കാനഡയിൽ ബജറ്റ് പ്രതിസന്ധി രൂക്ഷമാകുന്നു; ഭൂരിഭാഗം പ്രവിശ്യാ സർക്കാരുകളുടെ സാമ്പത്തിക ഭദ്രത അവതാളത്തിൽ

ഒട്ടാവ : കാനഡയിലെ ഭൂരിഭാഗം പ്രവിശ്യകളും വൻ സാമ്പത്തിക കമ്മി നേരിടുന്നതായി റിപ്പോർട്ട്. 2026-27 സാമ്പത്തിക വർഷത്തേക്കുള്ള ബജറ്റുകൾ പ്രഖ്യാപിക്കാനിരിക്കെ, ബജറ്റ് സന്തുലിതാവസ്ഥ നിലനിർത്താൻ പ്രവിശ്യകൾക്ക് സാധിക്കുന്നില്ലെന്ന് സാമ്പത്തിക വിദഗ്ധർ ചൂണ്ടിക്കാട്ടുന്നു. ഇതൊരു ദേശീയ പ്രശ്നമായി മാറിയിരിക്കുകയാണെന്നും ബജറ്റ് കമ്മി നികത്തുക എന്ന ലക്ഷ്യത്തിൽ നിന്ന് സർക്കാരുകൾ പിന്നോട്ട് പോയതായും റെജീന സർവകലാശാലയിലെ ഇക്കണോമിക്സ് പ്രൊഫസർ ജേസൺ ചൈൽഡ്സ് വ്യക്തമാക്കി. മാർച്ചിൽ ബജറ്റ് അവതരിപ്പിക്കാനിരിക്കുന്ന സസ്കാച്ചെവാൻ പ്രവിശ്യയും വലിയ സാമ്പത്തിക പ്രതിസന്ധി നേരിടുമെന്ന് പ്രീമിയർ സ്കോട്ട് മോ അറിയിച്ചു.

കാനഡയിലെ കനോല ഉൽപ്പന്നങ്ങൾക്ക് ചൈന ഏർപ്പെടുത്തിയ താരിഫുകളും ക്രൂഡ് ഓയിൽ വിലയിലുണ്ടായ ഇടിവുമാണ് പ്രവിശ്യകളുടെ വരുമാനത്തെ പ്രധാനമായും ബാധിച്ചത്. ഇതിനുപുറമെ, വർധിച്ചുവരുന്ന ജനസംഖ്യയ്ക്ക് അനുസൃതമായി ആരോഗ്യ സംരക്ഷണം, വിദ്യാഭ്യാസം, ഗതാഗതം എന്നീ മേഖലകളിൽ ചെലവ് കുത്തനെ ഉയർന്നതും പ്രതിസന്ധിക്ക് കാരണമായി. ജനസംഖ്യയിലെ പ്രായമായവരുടെ എണ്ണം കൂടുന്നതിനനുസരിച്ച് ആരോഗ്യ മേഖലയിലെ ചെലവ് നിയന്ത്രിക്കാൻ കഴിയാത്ത സാഹചര്യമാണെന്ന് പബ്ലിക് പോളിസി വിദഗ്ധൻ ജിം ഫാർണി വിലയിരുത്തി. കാനഡയിലെ എല്ലാ പ്രവിശ്യകളും നിലവിൽ ആഭ്യന്തര ഉൽപ്പാദനത്തിന്റെ (GDP) ഒരു ശതമാനമോ അതിലധികമോ ബജറ്റ് കമ്മി നേരിടുന്നുണ്ട്.

വിവിധ പ്രവിശ്യകൾ പുറത്തുവിട്ട കണക്കുകൾ പ്രകാരം ബ്രിട്ടീഷ് കൊളംബിയ 13.3 ബില്യൺ ഡോളറിന്റെ റെക്കോർഡ് കമ്മിയാണ് രേഖപ്പെടുത്തിയത്. നികുതി വർധനവിനും പൊതുമേഖലയിലെ 15,000 തസ്തികകൾ വെട്ടിക്കുറയ്ക്കാനും ഇത് കാരണമായി. നോവ സ്കോഷ്യ 1.2 ബില്യൺ ഡോളറിന്റെ കമ്മി പ്രതീക്ഷിക്കുമ്പോൾ, ആൽബർട്ട പ്രീമിയറും സമാനമായ സാമ്പത്തിക പ്രതിസന്ധിയെക്കുറിച്ച് മുന്നറിയിപ്പ് നൽകിയിട്ടുണ്ട്. സസ്കാച്ചെവാനിൽ ഒരു ബില്യൺ ഡോളറിന്റെ ബജറ്റ് കമ്മി ഉണ്ടായേക്കാമെന്നാണ് റിപ്പോർട്ടുകൾ സൂചിപ്പിക്കുന്നത്. കേന്ദ്ര സർക്കാരും നിലവിൽ വലിയ തോതിലുള്ള സാമ്പത്തിക കമ്മിയിലാണ് പ്രവർത്തിക്കുന്നത്.

രാജ്യത്തിന്റെ കടബാധ്യത തീർക്കുന്നതിനായി മാത്രം നികുതി വരുമാനത്തിന്റെ പത്ത് ശതമാനത്തോളം ചിലവാക്കേണ്ടി വരുന്നത് പൊതുസേവനങ്ങളെ ബാധിക്കുമെന്ന് വിദഗ്ധർ മുന്നറിയിപ്പ് നൽകുന്നു. കടം വർധിക്കുന്നത് രാജ്യത്തെ നിക്ഷേപ സാധ്യതകളെയും തൊഴിൽ മേഖലയെയും ദോഷകരമായി ബാധിക്കും. ബജറ്റ് സന്തുലിതാവസ്ഥയിലേക്ക് തിരികെ വരണമെങ്കിൽ സേവനങ്ങളിൽ വലിയ തോതിലുള്ള വെട്ടിക്കുറയ്ക്കലുകളോ നികുതി വർധനവോ ആവശ്യമാണ്. എന്നാൽ തന്റെ പ്രവിശ്യയിൽ സേവനങ്ങളിൽ കുറവ് വരുത്തുകയോ നികുതി വർദ്ധിപ്പിക്കുകയോ ചെയ്യില്ലെന്ന് സസ്കാച്ചെവാൻ പ്രീമിയർ സ്കോട്ട് മോ വ്യക്തമാക്കി.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt

Budget crisis deepens in Canada; financial stability of most provincial governments at risk