ബ്രസൽസ് – യൂറോപ്യൻ യൂണിയൻ (ഇ.യു) തങ്ങളുടെ പുതിയ യാത്രാ അനുമതി സംവിധാനമായ യൂറോപ്യൻ ട്രാവൽ ഇൻഫർമേഷൻ ആൻഡ് ഓതറൈസേഷൻ സിസ്റ്റം (ETIAS) 2026 അവസാനം വരെ നീട്ടിവച്ചതായി പ്രഖ്യാപിച്ചു. സാങ്കേതിക പ്രശ്നങ്ങളും സുരക്ഷാ ആശങ്കകളുമാണ് വീണ്ടും കാലതാമസത്തിന് കാരണമായതെന്ന് അധികാരികൾ അറിയിച്ചു .
ETIAS സംവിധാനം ആദ്യം 2021-ൽ നടപ്പിലാക്കാനാണ് ഉദ്ദേശിച്ചിരുന്നത്. എന്നാൽ അഞ്ച് വർഷത്തെ കാലതാമസത്തിന് ശേഷം ഇപ്പോൾ 2026 അവസാനത്തോടെ നടപ്പിലാക്കാനാണ് തീരുമാനിച്ചിരിക്കുന്നത്. സംവിധാനം പ്രാബല്യത്തിൽ വരുന്നതിന് ശേഷവും ആറ് മാസത്തെ ഗ്രേസ് പീരിയഡ് ഉണ്ടായിരിക്കും.
ETIAS നടപ്പിലാകുമ്പോൾ, കാനഡക്കാരും മറ്റ് വിസ ഒഴിവാക്കപ്പെട്ട രാജ്യങ്ങളിൽ നിന്നുള്ള സന്ദർശകരും 29 ഷെങ്കൻ രാജ്യങ്ങളിലേക്കും സൈപ്രസിലേക്കും യാത്ര ചെയ്യുന്നതിന് മുമ്പ് ഓൺലൈനിൽ അപേക്ഷിക്കേണ്ടതുണ്ട്. ഈ അപേക്ഷക്ക് €7 (ഏകദേശം $11 CAD) ഫീസ് നൽകേണ്ടതുണ്ട്. അനുമതി ലഭിച്ചാൽ, മൂന്ന് വർഷത്തേക്ക് സാധുവായിരിക്കും.
മിക്ക അപേക്ഷകളും ക്ഷണനേരം തന്നെ അംഗീകരിക്കപ്പെടുമെങ്കിലും, ചില സന്ദർഭങ്ങളിൽ അംഗീകാരം ലഭിക്കാൻ 30 ദിവസം വരെ എടുക്കാം. ETIAS ഒരു വിസയല്ല, മറിച്ച് യൂറോപ്യൻ മേഖലയിലേക്ക് പ്രവേശിക്കുന്നതിനുള്ള മുൻകൂർ അനുമതിയാണ്.ഇ.യു പാസ്പോർട്ട് അല്ലെങ്കിൽ താമസ അനുമതി കാർഡ് ഉള്ള കാനഡക്കാർക്ക് ETIAS ആവശ്യമില്ല. അയർലൻഡ് ETIAS സംവിധാനത്തിന്റെ ഭാഗമല്ല, അവർ സ്വന്തം വിസ നിയമങ്ങൾ നിലനിർത്തും.
ഇ.യു അധികാരികൾ ഈ കാലതാമസം കാനഡക്കാർക്ക് 2026 വരെ വിസ ഇല്ലാതെ യൂറോപ്യൻ രാജ്യങ്ങളിലേക്ക് യാത്ര തുടരാൻ അനുവദിക്കുമെന്ന് അറിയിച്ചു. എന്നാൽ യാത്രക്കാർ ഇ.യു നിയമങ്ങൾ അനുസരിച്ച് 90 ദിവസത്തിൽ കൂടുതൽ ഷെങ്കൻ മേഖലയിൽ താമസിക്കരുതെന്ന് അവർ ഓർമിപ്പിച്ചു.
കാനഡ-ഇ.യു ബന്ധങ്ങൾ വളരെ ശക്തമാണെന്നും ഇരു ഭാഗത്തും നിന്നുള്ള യാത്രക്കാർക്ക് സുഗമമായി യാത്ര ചെയ്യാൻ കഴിയുന്ന രീതിയിൽ പുതിയ സംവിധാനം നടപ്പിലാക്കുമെന്നും ബ്രസൽസിലെ ഇ.യു അധികാരികൾ അറിയിച്ചു.
