ഒട്ടാവ: ഫെഡറൽ ജഡ്ജിമാരുടെ ശമ്പളവർധനയുമായി ബന്ധപ്പെട്ട് സർക്കാരും ജുഡീഷ്യറിയും തമ്മിലുള്ള തർക്കം സുപ്രീം കോടതി നേരിട്ട് തീർപ്പാക്കണമെന്ന് ജഡ്ജിമാരുടെ സംഘടന ആവശ്യപ്പെട്ടു. ദീർഘകാലം നീണ്ടുനിൽക്കാവുന്ന നിയമപോരാട്ടം ഒഴിവാക്കാൻ, നിലവിൽ ഫെഡറൽ കോടതിയുടെ പരിഗണനയിലുള്ള കേസ് സുപ്രീം കോടതിയിലേക്ക് മാറ്റണമെന്നാണ് കനേഡിയൻ സുപ്പീരിയർ കോർട്ട് ജഡ്ജസ് അസോസിയേഷൻ ആവശ്യപ്പെടുന്നത്. ഇത് സംബന്ധിച്ച് ജസ്റ്റിസ് മന്ത്രി സീൻ ഫ്രേസറിന് സംഘടന കത്തയച്ചു.
ഫെഡറൽ ജഡ്ജിമാർക്ക് പ്രതിവർഷം 28,000 മുതൽ 36,000 ഡോളർ വരെ ശമ്പളവർധന നടപ്പിലാക്കണമെന്ന സ്വതന്ത്ര കമ്മീഷന്റെ ശുപാർശ കഴിഞ്ഞ ശരത്കാലത്താണ് മാർക്ക് കാർണി സർക്കാർ നിരസിച്ചത്. അമേരിക്കയുമായുള്ള വ്യാപാരയുദ്ധം മൂലമുള്ള സാമ്പത്തിക പ്രതിസന്ധിയും രാജ്യത്തെ ധനകാര്യ ബുദ്ധിമുട്ടുകളും ചൂണ്ടിക്കാട്ടിയാണ് സർക്കാർ ഈ തീരുമാനമെടുത്തത്. എന്നാൽ, ശമ്പളവർധന നിഷേധിക്കുന്നത് ന്യായാധിപന്മാരുടെ സ്വാതന്ത്ര്യത്തെ ബാധിക്കുമെന്നും ഭരണഘടനാപരമായ ബാധ്യതകളുടെ ലംഘനമാണെന്നുമാണ് ജഡ്ജിമാരുടെ സംഘടന വാദിക്കുന്നത്.
നിലവിലെ ശുപാർശ പ്രകാരം സുപ്രീം കോടതി ജഡ്ജിമാരുടെ ശമ്പളം 5 ലക്ഷം ഡോളറിന് മുകളിലേക്ക് ഉയരും. തങ്ങളുടെ ശമ്പള കാര്യത്തിൽ ജഡ്ജിമാർ തന്നെ തീരുമാനമെടുക്കുന്നത് താൽപര്യ വൈരുദ്ധ്യത്തിന് ഇടയാക്കുമെന്ന് വിമർശനമുണ്ടെങ്കിലും, നിയമപരമായ അവ്യക്തത നീക്കാൻ സുപ്രീം കോടതിയുടെ ഇടപെടൽ അനിവാര്യമാണെന്ന് വിദഗ്ധർ ചൂണ്ടിക്കാട്ടുന്നു. വിഷയം സുപ്രീം കോടതിക്ക് വിടുന്ന കാര്യത്തിൽ ജസ്റ്റിസ് മന്ത്രാലയം ഇതുവരെ ഔദ്യോഗിക പ്രതികരണം നടത്തിയിട്ടില്ല.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/KdmCA708iUa8aT1Ocx1qs1?mode=gi_t
Canadian judges to approach Supreme Court against government over salary hike denial
