ഇന്ത്യയുമായുള്ള വ്യാപാരബന്ധം: വ്യാപാരവും ദേശീയ സുരക്ഷയും വേർതിരിക്കണമെന്ന് സസ്‌കാച്ചവൻ പ്രീമിയർ സ്കോട്ട് മോ

സസ്‌കാച്ചവൻ : ഇന്ത്യ, ഓസ്‌ട്രേലിയ, ജപ്പാൻ എന്നീ രാജ്യങ്ങൾ ഉൾപ്പെടുന്ന ഇൻഡോ-പസഫിക് വ്യാപാര പര്യടനത്തിന്റെ ഭാഗമായി പ്രധാനമന്ത്രി മാർക്ക് കാർണിക്കൊപ്പമാണ് സസ്‌കാച്ചവൻ പ്രീമിയർ സ്കോട്ട് മോ ഇന്ത്യയിലെത്തിയത്. പര്യടനത്തിനിടെ സാസ്‌കാച്ചവൻ ആസ്ഥാനമായുള്ള കാമെകോ (Cameco), ഇന്ത്യയ്ക്ക് യുറേനിയം വിതരണം ചെയ്യുന്നതിനായി 2.6 ബില്യൺ ഡോളറിന്റെ ബഹുവർഷ കരാറിൽ ഒപ്പുവെച്ചു. അമേരിക്കയ്ക്ക് പുറത്തുള്ള വ്യാപാര പങ്കാളികളെ കണ്ടെത്താൻ ശ്രമിക്കുമ്പോൾ ദേശീയ സുരക്ഷാ ആശങ്കകളെ വ്യാപാര ചർച്ചകളിൽ നിന്ന് ഒരു പരിധിവരെ മാറ്റിനിർത്തണമെന്നും സ്കോട്ട് മോ നിർദ്ദേശിച്ചു.

കാനഡയിൽ നടന്ന കൊലപാതകങ്ങൾ ഉൾപ്പെടെയുള്ള കുറ്റകൃത്യങ്ങളിൽ ഇന്ത്യൻ സർക്കാർ ഏജന്റുകൾക്ക് പങ്കുണ്ടെന്ന മുൻ പ്രധാനമന്ത്രി ജസ്റ്റിൻ ട്രൂഡോയുടെയും ആർസിഎംപിയുടെയും (RCMP) മുൻപത്തെ ആരോപണങ്ങൾ നിലനിൽക്കെയാണ് കാർണി സർക്കാരിന്റെ ഈ നയതന്ത്ര നീക്കം. വിദേശ ഇടപെടലുകളിൽ നിന്ന് കാനഡക്കാരെ സംരക്ഷിക്കാൻ ഫെഡറൽ സർക്കാർ ബാധ്യസ്ഥമാണെന്നും നിയമലംഘനങ്ങൾ ഉണ്ടാകുമ്പോൾ ആർസിഎംപി ശക്തമായ നടപടിയെടുക്കുമെന്ന് വിശ്വസിക്കുന്നതായും മോ പറഞ്ഞു. എന്നാൽ അഭിപ്രായവ്യത്യാസങ്ങൾ ഉള്ള രാജ്യങ്ങളുമായും ചർച്ചകൾ തുടരേണ്ടത് അത്യാവശ്യമാണെന്നും ലോകത്തിലെ ഏറ്റവും വലിയ ജനാധിപത്യ രാജ്യമായ ഇന്ത്യയുമായുള്ള സംഭാഷണങ്ങളിൽ നിന്ന് രാജ്യം മാറിനിൽക്കരുതെന്നും അദ്ദേഹം കൂട്ടിച്ചേർത്തു.

കാർണിയും ഇന്ത്യൻ പ്രധാനമന്ത്രി നരേന്ദ്ര മോദിയും കഴിഞ്ഞ ജൂണിന് ശേഷം മൂന്ന് തവണ കൂടിക്കാഴ്ച നടത്തിക്കഴിഞ്ഞു. ഈ വർഷം അവസാനത്തോടെ സമഗ്ര സാമ്പത്തിക പങ്കാളിത്ത കരാർ (CEPA) യാഥാർത്ഥ്യമാക്കാനാണ് ഇരുരാജ്യങ്ങളും ലക്ഷ്യമിടുന്നത്. ഇതിനുപുറമെ, കാർഷിക മേഖലയിലെ സഹകരണം ശക്തമാക്കുന്നതിനായി ‘കാനഡ-ഇന്ത്യ പൾസ് പ്രോട്ടീൻ സെന്റർ ഓഫ് എക്സലൻസ്’ രൂപീകരിക്കുന്നതിനെക്കുറിച്ചും ഇരുവിഭാഗവും ചർച്ച ചെയ്തു. 2007 മുതൽ 18 ബില്യൺ ഡോളറിലധികം മൂല്യമുള്ള ഉൽപ്പന്നങ്ങളാണ് സാസ്‌കാച്ചവൻ ഇന്ത്യയിലേക്ക് കയറ്റുമതി ചെയ്തിട്ടുള്ളത്.

ഇന്ത്യയുമായുള്ള ബന്ധം പുനഃസ്ഥാപിച്ചതിനെക്കുറിച്ചുള്ള വിമർശനങ്ങളോട് ‘ജാഗ്രതയും ഇടപെടലും’ (vigilance and engagement) എന്ന നയമാണ് തന്റെ സർക്കാരിനുള്ളതെന്ന് പ്രധാനമന്ത്രി മാർക്ക് കാർണി പ്രതികരിച്ചു. കുറ്റകൃത്യങ്ങളും സുരക്ഷാ വെല്ലുവിളികളും നേരിടുന്നതിനൊപ്പം തന്നെ രാജ്യങ്ങളുമായി ഉയർന്ന തലത്തിലുള്ള ചർച്ചകൾ തുടരേണ്ടതുണ്ടെന്നും അദ്ദേഹം വ്യക്തമാക്കി. അമേരിക്കയുമായുള്ള വ്യാപാര തർക്കം തുടരുന്ന സാഹചര്യത്തിൽ ചൈനയുമായും കാനഡ ഇതിനോടകം പുതിയ വ്യാപാര കരാറുകളിൽ ഒപ്പുവെച്ചിട്ടുണ്ട്.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt

Trade ties with India: Saskatchewan Premier Scott Moe says trade and national security should be separated