ഫ്രെഡറിക്ടൺ : ന്യൂ ബ്രൺസ്വിക് സർക്കാരിന്റെ 2026-27 ബജറ്റിന് മുന്നോടിയായുള്ള കൂടിയാലോചനകൾ വെള്ളിയാഴ്ച പൂർത്തിയായി. കടുത്ത സാമ്പത്തിക പ്രതിസന്ധി നേരിടുന്ന സാഹചര്യത്തിൽ, ബജറ്റ് തയ്യാറാക്കുന്നതിൽ ജാഗ്രതയോടെയുള്ള തീരുമാനങ്ങൾ കൈക്കൊള്ളുമെന്ന് പ്രീമിയർ സൂസൻ ഹോൾട്ട് അറിയിച്ചു. മാർച്ച് 17-ന് ബജറ്റ് അവതരിപ്പിക്കാനിരിക്കെ, വരുമാനം വർദ്ധിപ്പിക്കാനും ചെലവ് കുറയ്ക്കാനുമുള്ള നിർദ്ദേശങ്ങളാണ് പൊതുജനങ്ങളിൽ നിന്ന് തേടിയത്. നിലവിൽ പ്രവിശ്യയുടെ കമ്മി മുൻപെങ്ങുമില്ലാത്തവിധം 1.3 ബില്യൺ ഡോളറിൽ എത്തിനിൽക്കുകയാണെന്ന് ധനമന്ത്രി റെനെ ലെഗസി വ്യക്തമാക്കി.
ഹൈവേ ടോൾ ഏർപ്പെടുത്തുക, ഫീസുകളും പെർമിറ്റ് നിരക്കുകളും വർദ്ധിപ്പിക്കുക, സിവിൽ സർവീസ് വെട്ടിക്കുറയ്ക്കുക, ആസ്തികൾ വിൽക്കുക എന്നിവയാണ് കൂടിയാലോചന രേഖയിൽ ഉൾപ്പെട്ട പ്രധാന നിർദ്ദേശങ്ങൾ. കൂടാതെ, 100-ൽ താഴെ വിദ്യാർത്ഥികളുള്ള സ്കൂളുകൾ അടച്ചുപൂട്ടുന്നതും സജീവ പരിഗണനയിലുണ്ട്. എന്നാൽ ഇതിനെതിരെ ശക്തമായ ജനകീയ പ്രതിഷേധം ഉയരുന്നുണ്ടെന്ന് വിദ്യാഭ്യാസ മന്ത്രി ക്ലെയർ ജോൺസൺ പറഞ്ഞു. സ്കൂളുകൾ അടച്ചുപൂട്ടുന്നതിൽ നിലവിലെ നയങ്ങൾ പാലിക്കുമെന്നും ജില്ലാ വിദ്യാഭ്യാസ കൗൺസിലുകളുടെ ശുപാർശ പ്രകാരം മാത്രമേ അന്തിമ തീരുമാനമുണ്ടാകൂ എന്നും മന്ത്രി കൂട്ടിച്ചേർത്തു. പ്രവിശ്യയിലെ 300 സ്കൂളുകളിൽ 30 എണ്ണം നിലവിൽ ശേഷിയുടെ 30 ശതമാനത്തിൽ താഴെയാണ് പ്രവർത്തിക്കുന്നത്.
ജനങ്ങളുടെ ആവശ്യം പരിഗണിച്ചു ആരോഗ്യമേഖലയിൽ കൂടുതൽ നിക്ഷേപം നടത്താൻ സർക്കാർ പദ്ധതിയിടുന്നതായി പ്രീമിയർ സൂസൻ ഹോൾട്ട് അറിയിച്ചു. മെച്ചപ്പെട്ട ആരോഗ്യ സേവനങ്ങൾ ലഭ്യമാക്കണമെന്നും കമ്മ്യൂണിറ്റികളിൽ ഡോക്ടർമാരുടെയും നഴ്സുമാരുടെയും സേവനം ഉറപ്പാക്കണമെന്നുമാണ് ജനങ്ങൾ ആവശ്യപ്പെട്ടിരിക്കുന്നത്. ഫ്രെഡറിക്ടണിലെ École Sainte-Anne, Centre communautaire Sainte-Anne, എന്നിവിടങ്ങളിൽ നവീകരണ പ്രവർത്തനങ്ങൾക്കായി 4.4 മില്യൺ ഡോളർ അനുവദിച്ചതായും വെള്ളിയാഴ്ച നടന്ന വാർത്താ സമ്മേളനത്തിൽ പ്രീമിയർ അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
New Brunswick budget on March 17; Premier says public suggestions will be considered
