വാഷിംഗ്ടൺ: അമേരിക്കയിൽ ഗ്രീൻ കാർഡ് കൈവശമുള്ളവർക്കും നിയമപരമായ കുടിയേറ്റക്കാർക്കും നിയന്ത്രണങ്ങൾ കടുപ്പിച്ച് ട്രംപ് ഭരണകൂടം. അനധികൃത കുടിയേറ്റക്കാരെ ലക്ഷ്യമിട്ടുള്ള നീക്കങ്ങൾക്കൊപ്പം തന്നെ, രാജ്യത്ത് സ്ഥിരതാമസമാക്കിയ ഗ്രീൻ കാർഡ് ഉടമകളുടെ ആനുകൂല്യങ്ങളിലും നിരീക്ഷണങ്ങളിലും വലിയ മാറ്റങ്ങളാണ് വരുത്തിയിരിക്കുന്നത്. പ്രശസ്ത ഇമിഗ്രേഷൻ അറ്റോർണി സെക്കൗ ക്ലർക്ക് പുറത്തുവിട്ട പുതിയ വിവരങ്ങൾ പ്രകാരം, ബിസിനസ് വായ്പകൾ മുതൽ പൗരത്വ പരിശോധനകളിൽ വരെ ഗ്രീൻ കാർഡ് ഉടമകൾ ഇനി കടുത്ത വെല്ലുവിളികൾ നേരിടേണ്ടി വരും.
ചെറുകിട സംരംഭകർക്ക് കൈത്താങ്ങായിരുന്ന ‘സ്മോൾ ബിസിനസ് അഡ്മിനിസ്ട്രേഷൻ’ (SBA) വായ്പകളിൽ ഗ്രീൻ കാർഡ് ഉടമകൾക്ക് ഏർപ്പെടുത്തിയ നിയന്ത്രണമാണ് ഇതിൽ പ്രധാനം. മാർച്ച് 1 മുതൽ പ്രാബല്യത്തിൽ വരുന്ന പുതിയ നിയമപ്രകാരം, വായ്പയ്ക്ക് അപേക്ഷിക്കുന്ന സ്ഥാപനത്തിന്റെ ഉടമസ്ഥാവകാശത്തിൽ ഗ്രീൻ കാർഡ് ഉടമകൾ പങ്കാളികളാണെങ്കിൽ ആ സ്ഥാപനത്തിന് വായ്പ ലഭിക്കില്ല. സ്ഥാപനത്തിന്റെ പ്രത്യക്ഷമോ പരോക്ഷമോ ആയ എല്ലാ ഉടമകളും അമേരിക്കൻ പൗരന്മാരായിരിക്കണം എന്നത് ഇനി നിർബന്ധമാണ്.
യുഎസ് സമ്പദ്വ്യവസ്ഥയിൽ നിർണ്ണായക പങ്കുവഹിക്കുന്ന ഗ്രീൻ കാർഡ് ഉടമകളായ ചെറുകിട ബിസിനസുകാരെ ഈ നീക്കം പ്രതികൂലമായി ബാധിക്കുമെന്ന് വിദഗ്ധർ ചൂണ്ടിക്കാട്ടുന്നു. ഗ്രീൻ കാർഡ് പുതുക്കുന്നതിനോ പൗരത്വത്തിന് അപേക്ഷിക്കുന്നതിനോ എത്തുന്നവരുടെ പശ്ചാത്തല പരിശോധനയും സർക്കാർ കർശനമാക്കിയിട്ടുണ്ട്. 2025 ഡിസംബറിൽ നിലവിൽ വന്ന ബയോമെട്രിക് പരിശോധനാ ചട്ടം അനുസരിച്ച്, വിദേശ യാത്രകൾ നടത്തുന്ന ഗ്രീൻ കാർഡ് ഉടമകളുടെ യാത്രാ വിവരങ്ങൾ സൂക്ഷ്മമായി നിരീക്ഷിക്കും.
ഗ്രീൻ കാർഡ് ഉടമകൾ വർഷത്തിൽ ചുരുങ്ങിയത് ആറ് മാസമെങ്കിലും അമേരിക്കയിൽ താമസിക്കണമെന്ന നിബന്ധന ലംഘിക്കപ്പെടുന്നുണ്ടോ എന്നാണ് പ്രധാനമായും പരിശോധിക്കുന്നത്. ഇതിനുപുറമെ, മുൻപ് എപ്പോഴെങ്കിലും അറസ്റ്റ് ചെയ്യപ്പെട്ടിട്ടുണ്ടോ അല്ലെങ്കിൽ ഗ്രീൻ കാർഡ് ലഭിച്ച സമയത്ത് എന്തെങ്കിലും തരത്തിലുള്ള ക്രമക്കേടുകൾ നടന്നിട്ടുണ്ടോ എന്നും ഉദ്യോഗസ്ഥർ പരിശോധിക്കും.
കുടിയേറ്റക്കാർക്കും, നിബന്ധനകളോടെ ഗ്രീൻ കാർഡ് ലഭിച്ചവർക്കും പുതിയ കാലയളവിൽ വലിയ ജാഗ്രത ആവശ്യമാണ്. അമേരിക്കയിൽ എത്തി ഒരു വർഷം തികഞ്ഞിട്ടും സ്ഥിരതാമസത്തിനുള്ള അനുമതി ലഭിക്കാത്ത കുടിയേറ്റക്കാരെ ജയിലിൽ വയ്ക്കാൻ പുതിയ നയം അനുവദിക്കുന്നു. പൗരത്വത്തിനായി വീണ്ടും കടുത്ത സ്ക്രീനിംഗിന് ഇവർ വിധേയരാകണം. വിവാഹത്തിലൂടെയോ മറ്റോ ലഭിക്കുന്ന കണ്ടീഷണൽ ഗ്രീൻ കാർഡ് ഉടമകളുടെ വീടുകളിലും ഓഫീസുകളിലും ഉദ്യോഗസ്ഥർ നേരിട്ടെത്തി സർപ്രൈസ് പരിശോധന നടത്താനും സാധ്യതയുണ്ട്.
അപേക്ഷയിൽ നൽകിയ വിലാസത്തിൽ തന്നെയാണോ താമസമെന്നും വിവാഹബന്ധം തുടരുന്നുണ്ടോ എന്നും ഉറപ്പുവരുത്താനാണ് ഈ പരിശോധനകൾ. അമേരിക്കയിൽ സ്ഥിരതാമസം ആഗ്രഹിക്കുന്നവർ നിയമങ്ങൾ കൃത്യമായി പാലിക്കുന്നുണ്ടെന്ന് ഉറപ്പുവരുത്തേണ്ട നിർണ്ണായക സമയമാണിതെന്ന് റിപ്പോർട്ടുകൾ വ്യക്തമാക്കുന്നു.
immigration-attorney-explains-5-major-changes-for-green-card-holders-in-2026
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
