സറേ വെടിവെപ്പ്: മൂന്ന് മൂന്ന് ഇന്ത്യൻ വംശജർ അറസ്റ്റിൽ, പ്രതികളുടെ ചിത്രങ്ങൾ പുറത്തുവിട്ടു

വാൻകൂവർ: സറിയിൽ കഴിഞ്ഞ വരാന്ത്യത്തിലുണ്ടായ വെടിവെപ്പുമായി ബന്ധപ്പെട്ട് മൂന്ന് ഇന്ത്യൻ വംശജരെ അറസ്റ്റ് ചെയ്തതായും ഇവർക്കെതിരെ കുറ്റം ചുമത്തിയതായും സറി പോലീസ് സർവീസ് അറിയിച്ചു. ഹർജോത് സിംഗ് (21), തരൺവീർ സിംഗ് (19), ദയാജീത് സിംഗ് ബില്ലിംഗ് (21) എന്നിവരാണ് പിടിയിലായത്. കെട്ടിടത്തിന് നേരെ വെടിയുതിർത്തതിനാണ് മൂവർക്കുമെതിരെ നിലവിൽ കേസ് രജിസ്റ്റർ ചെയ്തിരിക്കുന്നത്. പ്രതികളുടെ കുടിയേറ്റ രേഖകൾ പരിശോധിക്കുന്നതിനായി കാനഡ ബോർഡർ സർവീസസ് ഏജൻസിയെ (CBSA) വിവരം അറിയിച്ചിട്ടുണ്ട്.

ഞായറാഴ്ച പുലർച്ചെ ക്രെസന്റ് ബീച്ച് മേഖലയിലെ ഒരു വീടിന് നേരെ വെടിവെപ്പ് നടന്നതായും വീടിന് പുറത്ത് തീയിട്ടതായും റിപ്പോർട്ടുകൾ ലഭിച്ചിരുന്നു. സ്ഥലത്തുനിന്നും വാഹനത്തിൽ രക്ഷപ്പെട്ട പ്രതികൾ പിന്നീട് നടന്നും തുടർന്ന് ഒരു റൈഡ്-ഷെയർ ടാക്സിയിൽ കയറിയുമാണ് യാത്ര ചെയ്തത്. ഈ വാഹനത്തെ പിന്തുടർന്ന പോലീസ് സംഘം പ്രതികളെ പിടികൂടുകയായിരുന്നു. അറസ്റ്റ് ചെയ്യുന്ന സമയത്ത് പ്രതികൾ പോലീസിനെ പ്രതിരോധിക്കാൻ ശ്രമിച്ചതായും ഇതേത്തുടർന്ന് ഉദ്യോഗസ്ഥർ ബലപ്രയോഗം നടത്തിയതായും സ്റ്റാഫ് സർജന്റ് ലിൻഡ്‌സി ഹൗട്ടൻ വാർത്താസമ്മേളനത്തിൽ വ്യക്തമാക്കി.

പ്രതികളുമായും ഇരകളുമായും നടത്തിയ പ്രാഥമിക ചർച്ചകളുടെ അടിസ്ഥാനത്തിൽ, ഈ ആക്രമണം പണം തട്ടാനുള്ള ക്രിമിനൽ നീക്കത്തിന്റെ ഭാഗമാണെന്ന് പോലീസ് വിലയിരുത്തുന്നു. ജനുവരി ഒന്നു മുതൽ സറേയിൽ 29 ഇരകളിൽ നിന്നായി പണം ആവശ്യപ്പെട്ടുകൊണ്ടുള്ള 46 ഭീഷണിക്കേസുകൾ റിപ്പോർട്ട് ചെയ്തിട്ടുണ്ട്. ഈ കാലയളവിൽ 11 വെടിവെപ്പ് സംഭവങ്ങളും നടന്നതായി പോലീസ് അറിയിച്ചു. പ്രതികളുടെ ചിത്രങ്ങൾ പരസ്യപ്പെടുത്തുന്നതിലൂടെ കൂടുതൽ ദൃക്‌സാക്ഷികളോ ഇരകളോ മുന്നോട്ട് വരുമെന്നാണ് അധികൃതർ കരുതുന്നത്.

പ്രതികളെ പിടികൂടിയപ്പോൾ ഇവരിൽ നിന്നും ആയുധങ്ങളൊന്നും കണ്ടെത്തിയിട്ടില്ലെങ്കിലും അന്വേഷണം തുടരുകയാണെന്ന് ഹൗട്ടൻ പറഞ്ഞു. വരാനിരിക്കുന്ന ദിവസങ്ങളിൽ കൂടുതൽ വകുപ്പുകൾ പ്രതികൾക്കെതിരെ ചുമത്തിയേക്കും. നിലവിൽ മൂവരും പോലീസ് കസ്റ്റഡിയിൽ തുടരുകയാണ്. ഭീഷണിപ്പെടുത്തി പണം ആവശ്യപ്പെടുന്നവർക്ക് വഴങ്ങരുതെന്നും പണം നൽകുന്നത് ഇത്തരം കുറ്റകൃത്യങ്ങൾ വർധിക്കാൻ കാരണമാകുമെന്നും അധികൃതർ പൊതുജനങ്ങൾക്ക് മുന്നറിയിപ്പ് നൽകി.

സറേയിൽ പണം തട്ടൽ ഭീഷണികൾ വർധിക്കുന്ന സാഹചര്യത്തിൽ പ്രത്യേക ടിപ്പ് ലൈനും 250,000 ഡോളറിന്റെ റിവാർഡ് ഫണ്ടും പോലീസ് ഏർപ്പെടുത്തിയിട്ടുണ്ട്. ഞായറാഴ്ചത്തെ സംഭവത്തെക്കുറിച്ച് എന്തെങ്കിലും വിവരങ്ങൾ ലഭിക്കുന്നവർ പോലീസിനെ അറിയിക്കണമെന്ന് വ്യക്തമാക്കി.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82

Surrey shooting: Three Indian-origin men arrested, photos of suspects released