വാങ്കൂവർ: പുതിയ ജീൻ-എഡിറ്റിംഗ് സാങ്കേതികവിദ്യയായ ‘പ്രൈം എഡിറ്റിംഗ്’ വഴി അപൂർവ ജനിതക രോഗം ഭേദമാക്കി ബി.സി. സ്വദേശിയായ ടൈ സ്പെർളെ. പ്രതിരോധ വ്യവസ്ഥയെ ബാധിക്കുന്ന ‘ക്രോണിക് ഗ്രാനുലോമാറ്റസ് ഡിസീസ്’ എന്ന ഗുരുതരമായ അവസ്ഥയിൽ നിന്നാണ് പത്തൊൻപതുകാരനായ ഈ യുവാവ് പൂർണ്ണമായി സുഖം പ്രാപിച്ചത്. അമേരിക്ക ആസ്ഥാനമായുള്ള ‘പ്രൈം മെഡിസിൻ’ നടത്തിയ ക്ലിനിക്കൽ പരീക്ഷണത്തിന്റെ ഭാഗമായാണ് ലോകത്താദ്യമായി ഈ ചികിത്സാ രീതി ഒരു മനുഷ്യനിൽ പ്രയോഗിച്ചത്. ഇതോടെ ജനിതക രോഗങ്ങൾക്കുള്ള ചികിത്സാ രംഗത്ത് വലിയൊരു നാഴികക്കല്ലാണ് പിന്നിട്ടിരിക്കുന്നത്.
അഞ്ചാം വയസ്സിൽ രോഗം സ്ഥിരീകരിച്ച സ്പെർളെ, കഴിഞ്ഞ ഒരു പതിറ്റാണ്ടിലേറെയായി കടുത്ത അണുബാധ ഭീഷണിയിലായിരുന്നു. സാധാരണയായി ദീർഘായുസ്സ് ലഭിക്കാത്ത ഇത്തരം രോഗികൾക്ക് അനുയോജ്യമായ ദാതാവിനെ ലഭിക്കുകയാണെങ്കിൽ ബോൺ-മാരോ ട്രാൻസ്പ്ലാന്റ് മാത്രമായിരുന്നു ഏക പോംവഴി. എന്നാൽ സ്പെർളെയ്ക്ക് അനുയോജ്യമായ ദാതാവിനെ കണ്ടെത്താൻ കഴിയാതിരുന്ന സാഹചര്യത്തിലാണ് ശാസ്ത്രലോകം ജീൻ-എഡിറ്റിംഗ് പരീക്ഷിച്ചത്. മോണ്ട്രിയലിലെ സെന്റ്-ജസ്റ്റിൻ യൂണിവേഴ്സിറ്റി ഹോസ്പിറ്റലിൽ വെച്ചായിരുന്നു ഈ നിർണായക ചികിത്സ നടന്നത്. ചികിത്സയുടെ ഫലം കഴിഞ്ഞ ഡിസംബറിലെ ‘ന്യൂ ഇംഗ്ലണ്ട് ജേണൽ ഓഫ് മെഡിസിനിൽ’ പ്രസിദ്ധീകരിച്ചിട്ടുണ്ട്.
രോഗിയുടെ ശരീരത്തിൽ നിന്ന് കോശങ്ങൾ പുറത്തെടുത്ത് അതിലെ ഡിഎൻഎ പിഴവുകൾ തിരുത്തിയ ശേഷം തിരികെ പ്രവേശിപ്പിക്കുന്ന രീതിയാണ് ഇവിടെ അവലംബിച്ചത്. സ്വന്തം കോശങ്ങൾ തന്നെ ഉപയോഗിക്കുന്നതിനാൽ ശരീരം ഇവയെ നിരസിക്കില്ലെന്നതാണ് ഈ സാങ്കേതികവിദ്യയുടെ പ്രധാന സവിശേഷതയെന്ന് പീഡിയാട്രിക് ഇമ്യൂണോളജിസ്റ്റ് ഡോ. സ്റ്റുവർട്ട് ടർവി വ്യക്തമാക്കി. നിലവിൽ ബ്രിട്ടീഷ് കൊളംബിയ സർവകലാശാലയിലെ വിദ്യാർത്ഥിയായ സ്പെർളെ ഇപ്പോൾ മരുന്നുകളുടെ സഹായമില്ലാതെ പൂർണ്ണ ആരോഗ്യവാനായി ജീവിക്കുന്നു. വരും വർഷങ്ങളിൽ കൂടുതൽ ജനിതക രോഗികൾക്ക് ഈ ചികിത്സാ രീതി വലിയ പ്രതീക്ഷ നൽകുന്നതാണെന്ന് ബി.സി. ആരോഗ്യ മന്ത്രി ജോസി ഓസ്ബോൺ അഭിപ്രായപ്പെട്ടു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/KdmCA708iUa8aT1Ocx1qs1?mode=gi_t
Science reverses death sentence; World's first cure through genetic revolution; 19-year-old man returns to life in BC
