സസ്കാറ്റൂൺ: വിദേശ രാജ്യങ്ങളിൽ ഉപരിപഠനത്തിന് എത്തുന്ന വിദ്യാർത്ഥികൾക്ക് പഠനത്തിനപ്പുറം വലിയൊരു വെല്ലുവിളിയാണ് അവിടുത്തെ തൊഴിൽ വിപണിയിൽ ചുവടുറപ്പിക്കുക എന്നത്. എന്നാൽ, കൃത്യമായ പ്ലാനിംഗും പ്രായോഗിക പരിശീലനവും ഉണ്ടെങ്കിൽ കാനഡ പോലുള്ള രാജ്യങ്ങളിൽ മികച്ച കരിയർ കെട്ടിപ്പടുക്കാമെന്ന് തെളിയിക്കുകയാണ് സസ്കാച്ചവാൻ പോളിടെക്നിക്കിലെ മുൻ വിദ്യാർത്ഥിയായ വിശാൽകുമാർ ലഖ്വാനി.
സസ്കാറ്റൂണിലെ പ്രമുഖ സ്ഥാപനമായ ‘കോവ എഞ്ചിനീയറിംഗിൽ’ (Kova Engineering) ഡിസൈൻ ആൻഡ് മാനുഫാക്ചറിംഗ് എഞ്ചിനീയറിംഗ് ടെക്നോളജിസ്റ്റായി ജോലി നേടിയ വിശാലിന്റെ യാത്ര പുതിയ വിദ്യാർത്ഥികൾക്ക് വലിയൊരു പാഠപുസ്തകമാണ്. സസ്കാച്ചവാൻ പോളിടെക്നിക്കിലെ പ്രായോഗിക പഠനരീതിയാണ് തന്റെ വിജയത്തിന് പിന്നിലെ പ്രധാന ഘടകമെന്ന് വിശാൽ പറയുന്നു. പഠനകാലത്ത് വെറും പുസ്തക അറിവുകളിൽ ഒതുങ്ങാതെ ഇൻഡസ്ട്രി പ്രോജക്ടുകളിലും മത്സരങ്ങളിലും അദ്ദേഹം സജീവമായിരുന്നു.
സ്കിൽസ് കാനഡ പ്രൊവിൻഷ്യൽ മത്സരത്തിൽ മെക്കാനിക്കൽ എഞ്ചിനീയറിംഗ് സിഎഡി വിഭാഗത്തിൽ വെള്ളി മെഡൽ നേടിയത് വിശാലിന് വലിയ ആത്മവിശ്വാസം നൽകി. തന്റെ മുൻപത്തെ രാജ്യാന്തര പ്രവൃത്തിപരിചയത്തെ കാനഡയിലെ തൊഴിൽ സാഹചര്യങ്ങൾക്ക് അനുയോജ്യമായ രീതിയിൽ മാറ്റിയെടുക്കാൻ കോളേജിലെ സ്റ്റുഡന്റ് എംപ്ലോയ്മെന്റ് സർവീസസ് (SES) നൽകിയ പിന്തുണയും അദ്ദേഹം നന്ദിയോടെ സ്മരിച്ചു.
കോളേജ് നടത്തുന്ന കരിയർ ഫെയറുകളും നെറ്റ്വർക്കിംഗ് സാധ്യതകളും പരമാവധി പ്രയോജനപ്പെടുത്തുകയാണ് വേണ്ടതെന്ന് വിശാൽ ചൂണ്ടിക്കാട്ടുന്നു. പഠനം തുടങ്ങുന്നതിന് മുൻപ് തന്നെ ലിങ്ക്ഡ് ഇൻ വഴി പൂർവ്വ വിദ്യാർത്ഥികളുമായി ആശയവിനിമയം നടത്തിയിരുന്ന അദ്ദേഹം, ഇന്റർവ്യൂകൾക്കായി പ്രത്യേക പരിശീലനവും നേടിയിരുന്നു. 70 ശതമാനം ജോലികളും കൃത്യമായ നെറ്റ്വർക്കിംഗിലൂടെയാണ് ലഭിക്കുന്നതെന്ന യാഥാർത്ഥ്യം ഉൾക്കൊണ്ടാണ് വിശാൽ മുന്നോട്ട് നീങ്ങിയത്. നിലവിൽ സസ്കാറ്റൂണിൽ സ്ഥിരതാമസമാക്കിയ അദ്ദേഹം, പുതിയ വിദ്യാർത്ഥികൾക്ക് മാർഗനിർദ്ദേശങ്ങൾ നൽകാനും സമയം കണ്ടെത്തുന്നുണ്ട്.
sask-polytech-grad-turns-hands-on-learning-into-engineering-career-
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
