ഒട്ടാവ: പുനരുപയോഗ ഊർജ മേഖലയിൽ പരസ്പര സഹകരണം ശക്തമാക്കുന്നതിനായി ഇന്ത്യയും കാനഡയും പുതിയ കരാറുകളിൽ ഒപ്പുവെച്ചു. സൗര ഊർജം, കാറ്റാടിപ്പാടങ്ങൾ, ഹൈഡ്രജൻ ഇന്ധന വികസനം എന്നിവയിൽ സംയുക്തമായി പ്രവർത്തിക്കാൻ പ്രധാനമന്ത്രി മാർക്ക് കാർണിയുടെ ഇന്ത്യൻ സന്ദർശനവേളയിലാണ് തീരുമാനമായത്. നാല് ദിവസത്തെ സന്ദർശനത്തിനായി ഇന്ത്യയിലെത്തിയ കാർണി, പ്രധാനമന്ത്രി നരേന്ദ്ര മോദിയുമായി നടത്തിയ കൂടിക്കാഴ്ചയിലാണ് തന്ത്രപ്രധാനമായ ഈ ഊർജ പങ്കാളിത്തത്തിന് രൂപം നൽകിയത്.
പുതിയ കരാർ പ്രകാരം ഇന്ത്യയുടെ നേതൃത്വത്തിലുള്ള അന്താരാഷ്ട്ര സൗര സഖ്യത്തിൽ (ഐ.എസ്.എ) കാനഡ ഔദ്യോഗികമായി അംഗമാകും. കൂടാതെ, ആഗോള ബയോഫ്യൂവൽസ് അലയൻസിൽ നിരീക്ഷക പദവിയിലായിരുന്ന കാനഡ ഇനി മുതൽ പൂർണ്ണ അംഗമായി പ്രവർത്തിക്കാനും തീരുമാനിച്ചു. സാങ്കേതിക കൈമാറ്റത്തിന്റെ ഭാഗമായി കാനഡയിലെ സൈമൺ ഫ്രേസർ സർവകലാശാല ഇന്ത്യയിലെ ഹൈഡ്രജൻ അസോസിയേഷനുമായി ചേർന്ന് ഗവേഷണങ്ങൾ നടത്തും. ഇന്ത്യയുടെ വൻകിട സൗര ഊർജ പദ്ധതികളിൽ നിന്നുള്ള പാഠങ്ങൾ ഉൾക്കൊള്ളാനും യൂറേനിയം ഉൾപ്പെടെയുള്ള ധാതുക്കൾ ഇന്ത്യക്ക് ലഭ്യമാക്കാനും ഈ ധാരണകൾ വഴിയൊരുക്കും.
ഇരുരാജ്യങ്ങളും തമ്മിലുള്ള ഈ നീക്കത്തെ കാനഡയിലെ ഗ്രീൻ എനർജി സംഘടനകൾ അഭിനന്ദിച്ചു. ചൈനയെപ്പോലെയുള്ള ഒറ്റ രാജ്യത്തെ മാത്രം ആശ്രയിക്കാതെ, ഇന്ത്യയെപ്പോലെയുള്ള വളർന്നുവരുന്ന വിപണിയുമായി സഹകരിക്കുന്നത് ഗുണകരമാണെന്ന് ക്ലീൻ എനർജി കാനഡ വ്യക്തമാക്കി. ഇന്ത്യ നിലവിൽ 271 ഗിഗാവാട്ടിലധികം (Gigawatt – GW) പുനരുപയോഗ ഊർജം ഉത്പാദിപ്പിക്കുന്നുണ്ടെന്നും ഇത് ആഗോളതലത്തിൽ വലിയ നേട്ടമാണെന്നും വിദഗ്ധർ ചൂണ്ടിക്കാട്ടി. പദ്ധതികളുടെ പുരോഗതി വിലയിരുത്തുന്നതിനായി ഈ വർഷം അവസാനം കാനഡയിൽ വെച്ച് ഇന്ത്യ-കാനഡ ഊർജ ഉച്ചകോടി സംഘടിപ്പിക്കാനും ഇരു രാജ്യങ്ങളും തീരുമാനിച്ചിട്ടുണ്ട്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/KdmCA708iUa8aT1Ocx1qs1?mode=gi_t
India and Canada sign historic agreements to cooperate in renewable energy sector
