ഒട്ടാവ: കാനഡയിലെ സോഷ്യൽ മീഡിയയിൽ വ്യാജ വാർത്തകൾ പ്രചരിപ്പിക്കുന്നത് ചുരുക്കം ചില ആളുകൾ മാത്രമാണെന്ന് പുതിയ പഠന റിപ്പോർട്ട്. 2023 മുതൽ 2025 വരെയുള്ള കാലയളവിൽ ടിക്ടോക്, എക്സ്, ഇൻസ്റ്റാഗ്രാം തുടങ്ങിയ മാധ്യമങ്ങളിലെ 1.4 കോടി പോസ്റ്റുകൾ വിശകലനം ചെയ്തതിൽ നിന്നാണ് ഈ കണ്ടെത്തൽ. ഏകദേശം നൂറോളം വരുന്ന അതീവ സജീവമായ അക്കൗണ്ടുകളാണ് ഇത്തരം ഉള്ളടക്കങ്ങളുടെ 70 ശതമാനവും പ്രചരിപ്പിക്കുന്നതെന്ന് മക്ഗിൽ സർവ്വകലാശാലയും ടൊറന്റോ സർവ്വകലാശാലയും സംയുക്തമായി നടത്തിയ പഠനം വ്യക്തമാക്കുന്നു.
സർക്കാർ സ്ഥാപനങ്ങൾ, പൊതുജനാരോഗ്യം, കാലാവസ്ഥാ വ്യതിയാനം എന്നിവയുമായി ബന്ധപ്പെട്ട തെറ്റായ വിവരങ്ങളാണ് പ്രധാനമായും പ്രചരിപ്പിക്കപ്പെടുന്നത്. കോവിഡ് പോലുള്ള ആരോഗ്യ പ്രതിസന്ധികൾ ജനങ്ങളെ നിയന്ത്രിക്കാൻ സർക്കാർ ബോധപൂർവ്വം സൃഷ്ടിക്കുന്നതാണെന്നും, മാധ്യമങ്ങളും ഉന്നത ഉദ്യോഗസ്ഥരും ചേർന്ന് പൊതുജനങ്ങളെ തെറ്റിദ്ധരിപ്പിക്കുന്നുവെന്നുമുള്ള വാദങ്ങൾ ഇതിൽ ഉൾപ്പെടുന്നു. സോഷ്യൽ മീഡിയ ഇൻഫ്ലുവൻസർമാരാണ് ഇത്തരം പോസ്റ്റുകളുടെ 87 ശതമാനവും നിർമ്മിക്കുന്നത്. ഇത്തരം വ്യാജ സിദ്ധാന്തങ്ങൾ വിശ്വസിക്കുന്നവരുടെ എണ്ണം കുറവാണെങ്കിലും, ജനാധിപത്യ പ്രക്രിയയിലും പൊതുസ്ഥാപനങ്ങളിലും ജനങ്ങൾക്കുള്ള വിശ്വാസം തകർക്കാൻ ഇത് കാരണമാകുമെന്ന് ഗവേഷണത്തിന് നേതൃത്വം നൽകിയ മാത്ത്യു ലവിഗ്ന് ചൂണ്ടിക്കാട്ടി.
വിവിധ പ്ലാറ്റ്ഫോമുകളിൽ ‘എക്സ്’ (X) വഴിയാണ് ഇത്തരം ആശയങ്ങൾക്ക് ഏറ്റവും കൂടുതൽ പ്രചാരവും പ്രതികരണവും ലഭിക്കുന്നത്. പഠനവിധേയമാക്കിയ പോസ്റ്റുകളിൽ ലഭിച്ച ലൈക്കുകളിൽ 70 ശതമാനവും ഈ പ്ലാറ്റ്ഫോമിലാണ് രേഖപ്പെടുത്തിയത്. സ്കൂൾ പാഠ്യപദ്ധതികളെക്കുറിച്ചും മാധ്യമ-ഉദ്യോഗസ്ഥ കൂട്ടുകെട്ടിനെക്കുറിച്ചുമുള്ള ഗൂഢാലോചന വാദങ്ങൾക്കാണ് കാനഡക്കാർക്കിടയിൽ കൂടുതൽ സ്വാധീനമുള്ളതെന്നും സർവ്വേ ഫലങ്ങൾ കാണിക്കുന്നു. തെറ്റായ വിവരങ്ങൾ തടയുന്നതിനായി തിരഞ്ഞെടുപ്പ് കാലങ്ങളിലും മറ്റും പ്രത്യേക ബോധവൽക്കരണ പരിപാടികൾ സംഘടിപ്പിക്കണമെന്നും ഉപഭോക്താക്കൾക്ക് തങ്ങളുടെ സോഷ്യൽ മീഡിയ ഫീഡുകളിൽ കൂടുതൽ നിയന്ത്രണം നൽകണമെന്നും റിപ്പോർട്ട് ശുപാർശ ചെയ്യുന്നു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/KdmCA708iUa8aT1Ocx1qs1?mode=gi_t
14 million posts, 100 accounts: Researchers uncover roots of fake news network in Canada
