ദുബായ്: ദുബായ് അന്താരാഷ്ട്ര വിമാനത്താവളത്തിന് സമീപം രണ്ട് ഡ്രോണുകളുടെ അവശിഷ്ടങ്ങൾ പതിച്ച് ഇന്ത്യക്കാരനടക്കം നാല് പേർക്ക് പരിക്കേറ്റു. ബുധനാഴ്ച രാവിലെയാണ് സംഭവം നടന്നതെന്ന് ദുബായ് മീഡിയ ഓഫീസ് സ്ഥിരീകരിച്ചു. പരിക്കേറ്റവരിൽ ഒരു ഇന്ത്യക്കാരനും രണ്ട് ഘാന സ്വദേശികളും ഒരു ബംഗ്ലാദേശ് സ്വദേശിയും ഉൾപ്പെടുന്നു. ഇവർക്ക് ആവശ്യമായ വൈദ്യസഹായം ലഭ്യമാക്കിയതായും സുരക്ഷാ സംവിധാനങ്ങൾ അതീവ ജാഗ്രതയിലാണെന്നും അധികൃതർ അറിയിച്ചു.
ഡ്രോൺ അവശിഷ്ടങ്ങൾ പതിച്ചെങ്കിലും ദുബായ് വിമാനത്താവളത്തിലെ വ്യോമഗതാഗതത്തെ ഇത് ബാധിച്ചിട്ടില്ല. വിമാനങ്ങൾ നിശ്ചയിച്ച പ്രകാരം സാധാരണ നിലയിൽ സർവീസ് നടത്തുന്നുണ്ടെന്നും വിമാനത്താവളത്തിന്റെ പ്രവർത്തനം തടസ്സപ്പെട്ടിട്ടില്ലെന്നും മീഡിയ ഓഫീസ് വ്യക്തമാക്കി. യാത്രക്കാർ പരിഭ്രാന്തരാകേണ്ട സാഹചര്യമില്ലെന്നും സുരക്ഷാ പ്രോട്ടോക്കോളുകൾ കർശനമായി പാലിക്കുന്നുണ്ടെന്നും ഔദ്യോഗിക പത്രക്കുറിപ്പിൽ അറിയിച്ചു.
അതേസമയം, ഹോർമുസ് കടലിടുക്കിൽ നാല് ചരക്ക് കപ്പലുകൾക്ക് നേരെ ആക്രമണം ഉണ്ടായതായി യു.കെ മാരിടൈം ട്രേഡ് ഓപ്പറേഷൻസ് (UKMTO) അറിയിച്ചു. വടക്കൻ ഒമാൻ തീരത്ത് സ്ഫോടനത്തെത്തുടർന്ന് ഒരു കാർഗോ കപ്പലിന് തീപിടിക്കുകയും ജീവനക്കാരെ ഒഴിപ്പിക്കുകയും ചെയ്തു. ദുബായ്, റാസ് അൽ ഖൈമ തീരങ്ങൾക്ക് അകലെയും കപ്പലുകൾക്ക് നേരെ ആക്രമണ ശ്രമങ്ങൾ റിപ്പോർട്ട് ചെയ്തിട്ടുണ്ട്. മേഖലയിൽ സമുദ്ര സുരക്ഷാ ഭീഷണി വർദ്ധിക്കുന്ന സാഹചര്യത്തിൽ അന്താരാഷ്ട്ര ഏജൻസികൾ നിരീക്ഷണം ശക്തമാക്കി.
ഗൾഫ് രാഷ്ട്രങ്ങളെ ലക്ഷ്യമിട്ടുള്ള ഡ്രോൺ ആക്രമണങ്ങൾ ഇറാൻ തുടരുന്നതായാണ് റിപ്പോർട്ടുകൾ. യുഎഇയും കുവൈത്തും ഉൾപ്പെടെയുള്ള രാജ്യങ്ങൾ പ്രതിരോധ സംവിധാനങ്ങൾ ഉപയോഗിച്ച് ഇത്തരം നീക്കങ്ങളെ പ്രതിരോധിക്കുന്നുണ്ട്. എട്ട് ഡ്രോണുകൾ തകർത്തതായി കുവൈത്ത് വെളിപ്പെടുത്തി. സൗദി അറേബ്യയിലെ എണ്ണപ്പാടങ്ങൾക്കും എയർബേസുകൾക്കും നേരെയും ആക്രമണ ശ്രമങ്ങൾ തുടരുന്ന പശ്ചാത്തലത്തിൽ അമേരിക്കൻ സ്റ്റേറ്റ് സെക്രട്ടറി മാർക്കോ റൂബിയോ സൗദി അധികൃതരുമായി ചർച്ച നടത്തി.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
ദുബായ് വിമാനത്താവളത്തിന് സമീപം ഡ്രോൺ അവശിഷ്ടം വീണു; ഇന്ത്യക്കാരനടക്കം നാല് പേർക്ക് പരിക്ക്
