ഫ്രെഡറിക്ടൺ: ന്യൂ ബ്രൺസ്വിക്കിലെ വർദ്ധിച്ചുവരുന്ന കടബാധ്യത നേരിടുന്നതിനായി സൂസൻ ഹോൾട്ട് സർക്കാർ നടപ്പിലാക്കുന്ന ബജറ്റ് മാർച്ച് 17-ന് അവതരിപ്പിക്കും. ബജറ്റിന് മുന്നോടിയായി നടത്തിയ സർവേയിൽ അയ്യായിരത്തിലധികം പേരും ഇമെയിൽ വഴി 630 പേരും നിർദ്ദേശങ്ങൾ സമർപ്പിച്ചതായി സർക്കാർ അറിയിച്ചു. സാമ്പത്തിക അച്ചടക്കം പാലിക്കുന്നതിനായി ഓരോ ഡോളറും അതീവ ജാഗ്രതയോടെയാണ് ചെലവഴിക്കുന്നതെന്നും സർക്കാർ തീരുമാനങ്ങളിൽ പൊതുജനങ്ങൾക്ക് വിശ്വാസമർപ്പിക്കാമെന്നും പ്രീമിയർ സൂസൻ ഹോൾട്ട് വ്യക്തമാക്കി.
പ്രതിസന്ധിയെത്തുടർന്ന് നോവ സ്കോഷയിലെ നിരവധി മ്യൂസിയങ്ങൾ അടച്ചുപൂട്ടാനുള്ള തീരുമാനം ന്യൂ ബ്രൺസ്വിക്കിലെ പൈതൃക മേഖലയിലും ആശങ്കയുണ്ടാക്കിയിട്ടുണ്ട്. ‘സേവ് അവർ മ്യൂസിയംസ്’ ക്യാമ്പയിൻ ശക്തമായി തുടരുമെന്ന് അസോസിയേഷൻ ഹെറിറ്റേജ് വൈസ് പ്രസിഡന്റ് ജാനറ്റ് ക്ലൗസ്റ്റൺ അറിയിച്ചു. കനേഡിയൻ മ്യൂസിയംസ് അസോസിയേഷനും നാഷണൽ ട്രസ്റ്റ് ഫോർ കാനഡയും വിഷയത്തിൽ ആശങ്ക പ്രകടിപ്പിച്ചിട്ടുണ്ട്. പൈതൃക സ്ഥാപനങ്ങൾ സംരക്ഷിക്കുന്നതിനായി ബജറ്റിൽ അനുകൂല തീരുമാനമുണ്ടാകുമെന്നാണ് ഈ മേഖലയിലുള്ളവർ പ്രതീക്ഷിക്കുന്നത്.
നൂറിൽ താഴെ വിദ്യാർത്ഥികളുള്ള 33 കമ്മ്യൂണിറ്റി സ്കൂളുകളുടെ പ്രവർത്തനവും നിലവിൽ നിരീക്ഷണത്തിലാണ്. കഴിഞ്ഞ കുറച്ച് വർഷങ്ങൾക്കുള്ളിൽ സുസ്ഥിരതാ പരിശോധന പൂർത്തിയാക്കിയ സ്കൂളുകൾ ഇപ്പോൾ അടച്ചുപൂട്ടേണ്ടി വരില്ലെന്ന് പ്രീമിയർ വ്യക്തമാക്കി. ഇത്തരം പരിശോധനകൾ കൃത്യമായ ഇടവേളകളിൽ നടത്തേണ്ടത് അനിവാര്യമാണെന്നാണ് സർക്കാരിന്റെ വിലയിരുത്തൽ. അതേസമയം, ചെലവ് ചുരുക്കൽ നടപടികൾക്കൊപ്പം സമ്പദ്വ്യവസ്ഥയുടെ വളർച്ചയ്ക്കും മുൻഗണന നൽകണമെന്ന് പൊതുഭരണ വിദഗ്ധൻ ഡൊണാൾഡ് ജെ. സാവോയ് അഭിപ്രായപ്പെട്ടു.
സാമ്പത്തിക വളർച്ച കൈവരിക്കാതെ പ്രവിശ്യയ്ക്ക് കടബാധ്യതയിൽ നിന്ന് കരകയറാൻ കഴിയില്ലെന്ന് വിദഗ്ധർ മുന്നറിയിപ്പ് നൽകുന്നു. ഫെഡറൽ ഗവൺമെന്റ് നേരിടുന്ന സാമ്പത്തിക പ്രതിസന്ധികൾ കാരണം വരുംദിവസങ്ങളിൽ ഒട്ടാവയിൽ നിന്നുള്ള സഹായധനം കുറയാൻ സാധ്യതയുണ്ടെന്ന് സാവോയ് ചൂണ്ടിക്കാട്ടി. സാമ്പത്തിക വളർച്ചയില്ലാത്ത പ്രവിശ്യകൾക്ക് സഹായധനം നൽകുന്നതിനെതിരെ സമ്പന്ന പ്രവിശ്യകൾ ചോദ്യങ്ങൾ ഉന്നയിച്ചു തുടങ്ങിയതും ന്യൂ ബ്രൺസ്വിക്കിന് വെല്ലുവിളിയായേക്കാം.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
New Brunswick budget on March 17; hints at tough measures to reduce debt
