ഒട്ടാവ : മിഡിൽ ഈസ്റ്റിലെ വർദ്ധിച്ചുവരുന്ന സംഘർഷങ്ങൾ ആഗോള ഊർജ്ജ പ്രതിസന്ധിക്ക് കാരണമാകുമെന്ന് വിലയിരുത്തൽ. ലോകത്തെ പ്രധാന സമുദ്രപാതകളിലൊന്നായ ഹോർമുസ് കടലിടുക്കിലെ ഗതാഗത തടസ്സം ആഗോള വിപണിയിൽ എണ്ണവില ഉയരാൻ ഇടയാക്കിയിട്ടുണ്ട്. ഈ സാഹചര്യത്തിൽ കാനഡയുടെ ഊർജ്ജ മേഖലയിലേക്കുള്ള ആവശ്യം വർദ്ധിക്കാൻ സാധ്യതയുണ്ടെന്ന് വിദഗ്ധർ ചൂണ്ടിക്കാട്ടുന്നു. ലോകത്തെ മൊത്തം എണ്ണ, പ്രകൃതിവാതക വിതരണത്തിന്റെ അഞ്ചിലൊന്ന് കടന്നുപോകുന്ന പാതയാണിത്.
ഹോർമുസ് കടലിടുക്കിലൂടെയുള്ള ഇന്ധന നീക്കം തടസ്സപ്പെടുന്നത് ചൈന, ഇന്ത്യ, ജപ്പാൻ, ദക്ഷിണ കൊറിയ തുടങ്ങിയ ഏഷ്യൻ രാജ്യങ്ങളെയാണ് പ്രധാനമായും ബാധിക്കുക. ഇറാൻ ഈ പാത അടച്ചതോടെ പശ്ചിമേഷ്യൻ എണ്ണയെ ആശ്രയിക്കുന്നത് കുറയ്ക്കാൻ പല രാജ്യങ്ങളും നിർബന്ധിതരായതായി ആൽബർട്ട പെട്രോളിയം മാർക്കറ്റിംഗ് കമ്മീഷൻ മുൻ സിഇഒ റിച്ചാർഡ് മാസൺ പറഞ്ഞു. താൽക്കാലിക ആശ്വാസമെന്ന നിലയിൽ റഷ്യൻ എണ്ണയെ ആശ്രയിക്കേണ്ടി വരുമെന്നും അദ്ദേഹം സൂചിപ്പിച്ചു.
നിലവിലെ സാഹചര്യത്തിൽ ലോക വിപണിയിലേക്ക് കൂടുതൽ എണ്ണ എത്തിക്കാൻ കാനഡയ്ക്ക് സാധിക്കുമെന്ന് സാമ്പത്തിക വിദഗ്ധനായ കോളിൻ മാങ് പറഞ്ഞു. എന്നാൽ പശ്ചിമേഷ്യയിൽ നിന്നുണ്ടാകുന്ന ഉൽപ്പാദന കുറവ് പൂർണ്ണമായും പരിഹരിക്കാൻ കാനഡയ്ക്ക് ഇപ്പോൾ കഴിയില്ല. നിലവിലുള്ള അടിസ്ഥാന സൗകര്യങ്ങൾ ഉപയോഗിച്ച് ഏഷ്യൻ വിപണികളിലേക്ക് വലിയ തോതിൽ എണ്ണയും വാതകവും കയറ്റുമതി ചെയ്യുന്നതിന് പരിമിതികളുണ്ടെന്നും അദ്ദേഹം വ്യക്തമാക്കി.
കാനഡയെപ്പോലെ വിശ്വസനീയവും സുരക്ഷിതവുമായ ഊർജ്ജ സ്രോതസ്സുകളെയാണ് സഖ്യരാജ്യങ്ങൾ ഇപ്പോൾ ലക്ഷ്യമിടുന്നതെന്ന് കനേഡിയൻ ഊർജ്ജ മന്ത്രി ടിം ഹോഡ്സൺ പറഞ്ഞു. എന്നാൽ ഏഷ്യൻ രാജ്യങ്ങളിലേക്ക് വലിയ തോതിൽ കയറ്റുമതി നടത്താൻ റോക്കി പർവതനിരകൾ കടന്നുള്ള പൈപ്പ് ലൈൻ ശേഷി നിലവിൽ കാനഡയ്ക്കില്ല. പടിഞ്ഞാറൻ തീരത്ത് രണ്ടാമതൊരു പൈപ്പ് ലൈൻ നിർമ്മിക്കാൻ ഒട്ടാവയും ആൽബർട്ടയും തമ്മിൽ ധാരണാപത്രം ഒപ്പിട്ടിട്ടുണ്ടെങ്കിലും ഇതിന്റെ നിർമ്മാണം പൂർത്തിയാക്കാൻ വർഷങ്ങൾ വേണ്ടിവരും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Global energy crisis: Will Canada be the savior of Asian countries?
