വാഷിംഗ്ടൺ: അന്തരിച്ച ലൈംഗിക കുറ്റവാളി ജെഫ്രി എപ്സ്റ്റീനുമായി തനിക്ക് വ്യക്തിപരമായോ ബിസിനസ് പരമായോ യാതൊരു ബന്ധവുമില്ലെന്ന് യുഎസ് പ്രസിഡന്റ് ഡൊണാൾഡ് ട്രംപ്. എയർഫോഴ്സ് വണ്ണിൽ മാധ്യമപ്രവർത്തകരോട് സംസാരിക്കവെയാണ്, എപ്സ്റ്റീൻ കേസുമായി ബന്ധപ്പെട്ട പുതിയ അന്വേഷണ റിപ്പോർട്ടുകളെയും വെളിപ്പെടുത്തലുകളെയും ട്രംപ് പൂർണ്ണമായും തള്ളിക്കളഞ്ഞത്. തനിക്ക് ഒന്നും ഒളിക്കാനില്ലെന്നും പുറത്തുവന്ന പുതിയ ഫയലുകൾ തന്നെ കുറ്റവിമുക്തനാക്കും എന്നും അദ്ദേഹം വ്യക്തമാക്കി.
യുഎസ് നീതിന്യായ വകുപ്പ് എപ്സ്റ്റീൻ കേസുമായി ബന്ധപ്പെട്ട ദശലക്ഷക്കണക്കിന് രേഖകളും ചിത്രങ്ങളും വീഡിയോകളും കഴിഞ്ഞ മാസം പുറത്തുവിട്ടിരുന്നു. ഇതിന് പിന്നാലെയാണ് ട്രംപും എപ്സ്റ്റീനും തമ്മിലുള്ള പഴയകാല സൗഹൃദം വീണ്ടും രാഷ്ട്രീയ ചർച്ചയായത്. 1980-കളിലും 90-കളിലും ന്യൂയോർക്കിലെ സാമൂഹിക പരിപാടികളിൽ ഇരുവരും ഒന്നിച്ചുള്ള ചിത്രങ്ങൾ നേരത്തെ പുറത്തുവന്നിരുന്നു. എന്നാൽ എപ്സ്റ്റീന്റെ കുറ്റകൃത്യങ്ങൾ പുറത്തുവരുന്നതിന് മുൻപുതന്നെ താൻ ആ ബന്ധം അവസാനിപ്പിച്ചതാണെന്നും തനിക്കെതിരെ ഒരു കുറ്റവും തെളിയിക്കപ്പെട്ടിട്ടില്ലെന്നും ട്രംപ് ആവർത്തിച്ചു.
അതേസമയം, കേസുമായി ബന്ധപ്പെട്ട സുപ്രധാന ഇമെയിലുകളും കുറിപ്പുകളും നീതിന്യായ വകുപ്പ് മറച്ചുവെക്കുന്നുവെന്ന് ആരോപിച്ച് ഡെമോക്രാറ്റിക്, റിപ്പബ്ലിക്കൻ പാർട്ടികളിലെ ചില അംഗങ്ങൾ രംഗത്തെത്തിയിട്ടുണ്ട്. മുൻ സ്റ്റേറ്റ് സെക്രട്ടറി ഹിലാരി ക്ലിന്റൺ ഉൾപ്പെടെയുള്ളവർ എല്ലാ രേഖകളും പൂർണ്ണമായി പുറത്തുവിടണമെന്ന് ആവശ്യപ്പെട്ടു. എന്നാൽ കോടതി നിർദ്ദേശിച്ച എല്ലാ വിവരങ്ങളും നൽകിക്കഴിഞ്ഞുവെന്നും ഇനി കൂടുതൽ ഫയലുകൾ പുറത്തുവിടാനില്ലെന്നുമാണ് നീതിന്യായ വകുപ്പിന്റെ നിലപാട്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/KdmCA708iUa8aT1Ocx1qs1?mode=gi_t
No connection with Epstein, nothing to hide; US President clarifies stance amid controversies
