വാഷിങ്ടൺ: ഇറാനുമേലുള്ള സമ്മർദ്ദം അതിന്റെ അത്യുന്നതങ്ങളിൽ എത്തിച്ചുകൊണ്ട് യുഎസ് പ്രസിഡന്റ് ഡൊണാൾഡ് ട്രംപ് നിർണ്ണായകമായ സൈനിക നീക്കം പ്രഖ്യാപിച്ചു. ലോകത്തിലെ ഏറ്റവും വിനാശകാരിയായ വിമാനവാഹിനിക്കപ്പലായ യുഎസ്എസ് ജെറാൾഡ് ആർ ഫോർഡിനെ പശ്ചിമേഷ്യയിലേക്ക് വിന്യസിക്കാനാണ് ട്രംപിന്റെ ഉത്തരവ്. നിലവിൽ മേഖലയിലുള്ള യുഎസ്എസ് എബ്രഹാം ലിങ്കൺ എന്ന കപ്പലിനൊപ്പം ജെറാൾഡ് ഫോർഡ് കൂടി ചേരുന്നതോടെ ഇറാന് ചുറ്റുമുള്ള യുഎസ് സൈനിക വലയം കൂടുതൽ ശക്തമാകും.
ഇസ്രയേൽ പ്രധാനമന്ത്രി ബെന്യാമിൻ നെതന്യാഹുയുമായി വൈറ്റ് ഹൗസിൽ നടത്തിയ സുപ്രധാന കൂടിക്കാഴ്ചയ്ക്ക് പിന്നാലെയാണ് ട്രംപ് ഈ നീക്കം നടത്തിയത് എന്നത് ഇതിന്റെ രാഷ്ട്രീയ പ്രാധാന്യം വർദ്ധിപ്പിക്കുന്നു. മുൻപ് വെനസ്വേലൻ പ്രസിഡന്റ് നിക്കോളാസ് മഡുറോയെ പിടികൂടിയ സാഹസിക ദൗത്യത്തിൽ നിർണ്ണായക പങ്കുവഹിച്ച ഈ കപ്പൽ നിലവിൽ കരീബിയൻ കടലിലാണുള്ളത്. അമേരിക്കയുടെ 38-ാം പ്രസിഡന്റിന്റെ പേര് നൽകിയിരിക്കുന്ന ഈ കപ്പലിന് ഒരേസമയം 75 വിമാനങ്ങളെ വരെ വഹിക്കാനുള്ള ശേഷിയുണ്ട്.
ഒമാൻ ആസ്ഥാനമായി ട്രംപിന്റെ പ്രത്യേക ദൂതൻ സ്റ്റീവ് വിറ്റ്കോഫും മരുമകൻ ജറാദ് കുഷ്നറും ഇറാൻ വിദേശകാര്യ മന്ത്രി അബ്ബാസ് അറാഗ്ചിയുമായി നടത്തിയ പരോക്ഷ ചർച്ചകൾ പരാജയപ്പെട്ടതാണ് അമേരിക്കയെ പ്രകോപിപ്പിച്ചത്. ഒരു മാസത്തിനുള്ളിൽ അനുകൂലമായ കരാറിൽ ഒപ്പിട്ടില്ലെങ്കിൽ ഇറാൻ ഇതുവരെ നേരിടാത്ത വിധം വേദനാജനകമായ പ്രത്യാഘാതങ്ങൾ നേരിടേണ്ടി വരുമെന്ന് ട്രംപ് മുന്നറിയിപ്പ് നൽകി. ചർച്ചകളിലൂടെയോ അല്ലെങ്കിൽ കരുത്തുറ്റ സൈനിക നീക്കത്തിലൂടെയോ ഇറാനെ വരുതിയിലാക്കുക എന്ന കൃത്യമായ സന്ദേശമാണ് ഇതിലൂടെ ട്രംപ് നൽകുന്നത്.
🍁കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=gi_t
US readying another aircraft carrier for deployment amid Iran tensions
