ജറുസലേം: പരമോന്നത നേതാവ് ആയത്തുള്ള അലി ഖമനേയിയുടെ വധത്തിന് പ്രതികാരമായി ഇസ്രായേലിന് നേരെ ഇറാന്റെ അതിശക്തമായ മിസൈൽ ആക്രമണം. ശനിയാഴ്ച ആരംഭിച്ച സംഘർഷത്തിന് ശേഷം ഇസ്രായേൽ നേരിടുന്ന ഏറ്റവും വലിയ നാശനഷ്ടമാണിത്. ഞായറാഴ്ച്ച രാത്രി ഇറാൻ തൊടുത്തുവിട്ട ബാലിസ്റ്റിക് മിസൈലുകൾ പടിഞ്ഞാറൻ ജറുസലേമിലെ ജനവാസ മേഖലയിൽ നേരിട്ട് പതിച്ചു. ആക്രമണത്തിൽ ഒരു സിനഗോഗ് പൂർണ്ണമായും തകരുകയും ഒൻപത് പേർ കൊല്ലപ്പെടുകയും ചെയ്തു. 40 ഓളം പേർക്ക് പരിക്കേറ്റതായാണ് പ്രാഥമിക വിവരം. ഇതിൽ നാല് വയസ്സുകാരൻ ഉൾപ്പെടെ നാല് പേരുടെ നില അതീവ ഗുരുതരമായി തുടരുകയാണ്.
അമേരിക്കൻ-ഇസ്രായേൽ സംയുക്ത വ്യോമാക്രമണത്തിൽ കൊല്ലപ്പെട്ട ആയത്തുള്ള അലി ഖമനേയിയുടെ മരണത്തിന് പകരമായി ‘ഓപ്പറേഷൻ ട്രൂ പ്രോമിസ്’ എന്ന പേരിലാണ് ഇറാൻ സൈനിക നീക്കം നടത്തുന്നത്. ജറുസലേമിൽ നിന്ന് 30 കിലോമീറ്റർ അകലെയുള്ള പാർപ്പിട സമുച്ചയത്തിന് മുകളിലാണ് മിസൈൽ പതിച്ചത്. സ്ഫോടനത്തിന്റെ ആഘാതത്തിൽ കെട്ടിടത്തിന്റെ ഒരു ഭാഗം തകർന്നു വീണു. സമീപത്തെ സിനഗോഗിനും ബോംബ് ഷെൽട്ടറുകൾക്കും കനത്ത നാശനഷ്ടങ്ങൾ സംഭവിച്ചിട്ടുണ്ട്. തകർന്ന കെട്ടിടാവശിഷ്ടങ്ങൾക്കിടയിൽ കൂടുതൽ ആളുകൾ കുടുങ്ങിക്കിടക്കുന്നുണ്ടോ എന്ന് കണ്ടെത്താൻ അത്യാധുനിക ഉപകരണങ്ങൾ ഉപയോഗിച്ച് രക്ഷാപ്രവർത്തനം പുരോഗമിക്കുകയാണ്.
ഇറാന്റെ മിസൈലുകളെ പ്രതിരോധിക്കാൻ ഇസ്രായേൽ വ്യോമപ്രതിരോധ സംവിധാനങ്ങൾ പരമാവധി ശ്രമിക്കുന്നുണ്ടെങ്കിലും എല്ലാ മിസൈലുകളെയും തടയാൻ കഴിയില്ലെന്ന് ഇസ്രായേൽ ഡിഫൻസ് ഫോഴ്സ് (IDF) മുന്നറിയിപ്പ് നൽകി. നിലവിലെ സുരക്ഷാ സാഹചര്യം കണക്കിലെടുത്ത് രാജ്യത്തെ സ്കൂളുകൾക്ക് അവധി പ്രഖ്യാപിച്ചു. വിദ്യാർത്ഥികൾക്ക് പഠനം ഓൺലൈൻ വഴി തുടരാനാണ് നിർദ്ദേശം നൽകിയിരിക്കുന്നത്. ആക്രമണത്തെത്തുടർന്ന് രാജ്യത്തുടനീളം അതീവ ജാഗ്രതാ നിർദ്ദേശം പുറപ്പെടുവിച്ചിരിക്കുകയാണ്. ജനങ്ങൾ സുരക്ഷിത സ്ഥാനങ്ങളിൽ തുടരണമെന്ന് സൈന്യം ആവശ്യപ്പെട്ടു.
മേഖലയിൽ യുദ്ധം കടുത്തതോടെ രാജ്യാന്തര സമൂഹം ആശങ്കയിലാണ്. ഇറാന്റെ പ്രത്യാക്രമണത്തിന് തിരിച്ചടിയായി ഇസ്രായേൽ വലിയ സൈനിക നീക്കത്തിന് ഒരുങ്ങുന്നതായാണ് സൂചന. പശ്ചിമേഷ്യയെ ഒന്നടങ്കം ബാധിക്കുന്ന തരത്തിലേക്ക് സംഘർഷം വളരുന്നത് തടയാൻ ആഗോള ശക്തികൾ ഇടപെടുന്നുണ്ടെങ്കിലും, തന്ത്രപ്രധാന കേന്ദ്രങ്ങളെ ലക്ഷ്യമിട്ടുള്ള ആക്രമണങ്ങൾ ഇരുപക്ഷവും തുടരുകയാണ്. ജറുസലേമിലെ ഇന്നത്തെ ആക്രമണം വരും ദിവസങ്ങളിൽ യുദ്ധത്തിന്റെ ഗതി മാറ്റുമെന്നാണ് വിലയിരുത്തപ്പെടുന്നത്.
several-killed-in-israel-beit-shemesh-as-iranian-ballistic-missile-hits-residential-complex
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
