കാനഡയിൽ നിന്നുള്ള ചില കാർഷിക ഉൽപ്പന്നങ്ങളുടെ താരിഫ് ചൈന താത്കാലികമായി റദ്ദാക്കി

ഒട്ടാവ : കാനഡയിൽ നിന്നുള്ള ചില കാർഷിക ഉൽപ്പന്നങ്ങൾക്ക് ഏർപ്പെടുത്തിയിരുന്ന ഇറക്കുമതി താരിഫ് ചൈന ഞായറാഴ്ച മുതൽ താത്കാലികമായി റദ്ദാക്കി. കനോല മീൽ (Canola meal), പയർവർഗ്ഗങ്ങൾ എന്നിവയ്ക്ക് ഏർപ്പെടുത്തിയിരുന്ന 100 ശതമാനം തീരുവയും ഞണ്ടുകൾക്കും ലോബ്സ്റ്ററുകൾക്കും മേലുള്ള 25 ശതമാനം നികുതിയുമാണ് ഒഴിവാക്കിയതെന്ന് ചൈനീസ് ധനമന്ത്രാലയം അറിയിച്ചു. ഈ മാറ്റങ്ങൾ 2026 അവസാന വാരങ്ങൾ വരെ നിലനിൽക്കുമെന്നും മന്ത്രാലയം വ്യക്തമാക്കി.

പ്രധാനമന്ത്രി മാർക്ക് കാർണി അടുത്തിടെ നടത്തിയ ചൈന സന്ദർശനത്തിൽ പ്രസിഡന്റ് ഷി ജിൻപിങ്ങുമായി നടത്തിയ ചർച്ചയുടെ അടിസ്ഥാനത്തിലാണ് ഈ ധാരണ. കരാർ പ്രകാരം കാനഡ പ്രതിവർഷം 49,000 ചൈനീസ് ഇലക്ട്രിക് വാഹനങ്ങൾ 6.1 ശതമാനം തീരുവയിൽ ഇറക്കുമതി ചെയ്യും. ഇതിനു പകരമായി കനോല സീഡ് താരിഫ് കുറയ്ക്കാൻ ധാരണയുണ്ടായിരുന്നെങ്കിലും പുതിയ വിജ്ഞാപനത്തിൽ കനോല വിത്തുകളെക്കുറിച്ച് പരാമർശമില്ല. കനോല വിത്തുകൾക്ക് ചൈന ഏർപ്പെടുത്തിയ 76 ശതമാനം താരിഫ് സംബന്ധിച്ച ആന്റി ഡംപിങ് അന്വേഷണം മാർച്ചിൽ അവസാനിക്കുമെന്നാണ് പ്രതീക്ഷിക്കുന്നത്.

ചൈനയുടെ തീരുമാനത്തിൽ കാനഡയിലെ കർഷകർ പ്രതീക്ഷ പ്രകടിപ്പിച്ചെങ്കിലും ഇനിയും ഏറെ നടപടികൾ പൂർത്തിയാക്കാനുണ്ടെന്ന് അവർ ചൂണ്ടിക്കാട്ടി. തീരുവ റദ്ദാക്കിയതോടെ കനോലയുടെ വിലയിൽ വർധനവുണ്ടായിട്ടുള്ളത് ആശ്വാസകരമാണെന്ന് കർഷകർ വ്യക്തമാക്കി. എന്നാൽ കനോല ഓയിലിന് മേൽ ഇപ്പോഴും 100 ശതമാനം നികുതി തുടരുന്നതായി കർഷക പ്രതിനിധിയായ വാറൻ എലിസ് പറഞ്ഞു. കഴിഞ്ഞ വർഷം ചൈന ഏർപ്പെടുത്തിയ കനത്ത താരിഫ് മൂലം കാർഷിക മേഖലയ്ക്ക് ഏകദേശം 100 കോടി ഡോളറിന്റെ നഷ്ടമുണ്ടായതായാണ് കണക്കാക്കുന്നത്.

കാനഡയും ചൈനയും തമ്മിലുള്ള വ്യാപാര ബന്ധം മെച്ചപ്പെടുന്നതിന്റെ സൂചനയാണിതെന്ന് സാമ്പത്തിക വിദഗ്ധനായ ഷിയു-യിക് ഔ വിലയിരുത്തി. യുണൈറ്റഡ് സ്റ്റേറ്റ്സുമായുള്ള വ്യാപാര അനിശ്ചിതത്വങ്ങൾക്കിടയിൽ കർഷകർക്ക് വിപണി വൈവിധ്യവത്കരിക്കാൻ ഈ തീരുമാനം സഹായിക്കുമെന്ന് അദ്ദേഹം പറഞ്ഞു. അതേസമയം, പന്നിയിറച്ചി (Pork) വിപണിയിലും സമാനമായ ഇളവുകൾ ലഭ്യമാക്കാൻ ഫെഡറൽ ഗവൺമെന്റ് ഇടപെടണമെന്ന് മാനിറ്റോബ പ്രീമിയർ വബ് കിന്യൂ ആവശ്യപ്പെട്ടു. കർഷകർക്ക് കൃത്യമായ പിന്തുണ ഉറപ്പാക്കാൻ ഒട്ടാവയുടെ ഭാഗത്തുനിന്ന് ശക്തമായ നീക്കങ്ങൾ വേണമെന്നും കാർഷിക പ്രതിനിധികൾ ആവശ്യപ്പെട്ടു.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt

China temporarily lifts tariffs on some agricultural products from Canada