധിയാണ് ഇപ്പോഴും ദൃശ്യമാകുന്നത്. റോഡ് മാർഗമുള്ള യാത്രകൾ കുറയുന്നത് ഈ മേഖലയ്ക്ക് തിരിച്ചടിയാണ്. എന്നാൽ, പേർഷ്യൻ ഗൾഫ് മേഖലയിലെ സംഘർഷം കാരണം ക്രൂയിസ് കപ്പലുകൾ പാത തിരിച്ചുവിടുന്നത് മാരിടൈംസ്, ന്യൂ ഇംഗ്ലണ്ട് തുടങ്ങിയ മേഖലകളിലെ ടൂറിസത്തിന് നേരിയ ഗുണമുണ്ടാക്കിയേക്കാം.

മുൻപ് ഇത്തരം സാഹചര്യങ്ങളിൽ കപ്പൽ വഴിയുള്ള വിനോദസഞ്ചാരത്തിൽ 33 ശതമാനം വരെ വർധനവ് രേഖപ്പെടുത്തിയിട്ടുണ്ട്. നിലവിലെ ആഗോള സാഹചര്യം തുടരുകയാണെങ്കിൽ ഇന്ധനവില റെക്കോർഡ് ഉയരങ്ങളിലെത്തുമെന്നാണ് സാമ്പത്തിക വിദഗ്ധരുടെ വിലയിരുത്തൽ. ഇത് വിപണിയിൽ വലിയ തോതിലുള്ള പണപ്പെരുപ്പത്തിന് കാരണമായേക്കുമെന്നും വിലയിരുത്തപ്പെടുന്നു.

escalating-gas-prices-brought-on-by-iran-war-cause-some-to-alter-spending-habits

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt