വാഷിംഗ്ടൺ: ഇറാൻ പരമോന്നത നേതാവ് ആയത്തുല്ല അലി ഖാംനഈ കൊല്ലപ്പെട്ടതിന് പിന്നാലെ മേഖലയിൽ സംഘർഷം കടുക്കുന്നു. യുഎസിനും ഇസ്രായേലിനുമെതിരെ ഇറാൻ തിരിച്ചടി പ്രഖ്യാപിച്ച സാഹചര്യത്തിൽ, ഇറാനെതിരെ അഭൂതപൂർവമായ ശക്തി പ്രയോഗിക്കുമെന്ന് അമേരിക്കൻ പ്രസിഡന്റ് ഡൊണാൾഡ് ട്രംപ് മുന്നറിയിപ്പ് നൽകി. “മുമ്പ് ഒരിക്കലും കണ്ടിട്ടില്ലാത്ത വിധം അതിശക്തമായ തിരിച്ചടി ഇറാൻ നേരിടേണ്ടി വരും. അവർ ആക്രമണത്തിന് മുതിരാതിരിക്കുന്നതാണ് നല്ലത്” എന്ന് ട്രംപ് എക്സിലൂടെ (X) വ്യക്തമാക്കി. അമേരിക്കൻ സൈനിക താവളങ്ങൾക്ക് നേരെ ഇറാൻ ആക്രമണം നടത്തിയെന്ന അവകാശവാദങ്ങൾക്ക് പിന്നാലെയാണ് ട്രംപിന്റെ ഈ പ്രസ്താവന.
ഖാംനഈ തന്റെ ഓഫീസിൽ വെച്ച് കൊല്ലപ്പെട്ടതായും രാജ്യത്ത് 40 ദിവസത്തെ ദുഃഖാചരണം പ്രഖ്യാപിച്ചതായും ഇറാനിയൻ സ്റ്റേറ്റ് മീഡിയ റിപ്പോർട്ട് ചെയ്തതിന് പിന്നാലെയാണ് നയതന്ത്ര പോര് മുറുകുന്നത്. 1979-ലെ ഇസ്ലാമിക വിപ്ലവത്തിന് ശേഷം ഇറാന്റെ രാഷ്ട്രീയ-മത തലപ്പത്ത് നിർണ്ണായക സ്വാധീനം ചെലുത്തിയ നേതാവായിരുന്നു ഖാംനഈ. അദ്ദേഹത്തിന്റെ വിയോഗം ഇറാന്റെ ഭരണകൂടത്തിന് വലിയ ആഘാതമാണ് സൃഷ്ടിച്ചിരിക്കുന്നത്. ഈ സാഹചര്യത്തിൽ ഇറാൻ നടത്തുന്ന ഏതൊരു നീക്കത്തെയും സൈനികമായി നേരിടുമെന്ന ഉറച്ച നിലപാടിലാണ് അമേരിക്കയും ഇസ്രായേലും.
ഇറാന്റെ ഭാഗത്തുനിന്ന് അതിശക്തമായ ആക്രമണം ഉണ്ടാകുമെന്ന് പ്രഖ്യാപനമുണ്ടായതോടെ പശ്ചിമേഷ്യയിലെ യുഎസ് സൈനിക കേന്ദ്രങ്ങൾ അതീവ ജാഗ്രതയിലാണ്. അമേരിക്കയുടെയും ഇസ്രായേലിന്റെയും സുരക്ഷയ്ക്ക് ഭീഷണിയാകുന്ന ഒന്നിനെയും വെച്ചുപൊറുപ്പിക്കില്ലെന്ന് ട്രംപ് ആവർത്തിച്ചു. പശ്ചിമേഷ്യൻ രാജ്യങ്ങളിലെ അമേരിക്കൻ താവളങ്ങളെ ലക്ഷ്യമിട്ട് ഇറാൻ മിസൈൽ-ഡ്രോൺ ആക്രമണങ്ങൾ തുടരുന്നതിനിടെ ട്രംപ് നൽകിയ ഈ താക്കീത് ഒരു പൂർണ്ണ തോതിലുള്ള യുദ്ധത്തിന്റെ സൂചനയായാണ് രാഷ്ട്രീയ നിരീക്ഷകർ കാണുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Donald Trump warns Iran of ‘unprecedented force’
