റിയാദ്: പശ്ചിമേഷ്യൻ സംഘർഷത്തിനിടെ പരിക്കേറ്റ് ചികിത്സയിലായിരുന്ന ഒരു അമേരിക്കൻ സൈനികൻ കൂടി മരിച്ചു. സൗദി അറേബ്യയിലെ യുഎസ് സൈനിക കേന്ദ്രത്തിന് നേരെ മാർച്ച് ഒന്നിന് ഇറാൻ നടത്തിയ ആക്രമണത്തിലാണ് ഇദ്ദേഹത്തിന് ഗുരുതരമായി പരിക്കേറ്റത്. മരിച്ച സൈനികന്റെ പേരുവിവരങ്ങൾ ഔദ്യോഗിക നടപടിക്രമങ്ങൾക്ക് ശേഷം മാത്രമേ പുറത്തുവിടുകയുള്ളൂവെന്ന് യുഎസ് സൈന്യം അറിയിച്ചു. ഇതോടെ മേഖലയിൽ ഇറാനെതിരായ ‘ഓപ്പറേഷൻ എപ്പിക് ഫ്യൂറി’ ആരംഭിച്ചതിന് ശേഷം കൊല്ലപ്പെട്ട അമേരിക്കൻ സൈനികരുടെ എണ്ണം ഏഴായി ഉയർന്നു.
അതേസമയം, വടക്കൻ ഇസ്രായേൽ അതിർത്തിയിൽ ഹിസ്ബുള്ള നടത്തിയ ശക്തമായ ആക്രമണത്തിൽ രണ്ട് ഇസ്രായേലി സൈനികർ കൊല്ലപ്പെട്ടു. അതിർത്തി മേഖലയിലെ ജനവാസ കേന്ദ്രങ്ങൾക്ക് നേരെയും വലിയ തോതിൽ ആക്രമണം ഉണ്ടായതായി ഇസ്രായേൽ സൈനിക വക്താവ് സ്ഥിരീകരിച്ചു. ഇറാനിലെ പുതിയ നേതൃമാറ്റവും ഇസ്രായേലിന്റെ കർശന നിലപാടുകളും മേഖലയിൽ യുദ്ധം കൂടുതൽ സങ്കീർണ്ണമാകുമെന്ന സൂചനയാണ് നൽകുന്നത്.
കൊല്ലപ്പെട്ട അയത്തൊള്ള അലി ഖമനെയിയുടെ രണ്ടാമത്തെ മകൻ മുജ്തബ ഖമനെയി ഇറാൻ്റെ പുതിയ പരമോന്നത നേതാവായി ചുമതലയേറ്റത് സൈനിക നീക്കങ്ങൾ കൂടുതൽ കടുപ്പിക്കാൻ കാരണമാകുമെന്ന് വിലയിരുത്തപ്പെടുന്നു. ഇറാൻ്റെ പുതിയ നേതൃത്വം സൈനിക നടപടികളുമായി ശക്തമായി മുന്നോട്ട് പോകുമെന്നാണ് പുറത്തുവരുന്ന റിപ്പോർട്ടുകൾ. ഈ പശ്ചാത്തലത്തിൽ മേഖലയിലെ സുരക്ഷാ സാഹചര്യം അതീവ ഗുരുതരമായി തുടരുകയാണ്.
പശ്ചിമേഷ്യയിലെ യുദ്ധം ഇനിയും നീണ്ടുനിൽക്കുമെന്നും ജനങ്ങൾ ജാഗ്രത പാലിക്കണമെന്നും ഇസ്രായേൽ സൈനിക മേധാവി ലെഫ്റ്റനന്റ് ജനറൽ ഇയാൽ സമീർ ഇന്ന് വ്യക്തമാക്കി. സംഘർഷം വ്യാപിക്കുന്ന സാഹചര്യത്തിൽ ലോകരാഷ്ട്രങ്ങൾ വലിയ ആശങ്കയിലാണ്. സമാധാന ശ്രമങ്ങൾ എങ്ങുമെത്താത്ത നിലയിൽ സൈനിക നീക്കങ്ങൾ തുടരുന്നത് ആഗോള തലത്തിൽ തന്നെ വലിയ പ്രതിസന്ധികൾക്ക് വഴിതുറക്കുമെന്ന് വിദഗ്ധർ ചൂണ്ടിക്കാട്ടുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Middle East War: American soldier injured in Iran attack dies, death toll rises to seven
