കാനഡയിൽ ജിഎസ്ടി ക്രെഡിറ്റ് ടോപ്പ്-അപ്പ് പ്രഖ്യാപിച്ചു; ആർക്കൊക്കെ ലഭിക്കും? തുക എത്ര? അറിയേണ്ടതെല്ലാം!

ഒട്ടാവ : കാനഡയിൽ വർധിച്ചുവരുന്ന ജീവിതച്ചെലവ് പരിഹരിക്കുന്നതിനായി 12 മില്ല്യൺ ജനങ്ങൾക്ക് പുതിയ ജിഎസ്ടി ക്രെഡിറ്റ് ടോപ്പ്-അപ്പ് പേയ്‌മെന്റ് നൽകുമെന്ന് ഫെഡറൽ ഗവൺമെന്റ് ഔദ്യോഗികമായി സ്ഥിരീകരിച്ചു. ‘കാനഡ ഗ്രോസറീസ് ആൻഡ് എസൻഷ്യൽസ് ബെനിഫിറ്റ് ആക്ട്’ (ബിൽ സി-19) ഫെബ്രുവരി 12-ന് പാർലമെന്റ് പാസാക്കി റോയൽ അസന്റ് ലഭിച്ചതോടെയാണ് ഈ നടപടിക്ക് അംഗീകാരമായത്. കുറഞ്ഞ വരുമാനമുള്ളവർക്കും ഇടത്തരം വരുമാനക്കാർക്കും 2026 വസന്തകാലം മുതൽ ഈ സാമ്പത്തിക സഹായം ലഭ്യമായിത്തുടങ്ങുമെന്ന് ഔദ്യോഗിക അറിയിപ്പിൽ പറയുന്നു.

പുതിയ നിയമപ്രകാരം നിലവിലുള്ള ജിഎസ്ടി ക്രെഡിറ്റ് ഗുണഭോക്താക്കൾക്ക് ഒറ്റത്തവണ ടോപ്പ്-അപ്പ് പേയ്‌മെന്റായി നിശ്ചിത തുക ലഭിക്കും. 2025-26 വർഷത്തെ വാർഷിക ജിഎസ്ടി ക്രെഡിറ്റ് മൂല്യത്തിന്റെ 50 ശതമാനത്തിന് തുല്യമായ തുകയാണ് ടോപ്പ്-അപ്പായി നൽകുന്നത്. 25,000 ഡോളർ വരെ വാർഷിക വരുമാനമുള്ള ഒരു മുതിർന്ന പൗരന് പരമാവധി 267 ഡോളർ വരെ അധികമായി ലഭിക്കും. ഏകദേശം 3.1 ബില്യൺ ഡോളറാണ് ഈ ഘട്ടത്തിൽ വിതരണം ചെയ്യുന്നതിനായി സർക്കാർ നീക്കിവെച്ചിരിക്കുന്നത്. രണ്ട് ഘട്ടങ്ങളിലായാണ് ഈ സാമ്പത്തിക സഹായ പദ്ധതി നടപ്പിലാക്കുന്നത്.

വസന്തകാലത്ത് നൽകുന്ന ഒറ്റത്തവണ ടോപ്പ്-അപ്പ് പേയ്‌മെന്റാണ് ആദ്യ ഘട്ടം. തുടർന്ന്, 2026 ജൂലൈ മുതൽ അഞ്ച് വർഷത്തേക്ക് ‘കാനഡ ഗ്രോസറീസ് ആൻഡ് എസൻഷ്യൽസ് ബെനിഫിറ്റ്’ മൂല്യത്തിൽ 25 ശതമാനം വർധനവ് വരുത്തും. ഈ ദീർഘകാല പദ്ധതിക്കായി 8.6 ബില്യൺ ഡോളർ അധികമായി ചെലവഴിക്കുമെന്നും, ഇതുവഴി ജിഎസ്ടി ക്രെഡിറ്റ് ലഭിക്കാത്ത അഞ്ച് ലക്ഷം പേർക്ക് കൂടി പുതുതായി ആനുകൂല്യം ലഭിക്കുമെന്നും ഡിപ്പാർട്ട്‌മെന്റ് ഓഫ് ഫിനാൻസ് കാനഡ വ്യക്തമാക്കി.

നിലവിൽ GST/HST ക്രെഡിറ്റിന് അർഹരായവർക്ക് ഈ പുതിയ ടോപ്പ്-അപ്പ് തുക നേരിട്ട് ലഭിക്കും. ഇതിനായി പ്രത്യേകം അപേക്ഷ സമർപ്പിക്കേണ്ടതില്ല. കാനഡയിൽ ടാക്സ് ഫയൽ ചെയ്യുന്ന 19 വയസ്സിന് മുകളിലുള്ളവർ, പങ്കാളിയോ കുട്ടികളോ ഉള്ളവർ എന്നിവർക്ക് വരുമാന പരിധിക്ക് അനുസൃതമായി ഈ തുക ലഭിക്കും. 40,000 ഡോളർ വരെ വരുമാനമുള്ള രണ്ട് കുട്ടികളുള്ള ഒരു ദമ്പതികൾക്ക് 533 ഡോളർ വരെ ടോപ്പ്-അപ്പ് ലഭിക്കുമെന്നാണ് കണക്കാക്കുന്നത്. 2026-27 സാമ്പത്തിക വർഷത്തിൽ ഇത്തരമൊരു കുടുംബത്തിന് ആകെ 1,890 ഡോളർ വരെ ആനുകൂല്യം ലഭിക്കാൻ സാധ്യതയുണ്ട്.

2026 ഏപ്രിൽ 2-ന് ലഭിക്കുന്ന സാധാരണ ജിഎസ്ടി പേയ്‌മെന്റിനൊപ്പം ടോപ്പ്-അപ്പ് തുക വിതരണം ചെയ്യാനാണ് സർക്കാർ ലക്ഷ്യമിടുന്നത്. ജൂലൈ മുതൽ ഇത് ഓരോ മൂന്ന് മാസം കൂടുമ്പോഴുള്ള കൃത്യമായ പേയ്‌മെന്റുകളായി മാറും. ഗുണഭോക്താക്കൾ തങ്ങളുടെ ഇൻകം ടാക്സ് റിട്ടേണുകൾ കൃത്യമായി ഫയൽ ചെയ്യണമെന്നും ബാങ്ക് അക്കൗണ്ട് വിവരങ്ങളും വിലാസവും CRA പോർട്ടലിൽ അപ്‌ഡേറ്റ് ചെയ്തിട്ടുണ്ടെന്ന് ഉറപ്പുവരുത്തണമെന്നും അധികൃതർ നിർദ്ദേശിച്ചു.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt

GST Credit Top-up announced in Canada; Who will get it? How much? Everything you need to know!