ന്യൂയോർക്ക്: വിവിധ രാജ്യങ്ങളിൽ നിന്നുള്ള ഇറക്കുമതിക്ക് വൻതോതിൽ തീരുവ ചുമത്താനുള്ള പ്രസിഡന്റ് ഡൊണാൾഡ് ട്രംപിന്റെ തീരുമാനം ഭരണഘടനാ വിരുദ്ധമാണെന്ന് യുഎസ് സുപ്രീം കോടതി ഉത്തരവിട്ടു. പ്രമുഖ ഇന്ത്യൻ വംശജനായ അഭിഭാഷകൻ നീൽ കത്യാൽ ആണ് അമേരിക്കൻ ചെറുകിട വ്യവസായങ്ങൾക്ക് വേണ്ടി കോടതിയിൽ ഹാജരായത്. ട്രംപിന്റെ സാമ്പത്തിക നയങ്ങൾ നിയമവിരുദ്ധമാണെന്ന് വാദിച്ച കത്യാൽ, ഈ നീക്കം പ്രാദേശിക ബിസിനസുകളെ തകർക്കുമെന്ന് കോടതിയെ ബോധ്യപ്പെടുത്തി. ആറംഗ ജഡ്ജിമാരുടെ പിന്തുണയോടെയാണ് നിർണായകമായ ഈ വിധി പുറത്തു വന്നത്.
വാഷിംഗ്ടൺ ഡിസി ആസ്ഥാനമായ മിൽബാങ്ക് എൽഎൽപി എന്ന നിയമസ്ഥാപനത്തിലെ പാർട്ണറായ നീൽ കത്യാൽ, സങ്കീർണ്ണമായ നിയമപ്രശ്നങ്ങളിൽ വ്യക്തമായ മറുപടി നൽകിയാണ് വാദിച്ചത്. ബറാക് ഒബാമ പ്രസിഡന്റായിരുന്ന കാലത്ത് ആക്ടിങ് സോളിസിറ്റർ ജനറലായി സേവനമനുഷ്ഠിച്ചിട്ടുള്ള ഇദ്ദേഹം, ഇതുവരെ 54 കേസുകൾ സുപ്രീം കോടതിയിൽ വാദിച്ചിട്ടുണ്ട്. ട്രംപ് ഭരണകൂടത്തിന്റെ തീരുവ വർദ്ധനവ് സാധാരണക്കാരായ വ്യാപാരികളെ എങ്ങനെ ബാധിക്കുമെന്ന് അക്കമിട്ടു നിരത്തിയ കത്യാലിന്റെ വാദങ്ങൾ കോടതി പൂർണ്ണമായും അംഗീകരിക്കുകയായിരുന്നു.
പഞ്ചാബിൽ നിന്നുള്ള കുടിയേറ്റ ദമ്പതികളുടെ മകനായി 1970-ൽ ഷിക്കാഗോയിലാണ് നീൽ ജനിച്ചത്. യെൽ ലോ സ്കൂളിൽ നിന്ന് നിയമബിരുദം നേടിയ അദ്ദേഹം ചുരുങ്ങിയ കാലം കൊണ്ട് തന്നെ അമേരിക്കയിലെ മുൻനിര അഭിഭാഷകരിൽ ഒരാളായി മാറി. നിലവിലെ കോടതി വിധി ട്രംപ് ഭരണകൂടത്തിന് വലിയ രാഷ്ട്രീയ തിരിച്ചടിയായാണ് വിലയിരുത്തപ്പെടുന്നത്. അതേസമയം, വിദേശ രാജ്യങ്ങളുമായുള്ള വ്യാപാര ബന്ധങ്ങളിൽ ഈ വിധി നിർണ്ണായക സ്വാധീനം ചെലുത്തുമെന്ന് സാമ്പത്തിക വിദഗ്ധർ ചൂണ്ടിക്കാട്ടുന്നു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/KdmCA708iUa8aT1Ocx1qs1?mode=gi_t
Indian strength that 'locked' Trump in US court: Neil Katyal surprised in tariff legal battle
