വാഷിംഗ്ടൺ: ഇറാനുമായി പുതിയ ആണവ കരാർ രൂപീകരിക്കുന്നതുമായി ബന്ധപ്പെട്ട ചർച്ചകൾക്ക് പിന്നാലെ നിലപാട് കടുപ്പിച്ച് അമേരിക്കൻ പ്രസിഡന്റ് ഡൊണാൾഡ് ട്രംപ്. ഒമാന്റെ മധ്യസ്ഥതയിൽ മസ്കറ്റിൽ നടന്ന ഉന്നതതല ചർച്ചകൾക്ക് തൊട്ടുപിന്നാലെയാണ്, ഇറാൻ ഉടൻ കരാറിൽ ഒപ്പിട്ടില്ലെങ്കിൽ കടുത്ത പ്രത്യാഘാതങ്ങൾ നേരിടേണ്ടി വരുമെന്ന മുന്നറിയിപ്പുമായി ട്രംപ് രംഗത്തെത്തിയത്.
ഇറാൻ ഒരിക്കലും ആണവായുധങ്ങൾ നിർമ്മിക്കരുത് എന്നതാണ് പുതിയ കരാറിലെ പ്രധാന വ്യവസ്ഥയെന്ന് ട്രംപ് മാധ്യമങ്ങളോട് വ്യക്തമാക്കി. നിലവിൽ ഒമാൻ ചർച്ചകൾ ശുഭസൂചനയാണ് നൽകുന്നതെന്നും ഇറാൻ കരാറിനായി ആഗ്രഹിക്കുന്നുണ്ടെന്നും അദ്ദേഹം നിരീക്ഷിച്ചു. എന്നാൽ സമാധാനപരമായ നീക്കങ്ങൾക്കൊപ്പം തന്നെ, മേഖലയിലേക്ക് യുഎസ് നാവികവ്യൂഹം നിയോഗിച്ചുകൊണ്ട് സൈനികമായ സമ്മർദ്ദവും അമേരിക്ക ശക്തമാക്കുന്നുണ്ട്. വർഷങ്ങൾക്ക് മുൻപേ നടപ്പാക്കേണ്ടിയിരുന്ന ധാരണയാണിതെന്നും ഇറാൻ വൈകിയ വേളയിലും കൃത്യമായ നിലപാട് സ്വീകരിക്കണമെന്നും ട്രംപ് ആവശ്യപ്പെട്ടു.
അതേസമയം, ഭീഷണികൾക്ക് വഴങ്ങിയുള്ള ചർച്ചകൾക്ക് തയ്യാറല്ലെന്നാണ് ഇറാന്റെ ഔദ്യോഗിക പ്രതികരണം. യുറേനിയം ശുദ്ധീകരണവുമായി ബന്ധപ്പെട്ട സാങ്കേതിക വിഷയങ്ങളിൽ വിട്ടുവീഴ്ചയ്ക്ക് തയ്യാറാണെന്ന് ടെഹ്റാൻ അറിയിച്ചിട്ടുണ്ടെങ്കിലും, ആണവ പദ്ധതിയൊഴികെയുള്ള മറ്റ് വിഷയങ്ങൾ ചർച്ചാ പരിധിയിൽ വരില്ലെന്ന് വിദേശകാര്യമന്ത്രി അബ്ബാസ് അരാഖ്ച്ചി വ്യക്തമാക്കി. അമേരിക്കൻ പ്രതിനിധികളായ സ്റ്റീവ് വിറ്റ്കോഫ്, ജാറെഡ് കുഷ്നർ എന്നിവരുമായി നടന്ന കൂടിക്കാഴ്ചയ്ക്ക് ശേഷമാണ് ഇറാൻ തങ്ങളുടെ നിലപാട് വ്യക്തമാക്കിയത്. വരും ദിവസങ്ങളിൽ അന്താരാഷ്ട്ര തലത്തിൽ ഈ ചർച്ചകൾ അതീവ പ്രാധാന്യത്തോടെയാണ് നോക്കിക്കാണുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Trump increases pressure on Iran over nuclear deal; warns of severe consequences if it does not comply
