ലെബനനിൽ ഇസ്രായേലിന്റെ കനത്ത വ്യോമാക്രമണം; ഹിസ്ബുള്ള നേതാവ് മുഹമ്മദ് റാദ് കൊല്ലപ്പെട്ടതായി റിപ്പോർട്ട്

ലെബനീസ് തലസ്ഥാനമായ ബെയ്റൂട്ടിലും തെക്കൻ ലെബനനിലും ഇസ്രായേൽ നടത്തിയ അതിശക്തമായ വ്യോമാക്രമണങ്ങളിൽ 31 പേർ കൊല്ലപ്പെട്ടു. ഹിസ്ബുള്ളയുടെ പാർലമെന്ററി വിഭാഗം തലവൻ മുഹമ്മദ് റാദ് ബെയ്റൂട്ടിലുണ്ടായ ആക്രമണത്തിൽ കൊല്ലപ്പെട്ടതായാണ് പുറത്തുവരുന്ന പ്രാഥമിക റിപ്പോർട്ടുകൾ. ഹിസ്ബുള്ളയുടെ ശക്തികേന്ദ്രമായ ദാഹിയ ഉൾപ്പെടെയുള്ള പ്രദേശങ്ങളെ ലക്ഷ്യമിട്ടായിരുന്നു ഇസ്രായേൽ പ്രതിരോധ സേനയുടെ (IDF) നീക്കം. ആക്രമണത്തിൽ 140-ലധികം പേർക്ക് പരിക്കേറ്റതായും ലെബനൻ ആരോഗ്യ മന്ത്രാലയം സ്ഥിരീകരിച്ചു.

ബെയ്റൂട്ടിന്റെ തെക്കൻ പ്രാന്തപ്രദേശങ്ങളിൽ നടന്ന ആക്രമണത്തിൽ 20 പേരും തെക്കൻ ലെബനനിൽ 11 പേരുമാണ് കൊല്ലപ്പെട്ടത്. ഹിസ്ബുള്ളയുടെ മുതിർന്ന കമാൻഡർമാരെയും പ്രവർത്തന കേന്ദ്രങ്ങളെയും ലക്ഷ്യം വെച്ചാണ് തങ്ങൾ ആക്രമണം നടത്തിയതെന്ന് ഇസ്രായേൽ സൈന്യം വ്യക്തമാക്കി. വരും ദിവസങ്ങളിലും ആക്രമണം ശക്തമായി തുടരുമെന്ന സൂചന നൽകിയ ഐഡിഎഫ്, മേഖലയിലുണ്ടാകുന്ന ഏത് തരം സംഘർഷങ്ങൾക്കും ഹിസ്ബുള്ള മാത്രമായിരിക്കും ഉത്തരവാദിയെന്ന് മുന്നറിയിപ്പും നൽകി.

ഇറാൻ പരമോന്നത നേതാവായിരുന്ന ആയത്തുള്ള അലി ഖമേനിയുടെ വധത്തിന് പ്രതികാരമായി ഹിസ്ബുള്ള നടത്തിയ മിസൈൽ-ഡ്രോൺ ആക്രമണങ്ങൾക്ക് പിന്നാലെയാണ് ഇസ്രായേൽ തിരിച്ചടി കടുപ്പിച്ചത്. ഹൈഫയ്ക്ക് തെക്കുള്ള ഇസ്രായേൽ സൈനിക താവളത്തിന് നേരെ ഹിസ്ബുള്ള കഴിഞ്ഞ ദിവസം ആക്രമണം നടത്തിയിരുന്നു. ഖമേനിയുടെ കൊലപാതകത്തിന് പകരം ചോദിക്കുമെന്ന് പ്രഖ്യാപിച്ച ഹിസ്ബുള്ള, ഇസ്രായേലിന്റെ വിവിധ ഭാഗങ്ങളിലേക്ക് റോക്കറ്റുകൾ വിക്ഷേപിച്ചതായി പ്രസ്താവനയിലൂടെ അറിയിച്ചു.

ആക്രമണം ശക്തമായതോടെ തെക്കൻ ലെബനനിലെയും കിഴക്കൻ ലെബനനിലെയും ഡസൻ കണക്കിന് ഗ്രാമങ്ങളിലുള്ളവരോട് ഉടൻ ഒഴിഞ്ഞുപോകാമെന്ന് ഇസ്രായേൽ സൈന്യം ആവശ്യപ്പെട്ടു. ജനസാന്ദ്രതയേറിയ ബെയ്റൂട്ടിലെ തെക്കൻ ജില്ലകളിൽ നിന്ന് ആളുകളെ ഒഴിപ്പിക്കുന്നത് തുടരുകയാണെന്ന് ലെബനീസ് മാധ്യമങ്ങൾ റിപ്പോർട്ട് ചെയ്തു. ഹിസ്ബുള്ളയുടെ സൈനിക കേന്ദ്രങ്ങൾക്ക് സമീപം താമസിക്കുന്നവർ സുരക്ഷിത സ്ഥാനങ്ങളിലേക്ക് മാറണമെന്നാണ് ഇസ്രായേലിന്റെ കർശന നിർദ്ദേശം.

ഇരുവിഭാഗവും വിട്ടുവീഴ്ചയ്ക്ക് തയ്യാറാകാത്തതോടെ പശ്ചിമേഷ്യയിലെ സാഹചര്യം അതീവ ഗുരുതരമായി തുടരുകയാണ്. ഹിസ്ബുള്ളയുടെ ഉന്നത നേതാക്കൾ കൊല്ലപ്പെട്ടെന്ന വാർത്തകൾ പുറത്തുവന്നതോടെ വരും മണിക്കൂറുകളിൽ ശക്തമായ തിരിച്ചടി ഉണ്ടാകുമെന്ന് ഇറാൻ അനുകൂല മാധ്യമങ്ങൾ റിപ്പോർട്ട് ചെയ്യുന്നു. ഒരു പൂർണ്ണ യുദ്ധത്തിലേക്ക് മേഖല നീങ്ങുന്നത് തടയാൻ അന്താരാഷ്ട്ര സമൂഹം ഇടപെടണമെന്ന ആവശ്യം ശക്തമാണെങ്കിലും സംഘർഷം കൂടുതൽ പ്രദേശങ്ങളിലേക്ക് വ്യാപിക്കുകയാണ്.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt

Heavy Israeli airstrike in Lebanon; Hezbollah leader Mohammed Ra’ad reportedly killed