ലോക പ്രശസ്ത ഗുസ്തി താരം ‘ബ്രിട്ടീഷ് ബുൾഡോഗ്’ ഡേവി ബോയ് സ്മിത്തിന്റെ ഓർമ്മയ്ക്കായി കുടുംബത്തിന് ലഭിച്ച ഡബ്ല്യുഡബ്ല്യുഇ ഹാൾ ഓഫ് ഫെയിം മോതിരം കണ്ടെടുത്തു. ലോയ്ഡ്മിൻസ്റ്ററിൽ വെച്ച് കഴിഞ്ഞ ബുധനാഴ്ചയാണ് വിലമതിക്കാനാവാത്ത ഈ മോതിരം മോഷണം പോയത്. ബ്രിട്ടീഷ് ബുൾഡോഗിന്റെ മകനും ഗുസ്തി താരവുമായ ഹാരി സ്മിത്ത് (ഡേവി ബോയ് സ്മിത്ത് ജൂനിയർ) കനേഡിയൻ റെസ്ലിംഗ് എലൈറ്റ് (CWE) ടൂറിനിടെ താമസിച്ചിരുന്ന സ്ഥലത്ത് നിന്നാണ് മറ്റ് സാധനങ്ങളോടൊപ്പം മോതിരവും കവർന്നത്.
വെസ്റ്റേൺ കാനഡ ടൂറിനിടെ ലോയ്ഡ്മിൻസ്റ്ററിൽ വെച്ച് റെസ്ലിംഗ് പ്രൊമോഷൻ വാഹനത്തിൽ നിന്നാണ് മോതിരം ഉൾപ്പെടെയുള്ള സ്മരണികകൾ മോഷണം പോയത്. വസ്ത്രങ്ങൾ, ബെൽറ്റുകൾ, മറ്റ് ആഭരണങ്ങൾ എന്നിവയ്ക്കൊപ്പമാണ് അച്ഛന്റെ സ്മരണയ്ക്കായി ഹാരി സൂക്ഷിച്ചിരുന്ന ഈ മോതിരവും നഷ്ടപ്പെട്ടത്. തുടർന്ന് നടന്ന തിരച്ചിലിൽ മോഷണം പോയ വസ്ത്രങ്ങളും മറ്റ് ഉപകരണങ്ങളും അടുത്തുള്ള ഇടവഴിയിൽ നിന്ന് ലഭിച്ചെങ്കിലും മോതിരം കണ്ടെത്താനായിരുന്നില്ല. ഇതോടെ ഹാരി സ്മിത്ത് പോലീസിൽ പരാതി നൽകുകയും സോഷ്യൽ മീഡിയ വഴി ആരാധകരുടെ സഹായം തേടുകയും ചെയ്തു.
മോഷണം പോയ മോതിരം പണയപ്പെടുത്താൻ മോഷ്ടാക്കൾ നടത്തിയ ശ്രമമാണ് ഒടുവിൽ വഴിത്തിരിവായത്. മോതിരം വിൽക്കാൻ ശ്രമിക്കുന്നതിനിടെ രഹസ്യവിവരം ലഭിച്ച പോലീസ് സ്ഥലത്തെത്തുകയും മോതിരം കസ്റ്റഡിയിലെടുക്കുകയുമായിരുന്നു. ലക്ഷക്കണക്കിന് രൂപ വിലമതിക്കുന്ന മോതിരം അച്ഛന്റെ പൈതൃകത്തിന്റെ ഭാഗമാണെന്നും അത് തിരികെ കിട്ടിയതിൽ വലിയ സന്തോഷമുണ്ടെന്നും ഹാരി സ്മിത്ത് തന്റെ ഔദ്യോഗിക ഫേസ്ബുക്ക് പേജിലൂടെ അറിയിച്ചു. വിവരം ജനങ്ങളിലേക്ക് എത്തിക്കാൻ സഹായിച്ച എല്ലാവർക്കും അദ്ദേഹം നന്ദി രേഖപ്പെടുത്തി.
1990-കളിൽ ഡബ്ല്യുഡബ്ല്യുഎഫ് (ഇന്നത്തെ WWE), ഡബ്ല്യുസിഡബ്ല്യു തുടങ്ങിയ വേദികളിലെ കരുത്തനായ സാന്നിധ്യമായിരുന്നു ബ്രിട്ടീഷ് ബുൾഡോഗ്. 2020-ൽ മരണാനന്തര ബഹുമതിയായാണ് അദ്ദേഹത്തെ ഡബ്ല്യുഡബ്ല്യുഇ ഹാൾ ഓഫ് ഫെയിമിൽ ഉൾപ്പെടുത്തിയത്. ജപ്പാനിലും വടക്കേ അമേരിക്കയിലുമായി നടക്കുന്ന ഗുസ്തി മത്സരങ്ങളിൽ അച്ഛന്റെ സ്മരണയ്ക്കായി ഹാരി ഈ മോതിരം സ്ഥിരമായി ധരിക്കാറുണ്ട്. നിലവിലെ ടൂർ പൂർത്തിയാക്കിയ ശേഷം ഹാരി സ്മിത്ത് ജപ്പാനിലെ മത്സരങ്ങൾക്കായി തിരിക്കും.
british-bulldogs-wwe-hall-of-fame-ring-recovered-after-lloydminster-theft
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
